କେନ୍ଦୁଝର,୧୫।୮(ସ୍ବ.ପ୍ର.): ପ୍ରଧାନମନ୍ତ୍ରୀ ଆବାସ ପ୍ରଦାନରେ ଅନିୟମିତତା ନେଇ କେନ୍ଦୁଝର ଜିଲା ତେଲକୋଇ ବ୍ଲକ ଅଧୀନ ସିରିଗିଡ଼ା ପଞ୍ଚାୟତରେ ରବିବାର ଉତ୍ତେଜନା ପ୍ରକାଶ ପାଇଛି। ସ୍ବାଧୀନତା ଦିବସ ପାଳନ ଅବସରରେ ପତାକା ଉତ୍ତୋଳନ ପାଇଁ ଆସିଥିବା ସରପଞ୍ଚଙ୍କୁ ପଞ୍ଚାୟତ କାର୍ଯ୍ୟାଳୟରେ ତାଲା ପକାଇ ଦେଇଥିଲେ ଲୋକେ। ପରେ ସେମାନେ କାର୍ଯ୍ୟାଳୟ ଆଗରେ ନାରାବାଜି କରି ପ୍ରତିବାଦ ଜଣାଇଥିଲେ।
ଅନିୟମିତତା ନେଇ କିଛିଦିନ ପୂର୍ବରୁ ସିରିଗିଡ଼ା ପଞ୍ଚାୟତର ଗରିବ ହିତାଧିକାରୀମାନେ ଜିଲା ପ୍ରଶାସନ ନିକଟରେ ଅଭିଯୋଗ କରିଥିଲେ ମଧ୍ୟ ଅଦ୍ୟାବଧି କୌଣସି ପଦକ୍ଷେପ ନିଆଯାଇ ନ ଥିବା ସେମାନେ ପ୍ରକାଶ କରିଛନ୍ତି। ସ୍ବାଧୀନତା ଦିବସରେ ପଞ୍ଚାୟତ କାର୍ଯ୍ୟାଳୟରେ ସପରଞ୍ଚ ଓ ଅଧିକାରୀ ସମସ୍ତେ ଉପସ୍ଥିତ ରହିଥିବା ଜାଣି ହିତାଧିକାରୀମାନେ ଆସି ପହଞ୍ଚିଥିଲେ। ସମସ୍ୟା ଜଣାଇବା ସମୟରେ ଅଧିକାରୀ ଜଣଙ୍କ ସେମାନଙ୍କୁ ଧକ୍କା ଦେଇ ସେଠାରୁ ପଳାଇଥିଲେ। ଫଳରେ ଲୋକେ ଉତ୍ତ୍ୟକ୍ତ ହୋଇ ସମସ୍ୟାର ସମାଧାନ ଲାଗି ସରପଞ୍ଚଙ୍କୁ କାର୍ଯ୍ୟାଳୟରେ ତାଲା ପକାଇ ଅନଶନରେ ବସିଥିବା ପ୍ରକାଶ କରିଥିଲେ। ଅନ୍ୟପକ୍ଷେ ଅନିୟମିତତାରେ ତାଙ୍କର କୌଣସି ଭୂମିକା ନ ଥିବା ସରପଞ୍ଚ କହିଥିଲେ। ୩ ଦିନ ମଧ୍ୟରେ ସମାଧାନ ପ୍ରତିଶ୍ରୁତି ମିଳିବା ପରେ ପୋଲିସ ଉପସ୍ଥିତିରେ ଲୋକେ ତାଲା ଖୋଲିଥିଲେ।