ଭୁବନେଶ୍ୱର,୭।୩(ବ୍ୟୁରୋ): ଆମ୍ ଆଦମୀ ପାର୍ଟି(ଆପ୍) ପକ୍ଷରୁ ଭୁବନେଶ୍ୱର ମହାନଗର ନିଗମ (ବିଏମ୍ସି) ମେୟର ପ୍ରାର୍ଥୀ ହେଲେ ସରୋଜିନୀ ଖୁଣ୍ଟିଆ। ରବିବାର ଭୁବନେଶ୍ୱରସ୍ଥିତ ରାଜ୍ୟ ଆପ୍ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ପାର୍ଟିର ରାଜ୍ୟ ସଂଯୋଜକ ନିଶିକାନ୍ତ ମହାପାତ୍ର ସରୋଜିନୀଙ୍କ ନାମକୁ ଘୋଷଣା କରିଛନ୍ତି। ନିଶିକାନ୍ତ କହିଛନ୍ତି, ସରୋଜିନୀ ଜଣେ ଗୃହିଣୀ ହୋଇଥିଲେ ମଧ୍ୟ ଇଣ୍ଡିଆ ଏଗେନ୍ଷ୍ଟ କରପ୍ଶନ ଅଭିଯାନରେ ସାମିଲ ଥିଲେ। ଏଥିସହ ଫାଇଲିନ ବାତ୍ୟା ସମୟରେ ବିଶ୍ୱବ୍ୟାଙ୍କଠାରୁ ଆସିଥିବା ଟଙ୍କାର ଅନିୟମିତତା ଅଭିଯୋଗରେ ସାତପଡାଠାରୁ ଭୁବନେଶ୍ୱର ପର୍ଯ୍ୟନ୍ତ ହୋଇଥିବା ପଦଯାତ୍ରା ତଥା ମଦମୁକ୍ତି ଅଭିଯାନ ଭଳି ବହୁ ସାମାଜିକ ତଥା ସମାଜ ସୁଧାର କାର୍ଯ୍ୟରେ ସରୋଜିନୀ ନିଜକୁ ସାମିଲ କରିଥିବା ନିଶିକାନ୍ତ କହିଛନ୍ତି।
ଆପ୍ ପକ୍ଷରୁ ବିଏମ୍ସି ନିର୍ବାଚନ ପାଇଁ ଏକ ଇସ୍ତାହାର ପତ୍ର ଜାରି କରାଯାଇଛି। ମହାନଗର ନିଗମ ଅଧୀନ ସ୍କୁଲ ଓ ଡାକ୍ତରଖାନା ସଂଖ୍ୟା ବୃଦ୍ଧି ସହ ଦିଲ୍ଲୀ ଢାଞ୍ଚାରେ ଅତ୍ୟାଧୁନୀକରଣ ଓ ପ୍ରଭାବୀ କରିବା, ବର୍ଦ୍ଧିତ ହୋଲ୍ଡିଂ ଟିକସ ଓ ଆବର୍ଜନା ଉଠାଣ ଦେୟ ପ୍ରତ୍ୟାହାର, ବର୍ଷାଜଳଜନିତ ବନ୍ୟାର ନିରାକରଣ, ଉଠା ଦୋକାନୀଙ୍କ ସମସ୍ୟା ସମାଧାନ ଆଦି ବହୁ ପ୍ରତିଶ୍ରୁତି ରହିଛି। ଏଥିପାଇଁ ପ୍ରତିବଦ୍ଧତା ଥିବା ମେୟର ପ୍ରାର୍ଥୀ ସରୋଜିନୀ ପ୍ରକାଶ କରିଛନ୍ତି।