ରାୟଗଡ଼ା,୨୯।୨(ଆଶିଷ ରଞ୍ଜନ ପଣ୍ଡା): କୋରାପୁଟ ଏମ୍ପି ସପ୍ତଗିରି ଶଙ୍କର ଉଲାକା ବୁଧବାର ଦିଲ୍ଲୀରେ ଏଆଇସିସି ସଭାପତି ମଲିକାର୍ଜୁନ ଖାର୍ଗେଙ୍କୁ ସାକ୍ଷାତ କରିଛନ୍ତି। ଆସନ୍ତା ନିର୍ବାଚନ ପ୍ରଚାର ପାଇଁ ଖାର୍ଗେ ରାୟଗଡ଼ା ଓ କୋରାପୁଟ ଜିଲା ଗସ୍ତରେ ଆସିବା ପାଇଁ ସପ୍ତଗିରି ତାଙ୍କୁ ନିମନ୍ତ୍ରଣ କରିଛନ୍ତି ।
କୋରାପୁଟ ଲୋକ ସଭା ଆସନ ପାଇଁ କଂଗ୍ରେସରୁ ୧୨ଜଣ ଆଶାୟୀ ପ୍ରାର୍ଥୀ ଅନ୍ଲାଇନରେ ଆବେଦନ କରିଥିଲେ । ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁସାରେ ସପ୍ତଗିରିଙ୍କୁ ପୁଣି ରିପିଟ୍ କରିବ ଦଳ । ଯେଉଁମାନେ ଅନ୍ଲାଇନ ଆବେଦନ କରିଥିଲେ, ସମସ୍ତଙ୍କୁ ପଛରେ ପକାଇ ସପ୍ତଗିରିଙ୍କ ଉପରେ ଦଳୀୟ ହାଇକମାଣ୍ଡ ମୋହର ଲଗାଇଥିବା ଚର୍ଚ୍ଚା ହେଉଛି। ସେହିଭଳି ରାୟଗଡ଼ା ବିଧାନସଭା ଆସନରୁ ୧୧ଜଣ ଆଶାୟୀ ଆବେଦନ କରିଥିଲେ ହେଁ ଆପଲସ୍ବାମୀ କାଡ୍ରାକାଙ୍କୁ ପୁଣି ଦଳ ରିପିଟ୍ କରିପାରେ ବୋଲି ଶୁଣିବାକୁ ମିଳୁଛି। ବିଷମକଟକ ବିଧାନସଭା ଆସନରୁ ୨ ଆଶାୟୀ ପ୍ରାର୍ଥୀ ଅଛନ୍ତି। ସେ ୨ ଜଣ ହେଲେ, ଗତ ସାଧାରଣ ନିର୍ବାଚନରେ ବିଧାୟକ ପ୍ରାର୍ଥୀ ନୀଳମାଧବ ହିକ୍କା ଓ ପୂର୍ବତନ ମନ୍ତ୍ରୀ ଡମ୍ବରୁଧର ଉଲାକାଙ୍କ ପୁଅ ନୀଳମାଧବ ଉଲାକା। ତେବେ ଦଳ ପୁଣି ଥରେ ନୀଳମାଧବ ହିକ୍କାଙ୍କୁ ରିପିଟ୍ କରିବା ନେଇ ଦଳୀୟ ସ୍ତରରେ ଚର୍ଚ୍ଚା ହେଉଛି। ଏଭଳିକି ଏହି ୩ ଜଣଙ୍କୁ ପ୍ରଚାର ପାଇଁ ମୈଦାନରେ ଓହ୍ଲାଇବାକୁ ଦଳ ପକ୍ଷରୁ ସବୁଜ ସଙ୍କେତ ମିଳିଥିବା ମଧ୍ୟ ଶୁଣିବାକୁ ମିଳୁଛି । ତେବେ ଗୁଣପୁର ବିଧାନସଭା ଆସନ ପାଇଁ ୭ ଜଣ ଆଶାୟୀ ରହିଥିବା ବେଳେ ବର୍ତ୍ତମାନ ସୁଦ୍ଧା ପ୍ରାର୍ଥୀ ଚୟନ ହୋଇପାରିନାହିଁ । ଅନେକ ଆଶାୟୀ ରହିଥିବା ଯୋଗୁଁ ଦ୍ୱନ୍ଦ୍ୱରେ ଦଳୀୟ ନେତା ପଡ଼ିଛନ୍ତି । ଏଭଳିକି ଗମାଙ୍ଗ ପରିବାରର ଜଣକୁ ଟିକେଟ ପାଇଁ ଛକାପଞ୍ଝା ଲାଗି ରହିଛି । ତେବେ ଗୁଣପୁର ପାଇଁ ମଧ୍ୟ ଶୀଘ୍ର ଦଳ ପକ୍ଷରୁ ପ୍ରାର୍ଥୀଙ୍କ ନାମ ଘୋଷଣା କରାଯିବ ବୋଲି ବିଶ୍ୱସ୍ତ ସୂତ୍ରରୁ ସୂଚନା ମିଳିଛି । ତେବେ ଏ ନେଇ ଦଳ ପକ୍ଷରୁ କୌଣସି ବିଧିବଦ୍ଧ ଘୋଷଣା ହୋଇ ନ ଥିବା ବେଳେ ଏମ୍ପି ସପ୍ତଗିରିଙ୍କ ସହିତ ଯୋଗାଯୋଗ ସମ୍ଭବପର ହୋଇପାରିନାହିଁ ।