କୋରାପୁଟ,୨୮।୪(ସ୍ବ.ପ୍ର.): କୋରାପୁଟ ଜିଲା ସଦର ମହକୁମାସ୍ଥିତ ବସ୍ଷ୍ଟାଣ୍ଡରେ ଦୈନଦିନ ହଜାର ହଜାର ଯାତ୍ରୀ ଯାତାୟାତ କରୁଛନ୍ତି। ବିଭିନ୍ନ ସ୍ଥାନକୁ ଯିବାକୁ ସେମାନେ ବସ୍ ପାଇଁ ଏଠାରେ ଅପେକ୍ଷା କରନ୍ତି। କିନ୍ତୁ କୋରାପୁଟ ସହରର ମଧ୍ୟସ୍ଥଳରେ ଥିବା ବସ୍ଷ୍ଟାଣ୍ଡର ପରିମଳ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଛି। ଏ ନେଇ ବସ୍ଷ୍ଟାଣ୍ଡ ପରିସରରେ ଥିବା ବ୍ୟବସାୟୀ ଓ ଯାତ୍ରୀ ଅସୁବିଧାର ସମ୍ମୁଖୀନ ହେଉଥିବାରୁ କ୍ଷୋଭ ପ୍ରକାଶ କରିଛନ୍ତି।
କୋରାପୁଟ ବସ୍ଷ୍ଟାଣ୍ଡଟି ଜିଲାର ଏକ ମୁଖ୍ୟ ବସ୍ଷ୍ଟାଣ୍ଡ। ଏହାର ରକ୍ଷଣାବେକ୍ଷଣ ଦାୟିତ୍ୱ ସ୍ଥାନୀୟ ପୌର ପରିଷଦର। ବସ୍ଷ୍ଟାଣ୍ଡ ସହିତ ସହରର ସ୍ବଚ୍ଛତା ବଜାୟ ରଖିବା ପାଇଁ ପୌର ପ୍ରଶାସନ ପକ୍ଷରୁ ମାସକୁ ଲକ୍ଷ ଲକ୍ଷ ଟଙ୍କା ବ୍ୟୟ କରାଯାଉଛି। ୫ ବର୍ଷ ପୂର୍ବେ ମ୍ୟୁନିସିପାଲିଟି ପକ୍ଷରୁ ବସ୍ଷ୍ଟାଣ୍ଡକୁ ଦୈନଦିନ ଝାଡୁ କରାଯିବା ସହ ସପ୍ତାହକୁ ଥରେ ବସ୍ଷ୍ଟାଣ୍ଡ ପରିସରକୁ ଫିନାଇଲରେ ସଫା କରାଯାଉଥିଲା। କିନ୍ତୁ ବର୍ତ୍ତମାନ ବସ୍ଷ୍ଟାଣ୍ଡରେ ସପ୍ତାହକୁ ମାତ୍ର ଥରେ ଅଧେ ଝାଡୁ କରାଯାଉଛି ଏବଂ ଫିନାଇଲ ପକାଇ ବସ୍ଷ୍ଟାଣ୍ଟ ସଫା କରାଯିବା ପ୍ରାୟ ବନ୍ଦ ହୋଇଯାଇଥିବା ଅଭିଯୋଗ ହୋଇଛି। ଫଳରେ ବସ୍ଷ୍ଟାଣ୍ଡ ପରିସର ଅଳିଆ ଆବର୍ଜନା ପଡିରହୁଛି। ଏହି ଅବ୍ୟବସ୍ଥା ଯୋଗୁ ବର୍ତ୍ତମାନ ଗାଈ ଓ କୁକୁର ବସ୍ଷ୍ଟାଣ୍ଡ ପରିସରରେ ଆଡ୍ଡା ଜମାଉଛନ୍ତି। ସେହିପରି ବସ୍ଷ୍ଟାଣ୍ଡ ଉପର ମହଲାରେ ଥିବା ପୌର ପ୍ରଶାସନର ଗୋଦାମ ଗୃହ ମଧ୍ୟ ଭାଙ୍ଗିରୁଜି ବର୍ତ୍ତମାନ ବିପଦ ସଙ୍କୁଳ ଅବସ୍ଥାରେ ରହିଛି। ଉକ୍ତ କୋଠାରୁ ଅନେକ ସମୟରେ ଇଟା ସିମେଣ୍ଟ ଖଣ୍ଡ ଖସି ଯାତ୍ରୀଙ୍କ ଉପରେ ପଡିବାରୁ ସେମାନେ ଆହତ ହେଉଥିବା ଅଭିଯୋଗ ଆସିଛି। ଉପର ମହଲା ଗୃହ ଭୁଶୁଡି ପଡିବାର ଆଶଙ୍କା ରହିଛି। ବସ୍ଷ୍ଟାଣ୍ଡର ପରିମଳ ସମସ୍ୟା ଉପରେ ଦୃଷ୍ଟି ଦେଇ ପୌର ପ୍ରଶାସନ ତୁରନ୍ତ ଏ ଦିଗରେ କାର୍ଯ୍ୟାନୁଷ୍ଠାନ ନେବାର ଆବଶ୍ୟକତା ରହିଛି ବୋଲି ଯାତ୍ରୀ, ବ୍ୟବସାୟୀ ଓ ବୁଦ୍ଧିଜୀବୀ ଦାବି କରିଛନ୍ତି। ଏ ନେଇ କୋରାପୁଟ ପୌର ପରିଷଦ ଅଧକ୍ଷ ଲଲାଟ ରଞ୍ଜନ ସେଠୀଙ୍କୁ ପଚାରିବାରୁ ବସ୍ଷ୍ଟାଣ୍ଡର ପରିମଳ ସମସ୍ୟାର ସମାଧାନ ନେଇ ଆଗକୁ ସ୍ବତନ୍ତ୍ର ଦୃଷ୍ଟି ଦେବେ ବୋଲି ସେ କହିଛନ୍ତି।