କୋଣାର୍କ,୧୦ା୧୨(ଡି.ଏନ୍.ଏ.):କୋଣାର୍କ ସୂର୍ଯ୍ୟମନ୍ଦିର ପରିସର ପୂର୍ବ ପାର୍ଶ୍ୱ ବାଲିବନ୍ତଠାରୁ ବାଲି ଚୋରା ଚାଲାଣ ହେଉଥିବା ଅଭିଯୋଗ ହୋଇଛି। ତେବେ ଏହି ଚୋରି ଆଉ କେହି ନୁହେଁ ଖୋଦ୍ ଏଏସ୍ଆଇ ଅଧିକାରୀଙ୍କ ନିର୍ଦ୍ଦେଶରେ ହେଉଥିବା କୋଣାର୍କର ୨ଟି ସଂଘ ଏହି ଅଭିଯୋଗ ଆଣିଛନ୍ତି। ତେବେ ଏହି ଘଟଣା ଜଣାପଡ଼ିବା ପରେ ବୁଧବାର ପ୍ରତ୍ନତତ୍ତ୍ୱ ବିଭାଗର କୋଣାର୍କ ଦାୟିତ୍ୱରେ ଥିବା ଅଧିକାରୀ ନିରୋଜ ସିଂ ଏକ ଟିମ୍ ସହ ଆସି ତଦନ୍ତ ଆରମ୍ଭ କରିଛନ୍ତି। ସୂଚନା ଅନୁଯାୟୀ, ସୂର୍ଯ୍ୟମନ୍ଦିରରେ ରାତି ଜଗୁଆଳି ଭାବେ ଏଏସ୍ଆଇର କଡ଼ା ସୁରକ୍ଷା ବାହିନୀ ନିୟୋଜିତ ଥିବାବେଳେ କିଛିଦିନ ତଳେ ସୂର୍ଯ୍ୟମନ୍ଦିର ପାର୍ଶ୍ୱରେ ଥିବା ଏକ ପୁରାତନ ଗଛ ପାର୍ଶ୍ୱରୁ ଅଧରାତିରେ ଟ୍ରିପ ଟ୍ରିପ ବାଲି ଖୋଳାଯାଇ ଚାଲାଣ ହେଉଥିବା ଦେଖିଥିଲେ। ଏହାସହ କିଛି ପୁରାତନ ଭଗ୍ନ ମୂର୍ତ୍ତି ଓ ପଥର ମଧ୍ୟ ନିଆଯାଉଥିଲା। ପରେ ଏହି କାର୍ଯ୍ୟ କେତେଜଣ ଏଏସ୍ଆଇ କର୍ମଚାରୀଙ୍କ ପ୍ରରୋଚନାରେ ହୋଇଥିବା ଚର୍ଚ୍ଚା ହୋଇଥିଲା। ତେବେ ଏହି ସ୍ଥାନଟି କୋଣାର୍କ ଥାନାର ୨୦୦ ମିଟର ମଧ୍ୟରେ ଥିବାବେଳେ କିଭଳି ରାତିରେ ବାଲିଚାଲାଣ ହେଉଥିବାର ପୋଲିସ ଜାଣିପାରିଲାନି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଏହି ବାଲି ଚୋରି ସମ୍ପର୍କରେ କୋଣାର୍କ ଆଞ୍ଚଳିକ ବିକାଶ ପରିଷଦର ସଭାପତି ସୁବାସ ଚନ୍ଦ୍ର ନାୟକ ଓ କୋଣାର୍କ ସୁରକ୍ଷା ସମିତିର ଆବାହକ ଭାଗୀରଥି ସ୍ବାଇଁ ପୃଥକ ଭାବେ ୨ଟି କୋଣାର୍କ ଥାନାରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗକ୍ରମେ ଥାନା ପକ୍ଷରୁ ମଧ୍ୟ ଘଟଣାର ତଦନ୍ତ ଆରମ୍ଭ ହୋଇଛି। ଏହି ଘଟଣା ଠିକ ତଦନ୍ତ ନ ହେଲେ ଆଞ୍ଚଳିକ ବିକାଶ ପରିଷଦ ସମେତ କୋଣାର୍କର ବିଭିନ୍ନ ଅନୁଷ୍ଠାନ, ବୁଦ୍ଧିଜୀବୀ ଓ ବରିଷ୍ଠ ନାଗରିକମାନେ ରାଜରାସ୍ତାକୁ ଓହ୍ଲାଇବେ ବୋଲି ସୂଚନା ମିଳିଛି। ଏ ସମ୍ପର୍କରେ କୋଣାର୍କ ଦାୟିତ୍ୱରେ ଥିବା ପ୍ରତ୍ନତତ୍ତ୍ୱ ଅଧିକାରୀ ନିରୋଜ ସିଂ କୁହନ୍ତି, ଏ ଖବର ମୋର ହସ୍ତଗତ ହୋଇଛି। ମଁୁ ନିଜେ ଘଟଣାସ୍ଥଳକୁ ଯାଇ ତଦନ୍ତ କରିଛି। ଏହା ସତ୍ୟ ଥିଲେ ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବି।
