ହରାରେ,୧୦।୭: ଟି୨୦ ବିଶ୍ୱକପ୍ ୨୦୨୪ର ଟୁର୍ନାମେଣ୍ଟ ଜିତିଥିବା ଟିମ୍ର ଅଂଶ ଥିବା ଉଇକେଟକିପର ବ୍ୟାଟ୍ସମ୍ୟାନ୍ ସଞ୍ଜୁ ସାମସନଙ୍କ ପାଇଁ ଜିମ୍ବାଓ୍ବେ ବିପକ୍ଷ ୫ ମ୍ୟାଚ୍ ବିଶିଷ୍ଟ ଟି୨୦ ସିରିଜର ତୃତୀୟ ମୁକାବିଲା ସ୍ମରଣୀୟ ହୋଇଛି। ସିରିଜର ଅନ୍ତିମ ୩ ମ୍ୟାଚ୍ ଲାଗି ଦଳରେ ସାମିଲ ହୋଇଥିବା ସଞ୍ଜୁଙ୍କୁ ୩ୟ ଟି୨୦ ମୁକାବିଲା ପାଇଁ ଟିମ୍ର ଉପଅଧିନାୟକ ନିଯୁକ୍ତ କରାଯାଇଛି। ତେବେ କ୍ୟାରିୟରରେ ପ୍ରଥମ ଥର ପାଇଁ ସେ ଏଭଳି ଉପଲବ୍ଧି ହାସଲ କରିଛନ୍ତି।
୩ୟ ଟି୨୦ ମୁକାବିଲା ପାଇଁ ଭାରତୀୟ ଟିମ୍ରେ ୩ ପରିବର୍ତ୍ତନ ହୋଇଛି। ସଞ୍ଜୁ ସାମସନ, ଯଶସ୍ବୀ ଜୈସଓ୍ବାଲ, ଶିବମ ଦୁବେଙ୍କୁ ଏକାଦଶରେ ସୁଯୋଗ ମିଳିଛି। ସେମାନଙ୍କୁ ଧ୍ରୁବ ଜୁରେଲ, ସାଇ ସୁଦର୍ଶନ ଏବଂ ମୁକେଶ କୁମାରଙ୍କ ସ୍ଥାନ ମିଳିଛି। ଟିମ୍ର କୋଚ୍ ଭିଭିଏସ୍ ଲକ୍ଷ୍ମଣ ପ୍ଲେଇଂ-୧୧ର ଆଧିକାରୀକ ତାଲିକା ଜାରି କରିଛନ୍ତି। ସେଥିରେ ସଞ୍ଜୁ ସାମସନଙ୍କୁ ଉଇକେଟକିପର ବ୍ୟାଟ୍ସମ୍ୟାନ ଏବଂ ଦଳର ଉପଅଧିନାୟକ କରାଯାଇଛି। ଏବେ ସିରିଜର ବାକି ମ୍ୟାଚ୍ରେ ସାମସନ ଉପଅଧିନାୟକ ହେବେ।
କହିରଖୁଛୁ, ଟି୨୦ ବିଶ୍ୱକପ୍ ୨୦୨୪ରେ ସାମସନଙ୍କୁ ମ୍ୟାଚ ଖେଳିବାର ସୁଯୋଗ ମିଳି ନ ଥିଲା। ହେଲେ ଟୁର୍ନାମେଣ୍ଟ ଜିତିବା ପରେ ସାମସନ ସ୍ବଦେଶ ଫେରି ବିଭିନ୍ନ କାର୍ଯ୍ୟକ୍ରମରେ ସାମିଲ ହୋଇ ଜିମ୍ବାଓ୍ବେ ଗସ୍ତ କରିଛନ୍ତି। ପ୍ରଥମ ୨ ଟି୨୦ ମୁକାବିଲାରେ ବିସିସିଆଇ ଟିମ୍ରେ ପରିବର୍ତ୍ତନ କରିଥିଲା। ଏବେ ତୃତୀୟ ମ୍ୟାଚ୍ରେ ସାମସନଙ୍କୁ ଖେଳିବାର ସୁଯୋଗ ମିଳିଛି।