ଜଗତସିଂହପୁର ଅଫିସ,୪।୧: ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଓଏସ୍ଡି ଭାବେ କାର୍ଯ୍ୟ କରୁଥିବା ସଂଗ୍ରାମ କେଶରୀ ମହାପାତ୍ର ପୁଣି ଜଗତ୍ସିଂହପୁର ଜିଲାପାଳ ଭାବେ ନିଯୁକ୍ତ ହୋଇଛନ୍ତି। ରାଜ୍ୟ ସରକାରଙ୍କ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ପକ୍ଷରୁ ଏନେଇ ବିଜ୍ଞପ୍ତି ଜାରି କରାଯାଇଛି। ଗତ ନଭେମ୍ବର ୩ ତିର୍ତ୍ତୋଲ ଉପନିର୍ବାଚନ ପୂର୍ବରୁ ମହାପାତ୍ରଙ୍କୁ ବଦଳି କରାଯାଇଥିଲା। ଜଟଣୀ ବିଧାୟକ ତଥା କଂଗ୍ରେସ ନେତା ସୁରେଶ କୁମାର ରାଉତରାୟ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ (ସିଇଓ)ଙ୍କୁ ଚିଠି ଲେଖି ମହାପାତ୍ରଙ୍କ ତୁରନ୍ତ ବଦଳି ଦାବି କରିଥିଲେ। ସେ ଦର୍ଶାଇଥିଲେ ଜିଲାପାଳ ମହାପାତ୍ର ତିର୍ତ୍ତୋଲ ବ୍ଲକ ଶଙ୍ଖେଶ୍ୱର ଗ୍ରାମ ପଞ୍ଚାୟତର ଶରତ ଚନ୍ଦ୍ର ମହାପାତ୍ରଙ୍କ ପୁଅ। ଶରତ ଜନତା ଦଳର ଜଣେ ଆଞ୍ଚଳିକସ୍ତରର ନେତା ଥିଲେ। ତେଣୁ ସେ ଜିଲାପାଳ ରହିଲେ ନିର୍ବାଚନର ସ୍ବଚ୍ଛତା ଓ ନିରପେକ୍ଷତା ଉପରେ ସନ୍ଦେହ ରହିଛି। ଏହି ଅଭିଯୋଗକୁ ଆଧାର କରି ନିର୍ବାଚନ କମିଶନ ମହାପାତ୍ରଙ୍କୁ ବଦଳି ସୁପାରିସ କରିଥିଲେ। ତଦନୁଯାୟୀ ରାଜ୍ୟ ସରକାର ମହାପାତ୍ରଙ୍କୁ ବଦଳି ସହ ତାଙ୍କ ସ୍ଥାନରେ ସରୋଜ କୁମାର ମିଶ୍ରଙ୍କୁ ନୂତନ ଜିଲାପାଳ ଭାବେ ଅବସ୍ଥାପିତ କରିଥିଲେ।