ଭୁବନେଶ୍ୱର,୧।୯(ବ୍ୟୁରୋ): କୋଭିଡ୍ ମହାମାରୀ ସମୟରେ ଲୋକମାନଙ୍କର ବଢୁଥିବା ପାୈର ସେବା ଆବଶ୍ୟକତାକୁ ପୂରଣ କର। ସୋମବାର ସ୍ବାୟତ୍ତ ଶାସନ ଦିବସ ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟର ସମସ୍ତ ସ୍ବାୟତ୍ତ ଶାସନ ସଂସ୍ଥାଗୁଡିକୁ ଏହି ଆହ୍ବାନ ଦେଇଛନ୍ତି। ଲୋକସେବା ଭବନରେ ଅନୁଷ୍ଠିତ ସ୍ବାୟତ୍ତ ଶାସନ ଦିବସ ରାଜ୍ୟସ୍ତରୀୟ ବୈଠକରେ ଅଧ୍ୟକ୍ଷତା କରି ମୁଖ୍ୟମନ୍ତ୍ରୀ ସହରଗୁଡିକର ସ୍ବଚ୍ଛତାକୁ ନେଇ ପାୈର ସଂସ୍ଥାଗୁଡିକୁ ପ୍ରଶଂସା କରିଛନ୍ତି। କଠିନ ବର୍ଜ୍ୟବସ୍ତୁ ଓ ବର୍ଜ୍ୟଜଳ ପରିଚାଳନା ପାଇଁ ପାୈର ସଂସ୍ଥାଗୁଡିକୁ ପ୍ରଶଂସା କରିଛନ୍ତି। ମହାମାରୀ ସମୟରେ ସଫେଇ ଯୋଦ୍ଧାମାନଙ୍କର ଅନବରତ ଓ ଉତ୍ସର୍ଗୀକୃତ କାର୍ଯ୍ୟକୁ ମଧ୍ୟ ମୁଖ୍ୟମନ୍ତ୍ରୀ ଉଚ୍ଚ ପ୍ରଶଂସା କରିଛନ୍ତି। ସହରାଞ୍ଚଳ ପରିମଳ ବ୍ୟବସ୍ଥାରେ ମହିଳା ସ୍ବୟଂ ସହାୟକ ଗୋଷ୍ଠୀଗୁଡିକର ଭୂମିକା ସମ୍ପର୍କରେ ଉଲ୍ଲେଖ କରି ମୁଖ୍ୟମନ୍ତ୍ରୀ କହିଛନ୍ତି, ମହିଳା ସଶକ୍ତୀକରଣ ହେଉଛି ଆମ ସରକାର ଏକ ସଫଳ ମନ୍ତ୍ରରୁ ଗୋଟିଏ। ମିଶନ ଶକ୍ତି ସଦସ୍ୟାମାନେ କପଡାରେ ମାସ୍କ ତିଆରି କରି ପରିମଳ ବ୍ୟବସ୍ଥାକୁ ସଫଳ କରିଥିବାରୁ ସେମାନଙ୍କର ଏହି କଠିନ ଭୂମିକାକୁ ମୁଖ୍ୟମନ୍ତ୍ରୀ ପ୍ରଶଂସା କରିଛନ୍ତି।
ଏହି ଅବସରରେ ମୁଖ୍ୟମନ୍ତ୍ରୀ ୧୦୦ ମାଇକ୍ରୋ କମ୍ପୋଜିଟ ସେଣ୍ଟର ଏବଂ ୫୦ ସାମଗ୍ରୀ ପୁନରୁଦ୍ଧାର ସୁବିଧା(ମାଟେରିଆ ରିକଭରି ଫାସିଲିଟି)କୁ ଲୋକାର୍ପଣ କରିଛନ୍ତି। ଏଥିସହିତ ମୁଖ୍ୟମନ୍ତ୍ରୀ ୫୧ ସେପ୍ଟେଜ ଟ୍ରିଟମେଣ୍ଟ ପ୍ଲାଣ୍ଟର ଶିଳାନ୍ୟାସ କରିଛନ୍ତି। ରାଜ୍ୟ ସରକାର ପରିମଳ ପରିଚାଳନା ପାଇଁ ଗୋଷ୍ଠୀଭିତ୍ତିକ ସଂଗଠନକୁ ନିୟୋଜିତ କରିବା ଦିଗରେ ଉଦ୍ୟମ କରି ଆସିଛନ୍ତି। ଏହି ଅବସରରେ ମୁଖ୍ୟମନ୍ତ୍ରୀ ରାଉରକେଲା, ଅନୁଗୋଳ, ବାଲେଶ୍ୱର ଏବଂ ଢେଙ୍କାନାଳ ମ୍ୟୁନିସିପାଲିଟିର ସେପ୍ଟେଜ ଟ୍ରିିଟମେଣ୍ଟ ପ୍ଲାଣ୍ଟ ପରିଚାଳନା ଓ ରକ୍ଷଣାବେକ୍ଷଣ ଦାୟିତ୍ୱ ମିଶନ ଶକ୍ତି ଗୋଷ୍ଠୀକୁ ପ୍ରଦାନ କରିଛନ୍ତି। ଏହି ଅବସରରେ ଜନସାଧାରଣଙ୍କୁ ସେବା ଯୋଗାଇବା ଉଦ୍ଦେଶ୍ୟରେ ମୁଖ୍ୟମନ୍ତ୍ରୀ ୫-ଟି ଅନ୍ତର୍ଗତ ‘ଆମ ସହର’ ମୋବାଇଲ ଆପ ଏବଂ ସ୍ବଚ୍ଛ ସହର ଓଡିଶା ୱେବ୍ ଆପ୍ର ଉଦ୍ଘାଟନ କରିଛନ୍ତି। ଏହାଦ୍ୱାରା ପାୈର ସଂସ୍ଥାଗୁଡିକ ସେମାନଙ୍କର ବିନିଯୋଗ ସାର୍ଟିଫିକେଟ ଅନ୍ଲାଇନ୍ ମାଧ୍ୟମରେ ଦାଖଲ କରିବା ସହ ଉତ୍ତମ ଆର୍ଥିକ ପରିଚାଳନା କରିପାରିବେ। ଏହି ଅବସରରେ ପରିମଳ ସମ୍ପର୍କିତ ଏକ ପୁସ୍ତିକାକୁ ଉନ୍ମୋଚନ କରିଛନ୍ତି।
ସ୍ବଚ୍ଛ ସର୍ବେକ୍ଷଣ ଅଭିଯାନ-୨୦୨୦ରେ ଉତ୍ତମ ପ୍ରଦର୍ଶନ କରିଥିବା ପାୈର ସଂସ୍ଥା ବ୍ରହ୍ମପୁର ମହାନଗର ନିଗମ, ପାରାଦୀପ ମ୍ୟୁନିସିପାଲିଟି, ଯୋଡା ମ୍ୟୁନିସିପାଲିଟି, କୋଟପାଡ ଏନ୍ଏସି, ବଡବିଲ ମ୍ୟୁନିସିପାଲିଟି, ଢେଙ୍କାନାଳ ମ୍ୟୁନିସିପାଲିଟି, ରାଜଗାଙ୍ଗପୁର, ବ୍ୟାସନଗର ଏବଂ ଚାୈଦ୍ୱାର ମ୍ୟୁନିସିପାଲିଟିକୁ ମୁଖ୍ୟମନ୍ତ୍ରୀ ପୁରସ୍କୃତ କରିଥିଲେ। ଗୃହ ଓ ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା, ମୁଖ୍ୟ ଶାସନ ସଚିବ, ଉନ୍ନୟନ କମିଶନର, ଅର୍ଥ ବିଭାଗ ସଚିବ, ମୁଖ୍ୟମନ୍ତ୍ରୀଙ୍କ ସଚିବ(୫-ଟି) ଏବଂ ଗୃହ ଓ ନଗର ଉନ୍ନୟନ ବିଭାଗର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ।