ବୈଶିଙ୍ଗା,୧୨ା୬(ଡି.ଏନ.ଏ.): ମୟୂରଭଞ୍ଜ ଜିଲା ବେତନଟୀ ବ୍ଲକ ଅଧୀନ ଚାଞ୍ଝିପଦା ପଞ୍ଚାୟତର କୁରାଢ଼ିକ ଗ୍ରାମରେ ୨୦୧୯ରୁ ବସୁଧା ଯୋଜନା ମାଧ୍ୟମରେ ନର୍ମିତ ୧ଲକ୍ଷ ଲିଟର କ୍ଷମତା ବିଶିଷ୍ଟ ଏକ ପାଣି ଟାଙ୍କି ସହିତ ୨ଟି ବୋରିଂ ଖୋଳା ଯାଇଥିଲା। ହେଲେ ଦୀର୍ଘ ଦିନ ହେବ ବିଦ୍ୟୁତ୍ ସଂଯୋଗ କରାଯାଇ ପାରି ନ ଥିଲା। ତେବେ ଚଳିତ ବର୍ଷ ଏପ୍ରିଲ ମାସରେ ସ୍ଥାୟୀ ବିଦ୍ୟୁତ୍ ସଂଯୋଗ କରାଯାଇ ଗ୍ରାମବାସୀଙ୍କୁ ଟ୍ୟାପ୍ ଯୋଗେ ପାନୀୟ ଜଳ ଯୋଗାଇ ଦିଆଯାଉଥିଲା। ମାତ୍ର ୧ ମାସ ମଧ୍ୟରେ ଟ୍ୟାପ୍ରୁ ପାଣି ବଦଳରେ କୁଢ଼ କୁଢ଼ ବାଲି ବାହାରିବା ସହିତ ପାଣି ଆଉ ପାନୀୟ ଯୋଗ୍ୟ ହେଲାନି। ଏ ନେଇ ଗ୍ରାମବାସୀ ଠିକାଦାରଙ୍କୁ ଅଭିଯୋଗ କଲା ପରେ ସେ ୨ଟି ବୋରିଂରୁ ଗୋଟିଏରୁ ପ୍ରଚୁର ପରିମାଣରେ ବାଲି ବାହାରୁଥିବା ଦେଖିଥିଲେ। ସେହି ସମୟରେ ଓଭରହେଡ୍ ଟାଙ୍କିରୁ ମଧ୍ୟ ବାଲି ବାହାରି ଥିବାର ଗ୍ରାମବାସୀମାନେ ପ୍ରକାଶ କରିଥିଲେ। ପରେ ଠିକାଦାର ଦୁଇ ଥର କମ୍ପ୍ରେସର କରାଇଥିଲେ ମଧ୍ୟ ସମସ୍ୟାର କିଛି ସମାଧାନ ହୋଇ ନ ଥିଲା। ଏହି ଟାଙ୍କିରୁ ଗ୍ରାମର ୨୭୦ଟି ପରିବାରକୁ ପାଇପ୍ ସଂଯୋଗ କରାଯାଇ ପାଣି ଯୋଗାଇ ଦିଆଯାଉଥିଲା l ହେଲେ ଏବେ ଗୋଟିଏ ବୋରିଂ କାମ କରୁଥିବାବେଳେ ଏହା ଲୋକଙ୍କ ପାନୀୟ ଜଳ ଚାହିଦା ପୂରଣ କରିପାରୁନାହିଁ। ଫଳରେ ଲୋକେ ପାନୀୟ ଜଳ ସମସ୍ୟାକୁ ନେଇ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଚଳିତ ବର୍ଷ ଖରାଦିନ ଆରମ୍ଭରୁ ଉତ୍କଟ ହୋଇଥିବା ଜଳ କଷ୍ଟ ନେଇ ଗ୍ରାମବାସୀ ବିଭାଗୀୟ ନିର୍ବାହୀ ଯନ୍ତ୍ରୀଙ୍କୁ ଲିଖିତ ଅଭିଯୋଗ ପତ୍ର ଦେଇଥିଲେ ମଧ୍ୟ କୌଣସି ସୁଫଳ ମିଳି ନ ଥିବା ଅଭିଯୋଗ କରିଛନ୍ତି l