ହାଇଦ୍ରାବାଦ୍,୯।୫: ଲକ୍ଷ୍ନୌ ସୁପର ଜିଆଣ୍ଟସକୁ ସନରାଇଜର୍ସ ହାଇଦ୍ରାବାଦ ଏକ ପରାଜୟ ଦେଇଥିଲା। ଏହି ପରାଜୟ ପରେ ସୋସିଆଲ ମିଡିଆରେ ଫଟୋ ଏବଂ ଭିଡିଓ ଭାଇରାଲ ହେବାରେ ଲାଗିଛି। ଲକ୍ଷ୍ନୌ ସୁପର ଜିଆଣ୍ଟସ ମାଲିକ ସଞ୍ଜୀବ ଗୋଏଙ୍କା ଏବଂ ଅଧିନାୟକ କେ.ଏଲ ରାହୁଲ ସୋସିଆଲ ମିଡିଆରେ ଭାଇରାଲ ଭିଡିଓରେ ନଜର ଆସିଛନ୍ତି। ଏହି ଫଟୋରେ ସନରାଇଜର୍ସ ହାଇଦ୍ରାବାଦ ବିପକ୍ଷରେ ପରାଜୟ ପରେ ସଞ୍ଜୀବ ଗୋଏଙ୍କା କେ.ଏଲ ରାହୁଲଙ୍କ ଉପରେ ପାଟି କରୁଥିବା ଜଣାପଡିଛି। ଏଥି ସହିତ ଲକ୍ଷ୍ନୌ ସୁପର ଜିଆଣ୍ଟସ ଅଧିନାୟକ କେ.ଏଲ ରାହୁଲ ଶାନ୍ତ ଭାବରେ ସଞ୍ଜୀବ ଗୋଏଙ୍କାଙ୍କ କଥା ଶୁଣୁଛନ୍ତି।
କିନ୍ତୁ ଲକ୍ଷ୍ନୌ ସୁପର ଜିଆଣ୍ଟସ ମାଲିକ ସଞ୍ଜୀବ ଗୋଏଙ୍କାର ମୋଟ ସମ୍ପତ୍ତି ଜାଣିଛନ୍ତି କି? ସଞ୍ଜୀବ ଗୋଏଙ୍କା କୋଲକାତାରେ ଜନ୍ମଗ୍ରହଣ କରିଥିଲେ, ସେ ଏଠାରେ ବଢିଥିଲେ। ସଞ୍ଜୀବ ଗୋଏଙ୍କାଙ୍କ ସମ୍ପତ୍ତି ମୂଲ୍ୟ ପ୍ରାୟ ୩.୪ ବିଲିୟନ ଡଲାର ଅଟେ। ଏହା ବ୍ୟତୀତ ଚଳିତ ବର୍ଷ ଫୋର୍ବସ ସଞ୍ଜୀବ ଗୋଏଙ୍କାଙ୍କୁ ୯୪୯ ନମ୍ବରରେ ସ୍ଥାନିତ କରିଛି। ସଞ୍ଜୀବ ଗୋଏଙ୍କା ଆରପିଏସଜି କମ୍ପାନୀର ଚେୟାରମ୍ୟାନ ଅଟନ୍ତି।
ଆଇପିଏଲ ଦଳ ଲକ୍ଷ୍ନୌ ସୁପର ଜିଆଣ୍ଟସ ବ୍ୟତୀତ ସଞ୍ଜୀବ ଗୋଏଙ୍କା ପ୍ରସିଦ୍ଧ ଫୁଟବଲ ଦଳ ମୋହନ ବାଗାନର ମାଲିକ ଅଟନ୍ତି। ସଞ୍ଜୀବ ଗୋଏଙ୍କାର ଆରପିଏସଜି କମ୍ପାନୀରେ ୫୦ ହଜାରରୁ ଅଧିକ କର୍ମଚାରୀ ଅଛନ୍ତି। ଭାରତ ବ୍ୟତୀତ ଏହି କମ୍ପାନୀ ବିଶ୍ୱରେ କାର୍ବନ ବ୍ଲାକ, ପାୱାର, ଆଇଟି, ଖୁଚୁରା ଉତ୍ପାଦ, ମିଡିଆ ମନୋରଞ୍ଜନ, କ୍ରୀଡା, ଶିକ୍ଷା ଏବଂ ଭିତ୍ତିଭୂମିରେ ବ୍ୟବସାୟ କରିଥାଏ। ସଞ୍ଜୀବ ଗୋଏଙ୍କା ଆଇଆଇଟି ଖଡଗପୁରର ବୋର୍ଡ ସଦସ୍ୟ ଭାବରେ ମଧ୍ୟ କାର୍ଯ୍ୟ କରିଛନ୍ତି।