କେନ୍ଦୁଝର, ୨୯।୧(ସ୍ବ.ପ୍ର.)-କେନ୍ଦୁଝର ସଦର ବ୍ଲକ ନେକଡା ଘର (ଜାମୁନାଳିଆ) ନିକଟରେ ଜାତୀୟ ରାଜପଥ ୨୦ କଡ଼ରେ ରହିଛି ପ୍ରକୃତିଦତ୍ତ ସାପଲତା ପଥର ଚଟାଣ ା ଏହ ପଥର ଚଟାଣ ପ୍ରାୟ ୨୫ ଏକର ପରିମିତ ଅଞ୍ଚଳ ବ୍ୟାପିଥିବା କୁହାଯାଉଛି। ତେବେ ଏହି ଚଟାଣ ଚାରିପଟେ ରହିଛି ଶାଳ ଜଙ୍ଗଲ। ଏଠାରେ ରହିଛି ସାପଲତେଶ୍ୱର ମହାଦେବ ଦେବସ୍ଥଳୀ ା ଏଠାରେ ଥିବା ପ୍ରାୟ ୨୦ ଫୁଟ ଉଚ୍ଚ ସାପ ଫଣା ଆକୃତିର ପଥର ଏବଂ ଚଟାଣ ଉପରେ ଥିବା ଗୁମ୍ଫା ପ୍ରମୁଖ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି। କୁହାଯାଏ ଏହି ପଥର ତଳେ ଏକ ବିଶାଳ କାୟ ସାପ ରହିଛି। ଉକ୍ତ ଅଞ୍ଚଳର ସୁରକ୍ଷା ପାଇଁ ଏଠାରେ ରହି ପଥର ପାଲଟି ଯାଇଥିବା ପୁରୁଣା ଲୋକଙ୍କ ବିଶ୍ୱାସ ରହିଛି ା ତେବେ ଏହାର ପ୍ରାକୃତିକ ସୌନ୍ଦର୍ଯ୍ୟ ଏବଂ ଏହା ଚାରିପାଖରେ ଥିବା ଜଙ୍ଗଲର ବଳୟ ପରିବେଶକୁ ଅଧିକ ସୌନ୍ଦର୍ଯ୍ୟମୟ କରିଥାଏ। ଏହି ଜଙ୍ଗଲର ସୁରକ୍ଷା ପାଇଁ ଗ୍ରାମବାସୀ ବହୁ ବର୍ଷ ଧରି ଲାଗିରହିଛନ୍ତି ା ଏଣୁ ଏହି ସ୍ଥାନର ସୁରକ୍ଷା ପାଇଁ ସ୍ଥାନୀୟ କଳା ଓ ସଂସ୍କୃତି ରୁଚି ରଖିଥିବା ବ୍ୟକ୍ତିଙ୍କୁ ନେଇ ଏକ କମିଟି ଗଠନ କରାଯାଇଛି ା ଏହା ଚାରିପାଖରେ ବହୁ ଛୋଟ ଛୋଟ ଗୁମ୍ଫା ରହିଛି। ଏହି ସ୍ଥାନଟି ବୁଲିବା ସହ ଭୋଜିଭାତ କରିବା ପାଇଁ ପ୍ରକୃଷ୍ଟ ସ୍ଥାନ ହୋଇଥିବାରୁ ଏହାକୁ ପର୍ଯ୍ୟଟନ କ୍ଷେତ୍ରର ମାନ୍ୟତା ଦେବାକୁ ଦାବି କରାଯାଇଛି। ଏହି ସ୍ଥାନରେ ଔଷଧୀୟ ବୃକ୍ଷ ରୋପଣ କରିବା ସହ ଉନ୍ନତୀକରଣ କରାଗଲେ ଏକ ଭଲ ପ୍ରାକୃତିକ ପର୍ଯ୍ୟଟନ କେନ୍ଦ୍ରରେ ପରିଣତ ହୋଇ ପାରିବ ଏବଂ ଏହା ଦ୍ୱାରା ସ୍ଥାନୀୟ ଅଞ୍ଚଳବାସୀ ରୋଜଗାର ପାଇବା ସହ ପରିବେଶର ସୁରକ୍ଷା ହୋଇପାରିବ ବୋଲି କବିରାଜ ବିଶାରଦ ହରେକୃଷ୍ଣ ମହାନ୍ତ କହିଛନ୍ତି। ସେହିପରି ଏହାକୁ ଇକୋ-ଟୁରିଜିମର ମାନ୍ୟତା ଦେବାକୁ କମିଟିର ସଭାପତି ନିରଞ୍ଜନ ମହାକୁଡ, ସମ୍ପାଦକ ପ୍ରସନ୍ନ କୁମାର ଦାସ, ଭାଗବତ ମହାକୁଡ, ପ୍ରହଲ୍ଲାଦ ଜେନା ପ୍ରମୁଖ ଦାବି କରିବା ସହ ଏହାର ବିକାଶ କରିବାକୁ ଡିଏଫ୍ଓ କେନ୍ଦୁଝର ଓ ଜିଲା ସଂସ୍କୃତି ତଥା ପର୍ଯ୍ୟଟନ ଅଧିକାରୀ ରମେଶ ଚନ୍ଦ୍ର ନାୟକଙ୍କୁ ନିବେଦନ କରିଛନ୍ତି ା