କେନ୍ଦୁଝର,୬।୬(ସ୍ବ.ପ୍ର): କେନ୍ଦୁଝର ସଦର ବ୍ଲକ ଅନ୍ତର୍ଗତ ବରଦାପାଳ ପଞ୍ଚାୟତ ସମାଜସେବୀ ତଥା ଯୁବ ସରପଞ୍ଚ ଶ୍ରମିକଙ୍କ ସାଧିରେ ମନରେଗା କାମ କରି କେନ୍ଦୁଝର ଜିଲାରେ ଚର୍ଚ୍ଚାକୁ ଆସିଥିଲେ। ଏବେ ହାଣ୍ତିଭଙ୍ଗା ପଞ୍ଚାୟତର ସରପଞ୍ଚ ପୂର୍ଣ୍ଣମୀ ସର୍ଦ୍ଧାର ଶ୍ରମିକଙ୍କ ସାଥିରେ ମନରେଗା କାମ କରି ଜିଲା ତଥା ଅଞ୍ଚଳରେ ଚର୍ଚ୍ଚିତ ହୋଇଛନ୍ତି। ପୂର୍ଣ୍ଣମୀ ଜଣେ କ୍ଷୁଦ୍ର ପରିବାରର ମହିଳା। ସେ ଦିନ ମଜୁରୀ କରି ଚଳୁଥିଲେ। ବିପୁଜ ଜନସମର୍ଥନ ମିଳିବା ପରେ ସେ ଚଳିତ ବର୍ଷ ସାଧାରଣ ନିର୍ବାଚନ ଲଢି ବିପୁଳ ସଂଖ୍ୟାରେ ବିଜୟୀ ହୋଇଛନ୍ତି। ବିଜୟୀ ହେବା ପରେ ହାଣ୍ତିଭଙ୍ଗା ପଞ୍ଚାୟତ ଅଞ୍ଚଳରେ ଉନ୍ନତି ମୂଳକ କାର୍ଯ୍ୟ ଜାରି ରଖିଛନ୍ତି। ଏଥିପାଇଁ ପୂର୍ଣ୍ଣମୀ ପୂର୍ବରୁ ସଦର ବିଡିଓ ନୁପୂରଚାନ୍ଦ ଗୋଟିଆଙ୍କ ଠାରୁ ସମ୍ବର୍ଦ୍ଧିତ ହୋଇଛନ୍ତି। ତାଙ୍କ ସ୍ବାମୀ ନଟବର ସର୍ଦାର କହିଛନ୍ତି, ସେ ବ୍ଲକର ଶ୍ରେଷ୍ଠ ସରପଞ୍ଚ ଭାବେ ପୂର୍ବରୁ ମନରେଗା ଯୋଜନାରେ ପୁରସ୍କୃତ ହୋଇଛନ୍ତି।
ଆଜି ସକାଳେ କାଠବାଉଶୁଳି ଠାରେ ଚାଲିଥିବା ମନରେଗା କାର୍ଯ୍ୟ ପରିଦର୍ଶନରେ ଯାଇଥିଲେ ପୂର୍ଣ୍ଣମୀ। ସେଠାରେ ଡହ ଡହ ପ୍ରଚଣ୍ତ ଖରାରେ ଶ୍ରମିକମାନେ କୋଦାଳ ଝୁଡି ଧରି କାମ କରୁଥିବା ଦେଖିବାକୁ ପାଇଥିଲେ। ଏହି ମୂହୁର୍ତ୍ତରେ ସେ ଶ୍ରମିକ ମାନଙ୍କୁ ଉତ୍ସାହିତ କରିବା ପାଇଁ ନିଜେ କୋଦାଳ ଧରି ମନରେଗା କାମ କରିଥିଲେ। ସବୁବେଳେ ନିଜ ପଞ୍ଚାୟତର ବିକାଶ କରିବା ପାଇଁ ଚେଷ୍ଟା କରୁଥିବା ପୂର୍ଣ୍ଣମୀଙ୍କୁ ଜନସାଧାରଣ ମଧ୍ୟ ସହଯୋଗ କରୁଛନ୍ତି।ଏହି ଘଟଣାକୁ ନେଇ ବିଭିନ୍ନ ମୋହଲରୁ ତାଙ୍କୁ ପ୍ରଶଂସାର ସୁଅ ଛୁଟୁଛି।