ବମ୍ବେ: ବଲିଉଡ୍ର ମୁନ୍ନାଭାଇ କହିଲେ ଅଭିନେତା ସଞ୍ଜୟ ଦତ୍ତଙ୍କୁ ବୁଝାଯାଏ। ୮୦ ଦଶକରୁ ଅଭିନୟ ଦୁନିଆରେ ଆକ୍ଟିଭ୍ ଥିବା ସଞ୍ଜୁ ବାବା ନିଜର କର୍ମ, ବ୍ୟକ୍ତିଗତ ଏବଂ ବିବାଦକୁ ନେଇ ସବୁବେଳେ ରହିଥାନ୍ତି ଚର୍ଚ୍ଚାରେ। ଆଜି ସେ ତାଙ୍କର ୬୨ତମ ଜନ୍ମଦିନ ପାଳନ କରୁଥିବା ବେଳେ ତାଙ୍କ ନିକଟକୁ ଶୁଭେଚ୍ଛାର ସୁଅ ଛୁଟୁଛି।
୧୯୮୧ରେ ଫିଲ୍ମ ‘ରକି’ରୁ ଡେବ୍ୟୁ କରିଥିଲେ ସଞ୍ଜୟ। ଏହାପରେ ସେ ଶହେରୁ ଅଧିକ ଫିଲ୍ମରେ କାମ କରି ସାରିଲେଣି। ଅଭିନେତା ହେବା ସାଙ୍ଗକୁ ସେ ଜଣେ ପ୍ରଯୋଜକ ମଧ୍ୟ। ତାଙ୍କର ନିଜର ପ୍ରଯୋଜନା ସଂସ୍ଥା ସଞ୍ଜୟ ଦତ୍ତ ପ୍ରଡକ୍ସନ ପ୍ରାଇଭେଟ୍ ଲିମିଟେଡ୍ ରହିଛି। ମୋଟ ସମ୍ପତ୍ତି ଦେଖିଲେ ଅଭିନେତା ୧୩୭ କୋଟି ସମ୍ପତ୍ତିର ମାଲିକ। ଗୋଟିଏ ଫିଲ୍ମ ପାଇଁ ସେ ଛଅରୁ ଆଠ କୋଟି ଟଙ୍କା ପାଉଣା ନେଇଥାନ୍ତି। ଏହାଛଡ଼ା ସେ ଅନେକ ବିଜ୍ଞାପନରୁ ଆୟ ମଧ୍ୟ କରିଥାନ୍ତି।
ମୁମ୍ବାଇରେ ଅନେକ ଘର ରହିଛି ସଞ୍ଜୁବାବାଙ୍କର। ନରଗିସ ଦତ୍ତ ରୋଡ୍ ପାଲି ହିଲ୍ସରେ ତାଙ୍କର ଏକ ଭବ୍ୟ ବଙ୍ଗଳା ରହିଛି। ୨୦୦୯ରେ ଏହି ଘରକୁ କିଣିଥିଲେ ସେ। ଏବେ ଏହି ଘରର ମୂଲ୍ୟ ୪୦ କୋଟି ହେବ ବୋଲି କୁହାଯାଏ। ଦାମୀ ଗାଡ଼ିର ମଧ୍ୟ ମାଲିକ ସଞ୍ଜୟ ଦତ୍ତ। ତାଙ୍କ ପାଖରେ ଦଶରୁ ଅଧିକ କାର୍ ରହିଛି। ଏମାନଙ୍କର ମୂଲ୍ୟ କୋଟିରେ।
ଆଗାମୀ ଦିନରେ ରିଲିଜ ବିଷୟରେ କଥା ହେଲେ ସଞ୍ଜୟ ଏବେ ଫିଲ୍ମ ‘ଭୁଜ ଦ ପ୍ରାଇଡ୍ ଅଫ୍ ଇଣ୍ଡିଆ’ରେ ନଜର ଆସିବେ। ଫିଲ୍ମରେ ସେ ୧୯୬୫ ଏବଂ ୭୧ରେ ଭାରତ-ପାକିସ୍ତାନ ଯୁଦ୍ଧ ସମୟର ହିରୋ ରଣଛୋଡ଼ ଦାଶ ପାଗୀଙ୍କ ଭୂମିକାରେ ନଜର ଆସିବେ।