ଆରଡ଼ି,୧୭।୨(ଡି.ଏନ୍.ଏ.): ଭଦ୍ରକ ଜିଲା ଆରଡ଼ି ଆଖଣ୍ଡଳମଣି ପୀଠର ଉନ୍ନତୀକରଣ ପାଇଁ ୬ବର୍ଷ ତଳେ ୬ କୋଟି ଟଙ୍କା ବ୍ୟୟବରାଦ କରାଯାଇଥିଲା। ତଦନୁଯାୟୀ କାର୍ଯ୍ୟ ମଧ୍ୟ ଚାଲୁ ରହିଥିଲା। ନଭେମ୍ବର ସୁଦ୍ଧା ମନ୍ଦିର ବେଢ଼ା ସମ୍ପ୍ରସାରଣ ଓ ଅନ୍ୟାନ୍ୟ ସୌନ୍ଦର୍ଯ୍ୟକରଣ କାର୍ଯ୍ୟ ସରିବ ବୋଲି ମୁଖ୍ୟ ଶାସନ ସଚିବ ଓ ୫-ଟି ସଚିବ ପୀଠ ଗସ୍ତ ଅବସରରେ ଘୋଷଣା କରିଥିଲେ। ହେଲେ ଫେବୃୟାରୀ ସରିବାକୁ ବସିଥିଲେ ବି ନିର୍ମାଣ କାର୍ଯ୍ୟ ସରିନାହିଁ। ଏହାବ୍ୟତୀତ ପୀଠ ସୌନ୍ଦର୍ଯ୍ୟକରଣ ନିମନ୍ତେ ପୁନଃ ୬୦ କୋଟି ଟଙ୍କା ବ୍ୟୟବରାଦ କରାଯାଇ ଯଥାଶୀଘ୍ର କାର୍ଯ୍ୟ ଆରମ୍ଭ ହେବ ବୋଲି ମଧ୍ୟ ଦୁଇ ସଚିବ ଘୋଷଣା କରିଥିଲେ। ପ୍ରାଥମିକ ୬କୋଟି ଟଙ୍କାର କାମ ୬ ବର୍ଷ ପୂରିଥିଲେ ବି ଆଦ୍ୟାବଧି ଶେଷ ହୋଇନାହିଁ। ସେହିଭଳି ୬୦କୋଟି ଟଙ୍କାର ନିର୍ମାଣ କାର୍ଯ୍ୟ କେତେ ବର୍ଷ ଲାଗିବ ବୋଲି ସ୍ଥାନୀୟ ଅଧିବାସୀ ପ୍ରଶ୍ନ ଉଠାଇଛନ୍ତି। ଏପଟେ ଆଉ ମାତ୍ର ଦିନକ ପରେ ପୀଠରେ ଜାଗର ଯାତ୍ରା। ଏହାକୁ ସୁଚାରୁରୂପେ ସମ୍ପାଦନ କରିବାକୁ ଜିଲାପାଳଙ୍କ ଅଧ୍ୟକ୍ଷତାରେ ୨ଥର ସମୀକ୍ଷା ବୈଠକ ବସିଛି। ପୀଠରେ ପରିମଳ ବ୍ୟବସ୍ଥା ଉପରେ ଗୁରୁତ୍ୱ ଦିଆଯିବା ପାଇଁ ନିଷ୍ପତ୍ତି ହୋଇଥିଲା। ମାତ୍ର ବିଭିନ୍ନ ସ୍ଥାନରେ କୁଢ଼ କୁଢ଼ ଆବର୍ଜନା ଏବେ ବି ପଡ଼ିରହିଛି। ଧର୍ମଶାଳା ପଡ଼ିଆ ପାର୍ଶ୍ୱ, ନୂତନ ଅତିଥି ଭବନ ପାର୍ଶ୍ୱ, ଚୂଳପକା ମଣ୍ଡପକୁ ଯିବା ରାସ୍ତାପାର୍ଶ୍ୱ ଓ ଗୁଡ଼ିଆସାହି ରାସ୍ତାପାର୍ଶ୍ୱରେ ଆବର୍ଜନା ବିପର୍ଯ୍ୟସ୍ତ ପରିମଳ ବ୍ୟବସ୍ଥାର ଚିତ୍ର ପ୍ରଦାନ କରୁଛି ବୋଲି ସ୍ଥାନୀୟ ବୁଦ୍ଧିଜୀବୀମାନେ ପ୍ରକାଶ କରିଛନ୍ତି। ମହାଶିବରାତ୍ରି ପୂର୍ବରୁ ଓ ପରେ ଏହି ଆବର୍ଜନା ହଟାଯିବାକୁ ପୂର୍ବତନ ଜିଲା ପରିଷଦ ସଭ୍ୟ ସୁରେଶ ସାହୁ ଓ ସୁନ୍ଦରପୁର ସମିତିସଭ୍ୟ ଶରତ ବେହୁରିଆ ଦାବି କରିଛନ୍ତି। ଏ ସମ୍ପର୍କରେ ମନ୍ଦିର ପରିଚାଳକ ବିଦ୍ୟାଧର ପଲାଇ କହିଛନ୍ତି, ଜାଗର ପାଇଁ ପୀଠ ଚତୁଃପାର୍ଶ୍ୱ ପ୍ରତିଦିନ ସଫେଇ ଚାଲିଛି। ସ୍ଥାୟୀ ଡ୍ରେନେଜ ବ୍ୟବସ୍ଥା ଲାଗି ପ୍ରସ୍ତୁତି ଚାଲିଛି। ସମାଧାନ ପାଇଁ ସମୟ ଲାଗିବ।