ରାୟଗଡ଼ା ଅଫିସ/ଗୁଣପୁର୨୫ା୧: ଅବିଭକ୍ତ କୋରାପୁଟ ଜିଲାର ପରିଚିତ ନାମ ଶାନ୍ତି ଦେବୀ। ଦୀର୍ଘ ୭ ଦଶନ୍ଧି ଧରି ସେ ନିଜକୁ ସମାଜସେବା କ୍ଷେତ୍ରରେ ସମର୍ପଣ କରିଛନ୍ତି। ସେ ସମ୍ମାନଜନକ ପଦ୍ମଶ୍ରୀ ଉପାଧି ପାଇଁ ଯୋଗ୍ୟ ବିବେଚିତ ହୋଇଛନ୍ତି। ୮୭ ବର୍ଷୀୟା ଶାନ୍ତି ଦେବୀଙ୍କୁ ଏ ନେଇ ଗୃହ ବିଭାଗ ପକ୍ଷରୁ ଫୋନ୍ କଲ୍ ମାଧ୍ୟମରେ ସୂଚନା ଦିଆଯାଇଛି। ୧୯୩୪ ଏପ୍ରିଲ ୧୮ରେ ଜନ୍ମ ଗ୍ରହଣ କରିଥିବା ଶାନ୍ତି ଦେବୀ ବିନୋବା ଭାବେଙ୍କ ଆଦର୍ଶରେ ଅନୁପ୍ରାଣିତ ହୋଇ ୧୭ ବର୍ଷ ବୟସରେ ଭୂଦାନ ଆନ୍ଦୋଳନରେ ସାମିଲ ହେବା ପାଇଁ ସ୍ବାମୀ ସାମାଜିକ କର୍ମୀ ରତନ ଦାଶଙ୍କ ସହ କୋରାପୁଟ ଜିଲାକୁ ଆସିଥିଲେ। ଏବେ ସେ ଗୁଣପୁର ସହରରେ ରହୁଛନ୍ତି। ଆଦିବାସୀ ପିଲାଙ୍କ ଲାଳନ ପାଳନ, ଶିକ୍ଷା ଏବଂ କୁଷ୍ଠରୋଗୀଙ୍କ ସେବାରେ ସେ ନିଜକୁ ଉତ୍ସର୍ଗ କରିଛନ୍ତି। ୧୯୫୫ରେ ବିନୋବା ଭାବେଙ୍କ ସହ ଭୂଦାନ ଆନ୍ଦୋଳନରେ ସାମିଲ ହୋଇଥିଲେ। ସେ କୋରାପୁଟିଆ ଗାନ୍ଧୀ ଭାବେ ମଧ୍ୟ ପରିଚିତ। ସେବା ସମାଜ ନାମରେ ସେ ଅନାଥାଶ୍ରମ କରି ଅନେକ ଆଦିବାସୀ ଝିଅଙ୍କୁ ଆଣି ଶିକ୍ଷା ଦେଇ ସମାଜର ମୁଖ୍ୟସ୍ରୋତରେ ସାମିଲ କରିଛନ୍ତି। ରାୟଗଡ଼ା ଜିଲାର ଲିମାପଡ଼ା, ଜଭରଗୁଡ଼ା, ଗୁଣପୁର ଓ ରାୟଗଡ଼ା ସହରରେ ୪ ବାଳିକା ଆଶ୍ରମ କରିଛନ୍ତି। ବିନୋବା ଭାବେଙ୍କ ଜୀବନକୁ ନେଇ ‘ଅହିଂସାର ଅନ୍ବେଷଣ’ ନାମକ ପୁସ୍ତକ ମଧ୍ୟ ରଚନା କରି ସେ ଅନେକ ପୁରସ୍କାର ମଧ୍ୟ ପାଇଛନ୍ତି। ୧୯୫୧ରେ ବିବାହ ପରେ ଦମ୍ପତି କୋରାପୁଟସ୍ଥିତ ଖମ୍ବେସୁ ଶଙ୍କଳପଦର ଆଦିବାସୀ ଗ୍ରାମରେ ଏକ ଆଶ୍ରମ ସ୍ଥାପନ କରିଥିଲେ। ଅନାଥ ଶିଶୁ କନ୍ୟା ଏବଂ ଅସହାୟ ମହିଳାଙ୍କ ଉନ୍ନତି ନିମନ୍ତେ ସେ କାର୍ଯ୍ୟ କରୁଥିଲେ। ପଦ୍ମଶ୍ରୀ ସମ୍ମାନ ନେଇ ଶାନ୍ତି ଦେବୀ ଖୁସି ବ୍ୟକ୍ତ କରିଛନ୍ତି। ତେବେ ଏହା ବହୁ ପୂର୍ବରୁ ହେବାର ଥିଲା ବୋଲି ସେବା ସମାଜର ସମ୍ପାଦିକା ରାଜେଶ୍ୱରୀ ଦଳେଇ କହିଛନ୍ତି। ଏହି ଖବର ଜଣାପଡ଼ିବା ପରେ ବହୁ ମାନ୍ୟଗଣ୍ୟ ବ୍ୟକ୍ତି ଶାନ୍ତି ଦେବୀଙ୍କୁ ଶୁଭେଚ୍ଛା ଜଣାଇଛନ୍ତି।