ମୋରଡ଼ା,୩୧ା୩(ସ୍ମାରକ ମାଜୀ)ସଂସାରରେ ଜୀବନ ଯାତ୍ରା ସରିବା ପରେ ମୁକ୍ତି ଯାତ୍ରା ଅନିବାର୍ଯ୍ୟ। ତେବେ ଏହି ମୁକ୍ତି ଯାତ୍ରାର ବାହକ ହୁଅନ୍ତି ନିଜ ରକ୍ତ ସମ୍ପର୍କୀୟ ଓ଼ ଆତ୍ମୀୟ ସ୍ବଜନ। ତେବେ ଏମିତି ଜଣେ ବ୍ୟକ୍ତି ଅଛନ୍ତି ଜାତି, ଧର୍ମ, ବର୍ଣ୍ଣ, ନିର୍ବିଶେଷରେ ଯେକୌଣସି ମୃତ ବ୍ୟକ୍ତିଙ୍କ ଘରେ ଯୋଗଦେଇ ମୃତ ବ୍ୟକ୍ତିଙ୍କର ଶବ ବାହକ ଏବଂ ଦାହକ ଭାବେ କାର୍ଯ୍ୟ କରନ୍ତି। ସେ ହେଲେ ମୟୂରଭଞ୍ଜ ଜିଲା ମୋରଡ଼ା ବ୍ଲକ୍ ଚିତ୍ରଡ଼ା ଅଞ୍ଚଳର ପ୍ରବୋଧ କୁମାର ରାୟବାବୁ। ସମସ୍ତେ ତାଙ୍କୁ ସାନ ଦାଦା ବୋଲି ଡାକନ୍ତି।
ପେସାରେ ଡ୍ରାଇଭର ହେଲେ ମଧ୍ୟ ନିଶା ତାଙ୍କର ଜନସେବା। ଚିତ୍ରଡା, ହଳଦୀପାଳ ଏବଂ ବ୍ଲକ୍ର ଆଖପାଖ ଅଞ୍ଚଳର ଯେ କୌଣସି ବ୍ୟକ୍ତିଙ୍କ ମୃତ୍ୟୁ ଘଟିଲେ ତାଙ୍କୁ ଖୋଜାପଡ଼େ। ବେଳେ ବେଳେ ଖବର ଶୁଣି ନିଜେ ମଧ୍ୟ ପହଞ୍ଚତ୍ ଯାଆନ୍ତି। ମରଶରୀରକୁ କାନ୍ଧ ଦେବା ସହିତ ୬ ଖଣ୍ଡ କାଠରେ କୋକେଇ ବାନ୍ଧିବା ତାଙ୍କ ପାଇଁ ଏକ କର୍ତ୍ତବ୍ୟ। ଚଉଦ ବର୍ଷ ବୟସ ତଥା ନବମ ଶ୍ରେଣୀରେ ପାଠ ପଢ଼ୁଥିବା ବେଳେ ସେ ପ୍ରଥମେ ମୃତଦେହ ବାହକ ହୋଇ ମଶାଣିକୁ ଯାଇଥିଲେ। ସେ ଦିନଠାରୁ ଏ ପର୍ଯ୍ୟନ୍ତ ୧୮୬ ଜଣଙ୍କୁ କାନ୍ଧ ଦେବା ସହ ଦାହା ସଂସ୍କାର କରିଛନ୍ତି। ସେହିପରି ମୃତ୍ୟୁ ଲୋକଙ୍କ ଅସ୍ଥି ବିସର୍ଜନ ମଧ୍ୟ କରିବାକୁ ଯାଆନ୍ତି। ୩୦ରୁ ଅଧିକ ଲୋକଙ୍କ ଅସ୍ଥି ବିସର୍ଜନ ମଧ୍ୟ କରିସାରିଲେଣି। କୋରନା ମହାମାରୀ ସମୟରେ ମୃତ୍ୟୁ ଶରୀର ପାଖକୁ କେହି ଯାଉ ନ ଥିବା ବେଳେ ସେ ନିଜେ କାନ୍ଧରେ ବୋହି ଅନେକ ମୃତଦେହ ଦାହ କରିଥିଲେ। ଯାହା ପାଇଁ ସମଗ୍ର ଅଞ୍ଚଳରେ ତାଙ୍କୁ ପ୍ରଶଂସା କରାଯାଇଥିଲା। ଏଥିସହ ଅଞ୍ଚଳରେ ବାହାଘର ହେଉକି ବ୍ରତଘର କି ରୋଗୀଙ୍କୁ ନେଇ ଡାକ୍ତରଖାନା ଯିବା ସବୁ ଜାଗାରେ ସହଯୋଗ ପାଇଁ ଆଗେଇ ଆସନ୍ତି। ତାଙ୍କର ପରପୋକାରୀ ଗୁଣ ପାଇଁ ଅଞ୍ଚଳର ଘରେ ଘରେ ସାନ ଦାଦା ଭାବେ ବେଶ ପରିଚିତ ହୋଇପାରିଛନ୍ତି। ବିପଦ ଆପଦ ସମୟରେ ଯଥା ମୃତଦେହ ଦାହ, ବ୍ରତ, ବାହାଘର ସମୟରେ ସାନ ଦାଦାଙ୍କୁ ଖୋଜାପଡ଼େ। ସେ ଖୁସିର ସହ ଉପସ୍ଥିତ ରହି ସମସ୍ତ କାର୍ଯ୍ୟରେ ସହଯୋଗ କରନ୍ତି ବୋଲି ଅଞ୍ଚଳର ବିଶ୍ୱ ବନ୍ଦନ ବେହେରା, ବରିଷ୍ଠ ନାଗରିକ ସେକ ମୁସ୍ତଫା, ଦୀପକ କୁମାର ବେହେରା ପ୍ରମୁଖ ମତବ୍ୟକ୍ତ କରିଛନ୍ତି।