ସରଣ୍ଡା/ସୋହେଲା,୧୬।୨(ଯୁଧିଷ୍ଠିର ମହାପାତ୍ର/ଅଶ୍ୱିନି ପାତ୍ର): ବରଗଡ଼ ଜିଲା ସରଣ୍ଡା ଗ୍ରାମର ଯୁବ ଡାକ୍ତର ମେଘନାଦ ମେହେରଙ୍କୁ ଅହମଦାବାଦଠାରେ ମଧୁମେହରେ ଫେଲୋଶିପ ସମ୍ମାନରେ ସମ୍ମାନିତ କରାଯାଇଛି। ମଧୁମେହ ଭାରତର ବାର୍ଷିକ ସମ୍ମିଳନୀରେ ପଦ୍ମଶ୍ରୀ ଡା. ଭି .ମୋହନ ମେଘନାଦଙ୍କୁ ସମ୍ମାନିତ କରିଛନ୍ତି।
ଗୁରୁବାର ଅହମଦାବାଦରେ ୧୫ତମ ବିଶ୍ୱ ଡାଇବେଟିସ୍ ଇଣ୍ଡିଆ ସମ୍ମିଳନୀରେ ଏକ ସମାବର୍ତ୍ତନ ସମାରୋହ ଅନୁଷ୍ଠିତ ହୋଇଥିଲା। ଏହି ସମୟରେ ଡା. ମେଘନାଦଙ୍କ ପ୍ରତିବଦ୍ଧତା ଏବଂ ମଧୁମେହ ଯତ୍ନ ଏବଂ ଗବେଷଣାକୁ ଆଗକୁ ବଢ଼ାଇବାର ଅବଦାନକୁ ସ୍ବୀକୃତି ପ୍ରଦାନ କରାଯାଇ ଏହି ସମ୍ମାନରେ ସମ୍ମାନିତ କରାଯାଇଛି। ମେଘନାଦ ବର୍ତ୍ତମାନ ଭୁବନେଶ୍ୱର ସମ୍ ହସ୍ପିଟାଲରେ ମେଡିସିନ ବିଭାଗ ଆସିଷ୍ଟାଣ୍ଟ ପ୍ରଫେସର ଭାବେ ରୋଗୀଙ୍କ ସେବା କରୁଛନ୍ତି l କିନ୍ତୁ ନିଜ ଜନ୍ମମାଟି ଲୋକ ଯେପରି ଚିକିତ୍ସାରୁ ବଞ୍ଚିତ ନ ହେବେ ସେଥିପାଇଁ ତାଙ୍କ ମା’ଙ୍କ ନଁାରେ ସ୍ବାସ୍ଥ୍ୟ ସଚେତନ କେନ୍ଦ୍ର ନାମରେ ଏକ କ୍ଲିନିକ ଖୋଲିଛନ୍ତି। ସେଠାରେ ମାଗଣାରେ ଲୋକଙ୍କୁ ଚିକିତ୍ସା ସେବା ଯୋଗାଉଛନ୍ତି। ସେ ଗାଁ ସ୍କୁଲରେ ହିଁ ଦଶମ ପର୍ଯ୍ୟନ୍ତ ପାଠ ପଢ଼ିଥିଲେ। ପରେ ବୁର୍ଲାର ବୀର ସୁରେନ୍ଦ୍ର ସାଏ ମେଡିକାଲ କଲେଜ ଓ କଟକରେ ଡାକ୍ତରୀ ପାଠ ପଢ଼ି ଡିଗ୍ରୀ ଅର୍ଜନ କରିଥିଲେ। ଭୁବନେଶ୍ବର ଏମ୍ସରେ ୩ ବର୍ଷ ଚାକିରି କଲାପରେ ଏବେ ସମ୍ ହସ୍ପିଟାଲରେ କାର୍ଯ୍ୟରତ ଅଛନ୍ତି। ଡା. ମେହେର ୨୦୨୪ ଅଗଷ୍ଟ ୧୮ ତାରିଖ ପ୍ରାରମ୍ଭିକ କ୍ୟାରିୟର ଡାକ୍ତର ପୁରସ୍କାର (ଇସିପି ଆୱାର୍ଡ ) ଏବଂ ୨୦୨୩ ସେପ୍ଟେମ୍ବର ୨୩ ତାରିଖ ଏସିପି ଆୱାର୍ଡରେ ସମ୍ମାନିତ ହୋଇଛନ୍ତି l
