ନୂଆଦିଲ୍ଲୀ, ୨୬।୩ : ଦିଲ୍ଲୀ ହାଇକୋର୍ଟ ହେଟ୍ ସ୍ପିଚ୍ ମାମଲାର ବିଚାର କରି କହିଛନ୍ତି ଯେ, ହସିହସି କହୁଥିବା କଥା ଅପରାଧ ନୁହେଁ। ମାତ୍ର କିଛି ଆପତ୍ତିଜନକ କଥା କହିଲେ ଏହାକୁ ଅପରାଧ ଭାବେ ଗ୍ରହଣ କରାଯାଇପାରେ। ବିଚାରପତି ଚନ୍ଦ୍ରଧାରୀ ସିଂଙ୍କ ନେତୃତ୍ୱରେ ଗଠିତ ଖଣ୍ଡପୀଠ କହିଛନ୍ତି ଯେ, ସାଧାରଣତଃ ନିର୍ବାଚନ ସମୟରେ ଦିଆଯାଉଥିବା ଭାଷଣ ଅନ୍ୟ ମନ୍ତବ୍ୟ ତୁଳନାରେ ଭିନ୍ନ ହୋଇଥାଏ।
ବେଳେବେଳେ କୌଣସି ଖରାପ ଉଦ୍ଦେଶ୍ୟ ନରଖି ରାଜନୈତିକ ଦଳକୁ ସୁହାଇଲା ଭଳି ମନ୍ତବ୍ୟ ପ୍ରଦାନ କରାଯାଇଥାଏ। ତେଣୁ ଏନେଇ ମାମଲା ରୁଜୁ କରିବା ପୂର୍ବରୁ ଏହାର ବିଶ୍ଳେଷଣ କରାଯିବା ଆବଶ୍ୟକ। କେନ୍ଦ୍ରୀୟମନ୍ତ୍ରୀ ଅନୁରାଗ ଠାକୁର ଏବଂ ଭାଜପା ଏମ୍ପି ପ୍ରବେଶ ବର୍ମାଙ୍କ ବିରୋଧରେ ସିପିଆଇ ନେତା ବୃନ୍ଦା କରାତ୍ ହେଟ୍ ସ୍ପିଚ୍ ଅଭିଯୋଗ ଆଣି ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏଥିରେ ନିମ୍ନ ଅଦାଲତଙ୍କ ରାୟକୁ ଚ୍ୟାଲେଞ୍ଜ କରାଯାଇଥିଲା। ନିମ୍ନ ଅଦାଲତ ଭାଷଣ ବିରୋଧରେ ହୋଇଥିବା ଅଭିଯୋଗକୁ ଅପରାଧ ଭାବେ ଗ୍ରହଣ ନ କରି ଏହାକୁ ଖାରଜ କରିଦେଇଥିଲେ।
୨୦୨୦ ଦିଲ୍ଲୀ ବିଧାନସଭା ନିର୍ବାଚନ ସମୟରେ ଅନୁରାଗ ଠାକୁର ଆପତ୍ତିଜନକ ମନ୍ତବ୍ୟ ଦେଇଥିଲେ। ଏନେଇ ୨୦୨୦ ଜାନୁୟାରୀ ୨୯ରେ ନିର୍ବାଚନ ଆୟୋଗ ଠାକୁରଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଥିଲେ।
ହାଇକୋର୍ଟ ଏହି ମାମଲାର ରାୟ ସଂରକ୍ଷିତ ରଖିଛନ୍ତି।