ମୁମ୍ବାଇ,୧୮ା୧୦: ଭାରତୀୟ ଟେନିସ୍ ଷ୍ଟାର ସାନିଆ ମିର୍ଜା ଓ ପାକିସ୍ତାନୀ କ୍ରିକେଟର ଶୋଏବ ମଲିକଙ୍କ ଡିଭୋର୍ସ ପୁଣି ଥରେ ଚର୍ଚ୍ଚାର ବିଷୟ ପାଲଟିଛି। ସାନିଆଙ୍କ ଇନ୍ଷ୍ଟାଗ୍ରାମ ଷ୍ଟୋରି ଏହି ଚର୍ଚ୍ଚାର ମୁଖ୍ୟ କାରଣ ପାଲଟିଛି। ‘ଯଦି ମୁଁ କଥା ହେଉଛି ତେବେ ମୁଁ ତୁମ ବିଷୟରେ ଚିନ୍ତା କରୁଛି ମାତ୍ର ଯଦି ମୁଁ ନୀରବ ତେବେ ସମ୍ପର୍କ ଶେଷ’ ବୋଲି ସାନିଆ ସୋମବାର ନିଜ ଇନ୍ଷ୍ଟାଗ୍ରାମରେ ଏକ ଷ୍ଟୋରି ରଖିଥିଲେ। ଉଭୟ ସାନିଆ ଓ ଶୋଏବ ବର୍ଷେରୁ ଅଧିକ ସମୟ ଧରି ଅଲଗା ରହୁଛନ୍ତି। ସାନିଆ ୫ ବର୍ଷର ପୁଅ ସହ ଦୁବାଇରେ ରହୁଥିବା ବେଳେ ଶୋଏବ ପାକିସ୍ତାନରେ ରହୁଛନ୍ତି। ସମୟ ସମୟରେ ସାନିଆ-ଶୋଏବଙ୍କ ଡିଭୋର୍ସକୁ ନେଇ ଚର୍ଚ୍ଚା ହେଉଥିବା ବେଳେ ଉଭୟ ସେଲିବ୍ରିଟି ଏହାକୁ ନେଇ କିଛି ପ୍ରତିକ୍ରିୟା ପ୍ରକାଶ କରିନାହାନ୍ତି। ନିକଟରେ ଅନ୍ତର୍ଜାତୀୟ ଟେନିସ୍ରୁ ଅବସର ଗ୍ରହଣ କରିଥିବା ସାନିଆଙ୍କ ଷ୍ଟୋରି ପରେ ସେ ଓ ଶୋଏବ ଅଲଗା ହେଉଥିବା ନେଇ ଫ୍ୟାନଙ୍କ ମଧ୍ୟରେ ଆଲୋଚନା ହେଉଛି।
କିଛି ଦିନ ପୂର୍ବରୁ ସାନିଆ ନିଜ ଇନ୍ଷ୍ଟାଗ୍ରାମରୁ ସବୁ ଫଟୋ ଡିଲିଟ୍ କରି ଦେଇଥିଲେ। ବର୍ତ୍ତମାନ ସାନିଆଙ୍କ ଆଇଡିରେ ଶୋଏବଙ୍କ ଗୋଟିଏ ବି ଫଟୋ ନାହିଁ। ଅନ୍ୟ ପକ୍ଷରେ ଶୋଏବ ମଧ୍ୟ ନିଜ ଇନଷ୍ଟା ବାୟୋ ପରିବର୍ତ୍ତନ କରିଛନ୍ତି। ପୂର୍ବରୁ ସେ ଜଣେ ସୁପର ଓମ୍ୟାନଙ୍କ ସ୍ବାମୀ ବୋଲି ଲେଖିଥିବା ବେଳେ ବର୍ତ୍ତମାନ ଜଣେ ଚମତ୍କାର ଶିଶୁର ପିତା ବୋଲି ଲେଖିଛନ୍ତି। ଉଲ୍ଲେଖଯୋଗ୍ୟ ଯେ, ପାକିସ୍ତାନୀ ଅଭିନେତ୍ରୀ ଓ ମଡେଲ ଆୟେଶା ଓମାରଙ୍କ ସହିତ ଫଟୋଶୁଟ୍ ପରେ ଉଭୟଙ୍କ ସମ୍ପର୍କ ଖରାପ ହେବା ନେଇ ଆଲୋଚନା ହୋଇଥିଲା।
