ଶାଢ଼ି ଏମିତି ଏକ ପରିଧାନ, ଯାହାକୁ ସବୁ ଅକେଜନ୍ରେ ପିନ୍ଧିହେବ। କିନ୍ତୁ କିଛିଦିନ ପିନ୍ଧିବା ପରେ ତାହା ପୁରୁଣା ହେବ ନଚେତ ଆଉଟ୍ ଅଫ୍ ଫ୍ୟାଶନ୍ ହୋଇଯିବ। ହେଲେ ଟିକେ ବୁଦ୍ଧି ଖଟାଇଲେ, ପୁରୁଣା କିମ୍ବା ଆଉଟ୍ ଅଫ୍ ଫ୍ୟାଶନ ହୋଇଯାଇଥିବା ଶାଢିକୁ ବି ରିସାଇକେଲ୍ କରି ତାହାକୁ ନୂଆ ଲୁକ୍ ଦେଇହେବ….
ପଟିଆଲା: ଯଦି ଆପଣଙ୍କ ପାଖେ ବ୍ରୋକେଟ୍, ସିଫନ୍ କିମ୍ବା କାଞ୍ଜିବରମ୍ର ପୁରୁଣା ଶାଢି ଅଛି, ତା’ହେଲେ ତାକୁ କୌଣସି ବୁଟିକ୍ କିମ୍ବା ଟେଲର୍ ପାଖକୁ ନେଇ ସେଥିରେ ପଟିଆଲା ପ୍ୟାଣ୍ଟ ତିଆରି କରିବାକୁ କୁହନ୍ତୁ। ଶର୍ଟ ଲେନ୍ଥ କମିଜ୍ ସହ ଏହି ପ୍ୟାଣ୍ଟ ଖୁବ୍ ସୁନ୍ଦର ଦେଖାଯାଇଥାଏ।
ଦୁପଟ୍ଟା: ଯେ କୌଣସି ପ୍ଲେନ୍ ସାଲଓ୍ବାର୍ କମିଜ୍ ସହିତ ହେବି ଓ୍ବାର୍କବାଲା ଦୁପଟ୍ଟା ବେଶ୍ ମାନିଥାଏ। ଯଦି ଆପଣଙ୍କ ପାଖେ କିଛି ହେବି ଓ୍ବାର୍କବାଲା ପୁରୁଣା ଶାଢି ଅଛି, ତା’ହେଲେ ସେଥିରେ ବି ଖୁବ୍ ସୁନ୍ଦର ଦୁପଟ୍ଟା ତିଆରି ହୋଇପାରିବ। କିନ୍ତୁ ଧ୍ୟାନ ରଖିବେ ଏଭଳି ଶାଢିରୁ ଦୁପଟ୍ଟା ତିଆରି କଲାବେଳେ ଶାଢିର ବର୍ଡର ଯେମିତି ଦୁପଟ୍ଟାର ଉଭୟ ପାର୍ଶ୍ୱରେ ରହୁଥିବ।
ସ୍କର୍ଟ: କଟନ୍ କିମ୍ବା ବର୍ଡର ବାଲା ଶାଢି ଅଥବା ପ୍ୟାଚ୍ କାମ ହୋଇଥିବା ପୁରୁଣା ଶାଢିରୁ ସ୍କର୍ଟ ତିଆରି କରି ପିନ୍ଧିଲେ ଆକର୍ଷଣୀୟ ଲାଗିଥାଏ। ବିଶେଷକରି ଏଥିରୁ ତିଆରି ଓ୍ବାର୍ପ ଆରାଉଣ୍ଡ ସ୍କର୍ଟ କିମ୍ବା ଏ ଲାଇନ୍ ସ୍କର୍ଟ ଖୁବ୍ ସୁନ୍ଦର ଦେଖାଯାଇଥାଏ।
କୁର୍ତ୍ତି: ପୁରୁଣା ଶାଢିକୁ ରିସାଇକେଲ୍ କରି ଯଦି ସବୁଠୁ ସହଜରେ କ’ଣ କରିହେବ, ତେବେ ତାହା ହେଉଛି କୁର୍ତ୍ତି ବା କୁର୍ତ୍ତା। ସିଫନ୍, ଜର୍ଜେଟ୍ ଅଥବା କଟନ୍ ଶାଢି ଏଥିପାଇଁ ପରଫେକ୍ଟ ହୋଇଥାଏ। କିନ୍ତୁ ଏହି କୁର୍ତ୍ତି ତିଆରି କଲାବେଳେ ଏଥିରେ ଲାଇନିଙ୍ଗ୍ ଦେବା ନିହାତି ଜରୁରୀ। କଣ୍ଟ୍ରାଷ୍ଟ କଲର୍ର ଟ୍ରାଉଜର୍ କିମ୍ବା ପ୍ଲାଜୋ ପ୍ୟାଣ୍ଟ ସହ ଏହି କୁର୍ତ୍ତି ବେଶ୍ ଭଲ ମାନିଥାଏ।
ବ୍ଲାଉଜ୍: ବ୍ଲାଉଜ୍ ତିଆରି ପାଇଁ ପୁରୁଣା ସିଲ୍କ ଶାଢି ଭଲ ହେବ। ହେଲେ ପୁରୁଣା ଜର୍ଜେଟ୍ ଓ ନେଟ୍ ଶାଢିରେ ତିଆରି ବ୍ଲାଉଜ୍ ସେତେଟା ଆକର୍ଷଣୀୟ ଲାଗି ନ ଥାଏ।
ଛୋଟ ଝିଅଙ୍କ ଡ୍ରେସ୍: ଶାଢିରେ ଛୋଟ ଝିଅଙ୍କ ପାଇଁ ବି ଖୁବ୍ ସୁନ୍ଦର ସୁନ୍ଦର ଡ୍ରେସ୍ ତିଆରି କରିହେବ। ଶାଢିରେ ତିଆରି ଘେରବାଲା ନି ଲେନ୍ଥ ଫ୍ରକ୍ ନଚେତ୍ ଅନାରକଲି ଝିଅମାନଙ୍କୁ ଖୁବ୍ ସୁନ୍ଦର ଲାଗିଥାଏ।
ସ୍କାର୍ଫ: ଶାଢିରେ ଅନାରକଲି କିମ୍ବା କୁର୍ତ୍ତି ତିଆରି କରିବା ପରେ ଯଦି ଆପଣଙ୍କ ପାଖେ ଆଉ କିଛି କପଡା ବଳି ପଡୁଛି, ତା’ହେଲେ ତାକୁ ନ ଫୋପାଡି, ସେଥିରେ ସ୍କାର୍ଫ କିମ୍ବା ଷ୍ଟୋଲ୍ ତିଆରି ମଧ୍ୟ କରିହେବ।
ପ୍ୟାଣ୍ଟ: ଯଦି ଆପଣଙ୍କ ପାଖେ ସିଲ୍କ ଶାଢି ଅଛି, ତା’ହେଲେ ଏଥିରେ ପ୍ୟାଣ୍ଟ ତିଆରି କରିପାରିବେ। ଖାସ୍ କରି ଶାଢିରୁ ତିଆରି ଷ୍ଟ୍ରେଟ୍ ପ୍ୟାଣ୍ଟକୁ କୁର୍ତ୍ତି ସହ ପିନ୍ଧିଲେ ସ୍ମାର୍ଟ ଲୁକ୍ ମିଳିଥାଏ।
ଜ୍ୟାକେଟ୍: ନିଜ ଲୁକ୍କୁ ଅଧିକ ଷ୍ଟାଇଲିଶ୍ କରିବା ପାଇଁ ଆପଣ ପୁରୁଣା ବ୍ରୋକେଟ୍ କିମ୍ବା ବନାରସୀ ଶାଢିରେ ଓ୍ବେଷ୍ଟ କୋଟ୍ ଅବା ଜ୍ୟାକେଟ୍ ତିଆରି କରି ପିନ୍ଧିପାରିବେ। ଏହାକୁ ଧଳାରଙ୍ଗର ସାଲଓ୍ବାର୍ କମିଜ, ଗ୍ରେ କଲର୍ର ଟପ୍ କିମ୍ବା ଡେନିମ୍ ଉପରେ ପିନ୍ଧିଲେ ସ୍ମାର୍ଟ ଲୁକ୍ ମିଳେ।