କେନ୍ଦୁଝର, ୪ା୧୦ (ସ୍ବ.ପ୍ର.): କୋଭିଡ କଟକଣା ଯୋଗୁ ଦୀର୍ଘ ଦିନ ଧରି ବନ୍ଦ ରହିଥିବା ସାନଘାଗରା ଜଳପ୍ରପାତ ପର୍ଯ୍ୟଟନ କେନ୍ଦ୍ର ଖୋଲିବା ପରେ ଧୀରେ ଧୀରେ ଅବସ୍ଥା ସ୍ବାଭାବିକ ହେବାକୁ ଲାଗିଛି। ଯଦିଓ ପର୍ଯ୍ୟଟନ ଋତୁ ଆସି ଗଲାଣି ତେବେ ଆଗଭଳି ପର୍ଯ୍ୟଟକ ଙ୍କ ଭିଡ ଦେଖିବାକୁ ମିଳୁନାହିଁ। ବହୁତ କମ ସଂଖ୍ୟାରେ ପର୍ଯ୍ୟଟକ ବୁଲିବାକୁ ଆସୁଥିଲେ ହେଁ ଭୋଜିଭାତ କରି ମଜାମଜଲିସ କରିପାରୁନାହନ୍ତି। ଫଳରେ ପର୍ଯ୍ୟଟନ କେନ୍ଦ୍ର ପରିସର କାଁ ଭାଁ ଲାଗୁଛି ା ନା ଶୁଭୁଛି ମାଇକ/ଡିଜେ ଗୀତ, ନା ଦେଖିବାକୁ ମିଳୁଛି ନାଚ ଗୀତ ା
ତେବେ ଆଗକୁ ପରିସ୍ଥିତି ସୁଧୁରିବ ଏବଂ ଆଗଭଳି ପର୍ଯ୍ୟଟକଙ୍କ ସଂଖ୍ୟା ବଢିବ ବୋଲି ମତ ପ୍ରକାଶ ପାଉଛି। ସାନଘାଗରାର ମନୋରମ ଜଳପ୍ରପାତ ବୁଲି ଦେଖିବା ସହ ଚାରିପାଖର ପ୍ରାକୃତିକ ସବୁଜ ବନାନୀର ସାୈନ୍ଦର୍ଯ୍ୟକୁ ଉପଭୋଗ କରୁଛନ୍ତି। ସେହିପରି ଏହା ପରିସରରେ ଥିବା ହ୍ରଦ ରେ ବୋଟିଂର ମଜା ନେଉଛନ୍ତି। ଆଗରୁ ବୋଟିଂ ପାଇଁ ବହୁ ସମୟ ଅପେକ୍ଷା କରିବାକୁ ପଡୁଥିଲା। ଏବେ କିନ୍ତୁ ପ୍ରାୟ ବୋଟ ସବୁ ଖାଲି ପଡ଼ୁଛି। ଗୋଟିଏ/ଦୁଇଟି ବୋଟ ରେ ପର୍ଯ୍ୟଟକ ମାନେ ମନ ଖୁସିରେ ବୁଲୁଛନ୍ତି। କଟକରୁ ଆସିଥିବା ଜଣେ ପର୍ଯ୍ୟଟକ ବାବୁଲା ସାହୁ କହିଛନ୍ତି, କୋଭିଡ ପାଇଁ ପରିସର ମଳିନ ପଡିଯାଇଛି। ଭିଡ଼ ନାହିଁ ା ଆଗଭଳି ସ୍ବରଶବ୍ଦ ଓ ଚଳଚଞ୍ଚଳ ନାହିଁ। ଏଣୁ ଭଲ ଲାଗୁନାହିଁ। ତେବେ ଜଲପ୍ରପାତ ବୁଲି ଦେଖିବା ଏବଂ ବୋଟିଂର ମଜା ଉଠାଇ ଫେରୁଛୁ ା ସଂଗ୍ରହାଳୟ ବନ୍ଦ ପଡିଛି ା ଅନ୍ୟାନ୍ୟ ଖେଳ ବନ୍ଦ ରହିଛି ା
ରାଜ୍ୟ ପ୍ରସିଦ୍ଧ ଏହି ଜଳପ୍ରପାତକୁ ଅଧିକ ପର୍ଯ୍ୟଟକଙ୍କ ଆକୃଷ୍ଟ କରିବା ପାଇଁ ପ୍ରଶାସନ ପକ୍ଷରୁ ଏହାର ଉନ୍ନତି କରଣ କରିବା ସହ ସେମାନଙ୍କ ସୁବିଧା ପାଇଁ ବ୍ୟାପକ ବ୍ୟବସ୍ଥା କରାଯାଇଛି। ତେବେ କୋଭିଡ ମହାମାରୀ ଯୋଗୁ ଏହା ବାରମ୍ବାର ବନ୍ଦ ରହିବା ଫଳରେ ଏହାର ରକ୍ଷଣାବେକ୍ଷଣ ହୋଇ ନ ପାରି ଅବ୍ୟବସ୍ଥା ମଧ୍ୟରେ ରହିଛି ା କେନ୍ଦୁଝର ସହର ଠାରୁ ମାତ୍ର ୬ କି.ମି. ଦୂରରେ କେନ୍ଦୁଝର-ସମ୍ବଲପୁର ଏନ୍ଏଚ ୪୯ ରାସ୍ତା କଡରେ ଏହି ପର୍ଯ୍ୟଟନ କେନ୍ଦ୍ର ରହିଛି। ଆଗକୁ ପୂଜାଛୁଟି ସାଙ୍ଗକୁ ଶୀତ ଋତୁର ଆଗମନ ଥିବାରୁ ଅଧିକ ପର୍ଯ୍ୟଟକ ଆସିବା ସମ୍ଭାବନା ରହିଛି। ଏଣୁ ପ୍ରଶାସନ ପକ୍ଷରୁ ପର୍ଯ୍ୟଟକଙ୍କ ଖାଇବା, ଭୋଜିଭାତ ଆୟୋଜନ କରିବା, ସୁରକ୍ଷା ତଥା ଅନ୍ୟାନ୍ୟ ଆବଶ୍ୟକତା ପୂରଣ କରିବା ନେଇ ପଦକ୍ଷେପ ନେବାକୁ ପ୍ରେସ କ୍ଲବ ଉପସଭାପତି ତଥା ପରିବେଶପ୍ରେମୀ କେନ୍ଦୁଝରର ପ୍ରଦିପ ମହାନ୍ତି ଦାବି କରିଛନ୍ତି ା