ପୁଣେ,୨୬।୩: ଭାରତୀୟ ଟିମ୍ର ଷ୍ଟାର ବୋଲର୍ ଜସପ୍ରିତ ବୁମ୍ରା ନିକଟରେ ବିବାହ ବନ୍ଧନରେ ବାନ୍ଧି ହୋଇଥିଲେ। ଟେଲିଭିଜନ ଆଙ୍କର ସଞ୍ଜନା ଗଣେଶନଙ୍କ ହାତ ଧରିଥିଲେ ସେ। ଏବେ ବିବାହକୁ ମାତ୍ର କେଇଟା ଦିନ ବିତିଥିବା ବେଳେ ସଞ୍ଜନା ଶନିବାର କାମକୁ ଫେରିଥିବା ଦେଖାଯାଇଛି। ଭାରତ-ଇଂଲଣ୍ଡ ମଧ୍ୟରେ ଜାରି ରହିଥିବା ଦ୍ୱିତୀୟ ଦିନିକିଆ ପୂର୍ବରୁ ଆୟୋଜିତ ପ୍ରି-ମ୍ୟାଚ୍ ଶୋ’ରେ ସେ ଆଙ୍କରିଂ କରୁଥିବା ଦେଖାଯାଇଛି। ଷ୍ଟାରସ୍ପୋଟର୍ସରେ ଏହା ପ୍ରସାରିତ ହୋଇଛି। କାର୍ଯ୍ୟକ୍ରମରେ ପୂର୍ବ କ୍ରିକେଟର ଭିଭିଏସ୍ ଲକ୍ଷ୍ମଣ ଏବଂ ଇରଫାନ୍ ପଠାନ ସାମିଲ ଥିଲେ। ତେବେ ମ୍ୟାଚ୍ର ପ୍ରଥମ ଇନିଂସ ଶେଷ ହେବା ପରେ ସେ ପୁଣିଥରେ ଏକ୍ସପର୍ଟଙ୍କ ସହ ଆଲୋଚନା କରିବେ।
ସଞ୍ଜନା ପୁନର୍ବାର କାମକୁ ଫେରିଥିବା ଯୋଗୁ ସୋସିଆଲ ମିଡିଆରେ ବୁମ୍ରାଙ୍କ ପ୍ରଶଂସକ ତାଙ୍କୁ ମଜାଦାର ପ୍ରଶ୍ନ କରୁଛନ୍ତି। ଘରେ ସେ ଏକୁଟିଆ କ’ଣ କରୁଛନ୍ତି। କ’ଣ ପାଇଁ ସେ ପଡ଼ିଆକୁ ଫେରିନାହାନ୍ତି ବୋଲି କିଛି ପଚାରୁଛନ୍ତି।
ତେବେ ବିବାହ ପାଇଁ ବୁମ୍ରା ଇଂଲଣ୍ଡ ବିପକ୍ଷ ୪ର୍ଥ ଟେଷ୍ଟ ପୂର୍ବରୁ ଛୁଟି ନେଇଥିଲେ। ଗୋଆରେ ମାର୍ଚ୍ଚ ୧୫ରେ ଉଭୟ ବିବାହ କରିଥିଲେ। ଏଥିରେ କେବଳ ପରିବାର ତଥା ନିକଟ ସମ୍ପର୍କୀୟମାନେ ଯୋଗଦେଇଥିଲେ।