କେନ୍ଦୁଝର,୨୧।୨(ସ୍ବ.ପ୍ର./ଡି.ଏନ.ଏ.): କେନ୍ଦୁଝର ଜିଲାରେ ତୃତୀୟ ପର୍ଯ୍ୟାୟ ନିର୍ବାଚନ ଶାନ୍ତିଶୃଙ୍ଖଳାର ସହିତ ଶେଷ ହୋଇଛି। ଝୁମ୍ପୁରା ବ୍ଲକରେ ୭୫ ପ୍ରତିଶତ, ଆନନ୍ଦପୁରରେ ୭୫ ପ୍ରତିଶତ ଓ ହାଟଡିହି ବ୍ଲକରେ ୭୪ ପ୍ରତିଶତ ମତଦାନ ହୋଇଥିବା ସୂଚନା ମିଳିଛି। ଏହି ୩ ବ୍ଲକର ସମୁଦାୟ ୨୦୩୪ ଜଣ ଜିଲା ପରିଷଦ, ସରପଞ୍ଚ, ସମିତି ସଭ୍ୟ ତଥା ଓ୍ବାର୍ଡ ମେମ୍ବର ପ୍ରାର୍ଥୀଙ୍କର ଭାଗ୍ୟ ଭୋଟ ବାକ୍ସ ମଧ୍ୟରେ ସିଲ୍ ହୋଇଛି ।
ଝୁମ୍ପୁରା ବ୍ଲକ ନାରଦପୁର ଗ୍ରାମପଞ୍ଚାୟତ ବଳଭଦ୍ରପୁର ବୁଥ୍ ନମ୍ବର ୬, ୭, ୮ରେ ସ୍ଥାନୀୟ ସମସ୍ୟାକୁ ନେଇ ଗ୍ରାମବାସୀ ଭୋଟ ବର୍ଜନ କରିଛନ୍ତି। ଆନନ୍ଦପୁର ବ୍ଲକର ୪୦୭ ୱାର୍ଡ ମେମ୍ବର, ୬୫ ସରପଞ୍ଚ, ୪୬ସମିତି ସଦସ୍ୟ, ୧୦ ଜିଲା ପରିଷଦ ସଦସ୍ୟ, ହାଟଡିହି ବ୍ଲକର ୭୬୧ୱାର୍ଡ ସଭ୍ୟ,୧୨୫ ସରପଞ୍ଚ,୧୨୫ ସମିତି ସଦସ୍ୟ, ୧୩ ଜିଲା ପରିଷଦ ସଦସ୍ୟ, ଝୁମ୍ପୁରା ବ୍ଲକରେ ୩୧୮ ୱାର୍ଡ ସଭ୍ୟ, ୮୨ସରପଞ୍ଚ, ୭୨ ସମିତି ସଦସ୍ୟ ଓ ୧୦ ଜିଲା ପରିଷଦ ପ୍ରାର୍ଥୀଙ୍କ ଭାଗ୍ୟ ପରୀକ୍ଷା ହୋଇଛି। ହାଟଡିହି ବ୍ଲକ ନନ୍ଦିପଦା ଥାନା ମନୋହରପୁର ଗ୍ରାମରେ ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ ହୋଇଥିବା ଖବର ମିଳିଛି। ହାଟଡିହି ବ୍ଲକର ୧୩ ନମ୍ବର ଓ୍ବାର୍ଡରେ ସରପଞ୍ଚ ପ୍ରାର୍ଥୀଙ୍କ ବାଲଟ ପେପର ଫୋଲ୍ଡିଂରେ ତ୍ରୁଟି ପରିଲ୍ଲଖିତ ହୋଇଥିବା ଅଭିଯୋଗ ହୋଇଛି। ଉକ୍ତ ସ୍ଥାନରେ ପୁନଃ ଭୋଟ ଦାନ ପାଇଁ ଦାବି ହୋଇଛି ।
ସେହିପରି ତେଲକୋଇ ବ୍ଲକ ବିଞ୍ଜବାହାଳ ପଞ୍ଚାୟତର ୧ନଂ. ଓ୍ବାର୍ଡରେ ଆସନ୍ତା ୨୩ ତାରିଖ ସକାଳ ୯ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ପୁନଃ ଭୋଟ ଗ୍ରହଣ ହେବ। ଗତ ୧୮ ତାରିଖରେ ଏଠାରେ ଭୋଟ ଚାଲିଥିବା ବେଳେ ବାଲଟ ପେପର ଫୋଲ୍ଡିଂରେ ତ୍ରୁଟି ଯୋଗୁ ବିବାଦ ଦେଖାଦେଇଥିଲା। ଏଠାରେ ସାନି ଭୋଟ ପାଇଁ ନିର୍ବାଚନ କମିଶନଙ୍କ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି।