ପୁରୀ ଅଫିସ, ୩୦।୪: ଆସନ୍ତା ୩ ତାରିଖ ପବିତ୍ର ଅକ୍ଷୟତୃତୀୟାଠାରୁ ମହାପ୍ରଭୁଙ୍କ ୨୧ଦିନିଆ ବାହାର ଚନ୍ଦନ ଯାତ୍ରା ଆରମ୍ଭ ହେବ। ମହାମାରୀ କରୋନା ପାଇଁ ଗତ ଦୁଇବର୍ଷ ହେବ ବିନା ଭକ୍ତରେ ବାହାର ଚନ୍ଦନଯାତ୍ରା ହେଉଥିଲା। ତେବେ ଚଳିତବର୍ଷ ସଂକ୍ରମଣ କମିଥିବାରୁ ବାହାର ଚନ୍ଦନଯାତ୍ରାରେ ଭକ୍ତ ସାମିଲ ହେବେ। ଚନ୍ଦନ ଯାତ୍ରା ଲାଗି ଚନ୍ଦନ ଚକଡ଼ା ଚଳଚଞ୍ଚଳ ହୋଇଉଠିଛି। ଶ୍ରୀମନ୍ଦିର ପ୍ରଶାସନ ଏବଂ ଜିଲା ପ୍ରଶାସନ ପକ୍ଷରୁ ପ୍ରସ୍ତୁତି ଚାଲିଛି। ଚନ୍ଦନ ଚକଡ଼ା, ମଦନ ମୋହନ ବିଜେ ସ୍ଥଳୀ ଓ ନରେନ୍ଦ୍ର ପୁଷ୍କରିଣୀକୁ ରଙ୍ଗ ଦିଆଯିବା ସହ ସଜାଯାଉଛି। ୨୧ଦିନିଆ ବାହାର ଚନ୍ଦନ ଯାତ୍ରାରେ ମଣିବିମାନରେ ମହାପ୍ରଭୁଙ୍କ ଚଳନ୍ତି ପ୍ରତିମା ପ୍ରଭୁ ମଦନମୋହନ, ରାମ ଓ କୃଷ୍ଣ, ଭୂଦେବୀ, ଶ୍ରୀଦେବୀଙ୍କ ସହ ଶ୍ରୀକ୍ଷେତ୍ରର ପଞ୍ଚମହାଦେବ ନରେନ୍ଦ୍ର ପୁଷ୍କରିଣୀକୁ ବିଜେ କରିବେ। ଚନ୍ଦନ ଠାକୁରଙ୍କୁ ନୌବିହାର କରାଇବାକୁ ନନ୍ଦା, ଭଦ୍ରା ଚାପ ଡଙ୍ଗା ପ୍ରସ୍ତୁତ କରାଗଲାଣି। ନରେନ୍ଦ୍ର ପୁଷ୍କରଣୀରେ ବର୍ଷତମାମ ବୁଡ଼ି ରହିଥିବା ନନ୍ଦା, ଭଦ୍ରା ସହ ବୈଜୟନ୍ତୀ ଚାପଡଙ୍ଗାକୁ ଚୈତ୍ର ପୂର୍ଣ୍ଣମାରେ ଭୋଇ ସେବାୟତଙ୍କ ଦ୍ୱାରା ବାହାର କରାଯାଇଥିଲା। ଅନ୍ୟପଟେ ରଥ ନିର୍ମାଣ ନିମନ୍ତେ ରଥଖଳା ଓ ଚନ୍ଦନ ଚକଡ଼ାରେ ଭୋଇସେବକଙ୍କ ଦ୍ୱାରା ଚାଳିଆ ପ୍ରସ୍ତୁତ କରାଯାଇଛି। ଆସନ୍ତା ଅକ୍ଷୟତୃତୀୟା ଦିନ ରଥକାଠ ଅନୁକୂଳ ହେବ।