ନୂଆଦିଲ୍ଲୀ,୨୯।୯: ଆଇପିଏଲ୍ ଏପରି ଏକ ଟୁର୍ନାମେଣ୍ଟ ଯେଉଁଠାରେ କିଛି ବି ସମ୍ଭବ। ଏଥିରେ କିଛି ଖେଳାଳି ରାତାରାତି ଷ୍ଟାର ପାଲଟି ଯାଇଥାନ୍ତି ତ କିଛି ସମାଲୋଚନାର ପାତ୍ର ହୋଇଥାନ୍ତି। ମଙ୍ଗଳବାର ମୁମ୍ବାଇ ଇଣ୍ଡିଆନ୍ସ ଏବଂ ପଞ୍ଜାବ କିଙ୍ଗ୍ସ ମଧ୍ୟରେ ଖେଳାଯାଇଥିବା ମ୍ୟାଚ୍ ପରେ ମୁମ୍ବାଇର ଦୁଇଜଣ ଖେଳାଳି ଚର୍ଚ୍ଚାରେ। କିଛି ଦିନ ଧରି ଉଭୟଙ୍କୁ ନେଇ ସମାଲୋଚନା କରାଯାଉଥିବା ବେଳେ ଉକ୍ତ ମ୍ୟାଚ୍ରେ ସେମାନେ ଦମ୍ଦାର ପ୍ରଦର୍ଶନ କରି ଦଳକୁ ଜିତାଇଛନ୍ତି। ଖେଳାଳିଦ୍ୱୟ ହେଲେ ସେ ସୌରଭ ତିଓ୍ବାରୀ ଏବଂ ହାର୍ଦ୍ଦିକ ପାଣ୍ଡ୍ୟା।
ସିଜନ୍ର ୪୨ତମ ମ୍ୟାଚ୍ରେ ମୁମ୍ବାଇ ଟିମ୍ ଚାପରେ ରହିଥିଲା। ଦଳ ଶ୍ରେଷ୍ଠ-୪ରେ ନ ଥିବାରୁ ପ୍ରତିଟି ମ୍ୟାଚ୍ ଜିତିବା ମହତ୍ୱପୂର୍ଣ୍ଣ ଥିଲା। ପଞ୍ଜାବ ୧୩୬ ରନ୍ର ଟାର୍ଗେଟ ଦେବା ପରେ ମଇଦାନକୁ ଓହ୍ଲାଇଥିଲେ ମୁମ୍ବାଇ ଟିମ୍। ଲକ୍ଷ୍ୟ ଛୋଟ ହୋଇଥିଲେ ହେଁ ୧୬ ରନ୍ ଭିତରେ ଦୁଇଜଣ ଷ୍ଟାର ବ୍ୟାଟ୍ସମ୍ୟାନ୍ ଆଉଟ୍ ହୋଇଥିଲେ। ଦଳ ଅସୁବିଧାରେ ଥିବା ବେଳେ ସୌରଭ ପଡ଼ିଆକୁ ଓହ୍ଲାଇଥିଲେ। ଓଜନକୁ ନେଇ ତାଙ୍କୁ ସମାଲୋଚନା କରାଯାଉଥିଲେ ହେଁ ସୌରଭ ମ୍ୟାଚ୍ରେ ୩୭ ବଲ୍ ଖେଳି ୪୫ ରନ୍ କରିଥିଲେ। ପରେ ଆଉ ଏକ ଉଇକେଟ ଯିବା ପରେ ହାର୍ଦ୍ଦିକ ମଇଦାନକୁ ଆସିଥିଲେ। କିଛି ଦିନ ଧରି ତାଙ୍କୁ ଭାରତୀୟ ଟି-୨୦ ଦଳରେ ସାମିଲ କରାଯିବାକୁ ନେଇ ଆଲୋଚନା ହେଉଥିଲା। ହେଲେ ସେ ମ୍ୟାଚ୍ରେ ୩୦ ବଲ୍ରେ ୪୦ ରନ୍ କରି ସମାଲୋଚକଙ୍କ ମୁହଁ ବନ୍ଦ କରିଥିଲେ। ଉଭୟଙ୍କ ବ୍ୟାଟିଂ ଯୋଗୁ ଦଳ ଭଲ ପ୍ରତ୍ୟାବର୍ତ୍ତନ କରିଥିଲା। ଦଳ ମ୍ୟାଚ୍ ଜିତି ନେଇଥିଲା।