ମୁମ୍ବାଇ,୧୩।୯: ସନାତନ ଧର୍ମ ଉପରେ ଦେଇଥିବା ମନ୍ତବ୍ୟ ପାଇଁ ତାମିଲନାଡୁ ସରକାରର ମନ୍ତ୍ରୀ ତଥା ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନଙ୍କ ପୁଅ ଉଦୟନିଧି ଷ୍ଟାଲିନଙ୍କ ବିରୋଧରେ ଆଉ ଏକ ଏଫ୍ଆଇଆର ପଞ୍ଜୀକୃତ ହୋଇଛି। ଧାର୍ମିକ ଭାବନାକୁ ଆଘାତ ଦେବା ଅଭିଯୋଗରେ ଏହି ଏଫ୍ଆଇଆର ମୁମ୍ବାଇର ମୀରା ରୋଡ ପୋଲିସ ଷ୍ଟେଶନରେ ପଞ୍ଜୀକୃତ କରାଯାଇଛି। ଏପ୍ଆଇଆରରେ ବିଭିନ୍ନ ଗୋଷ୍ଠୀଙ୍କ ମଧ୍ୟରେ ଘୃଣା ବ୍ୟାପିବା ପାଇଁ ଆଇପିସିର ଧାରା ୧୫୩ଏ ଏବଂ ଧାର୍ମିକ ଭାବନାକୁ ଆଘାତ ପହଞ୍ଚାଇବା ପାଇଁ ଆଇପିସିର ଧାରା ୨୯୫ଏରେ ଅନ୍ତର୍ଭୂକ୍ତ କରାଯାଇଛି।
ଗତ ସପ୍ତାହରେ ଉତ୍ତରପ୍ରଦେଶର ରାମପୁରରେ ଷ୍ଟାଲିନଙ୍କ ବିରୋଧରେ ଏକ ଏଫ୍ଆଇଆର ପଞ୍ଜୀକୃତ ହୋଇଥିଲା, ଯେଉଁଥିରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କ ପୁଅ ପ୍ରିୟଙ୍କ ଖାର୍ଗେଙ୍କ ନାମ ମଧ୍ୟ ସାମିଲ ଥିଲା। ଉଦୟନିଧିଙ୍କ ବିବୃତ୍ତିକୁ ସମର୍ଥନ କରିବା ପାଇଁ ପ୍ରିୟଙ୍କ ନାମ ଏଫ୍ଆଇଆର ହୋଇଥିଲା। ଏହା ବ୍ୟତୀତ ବିହାରର ମୁଜାଫରପୁର ମୁଖ୍ୟ ଜୁଡିସିଆଲ ମାଜିଷ୍ଟ୍ରେଟ କୋର୍ଟରେ ଉଦୟନିଧି ଷ୍ଟାଲିନଙ୍କ ବିରୋଧରେ ଏକ ଅଭିଯୋଗ ମଧ୍ୟ କରାଯାଇଥିଲା।