ନୂଆଦିଲ୍ଲୀ,୨।୬: ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ(ଏସ୍ବିଆଇ) ଗ୍ରାହକମାନଙ୍କୁ ଜୁନ୍ ୩୦ ସୁଦ୍ଧା ସେମାନଙ୍କର ପାନ୍-ଆଧାର ଲିଙ୍କ୍ କରିବାକୁ କହିଛି। ଏହାଦ୍ୱାରା ସେମାନେ ଭବିଷ୍ୟତରେ କୌଣସି ପ୍ରକାରର ଅସୁବିଧାର ସମ୍ମୁଖୀନ ହେବେ ନାହିଁ ବୋଲି ବ୍ୟାଙ୍କ କହିଛି।
ଟୁଇଟ୍ କରି ଏସ୍ବିଆଇ କହିଛି, ଗ୍ରାହକମାନଙ୍କୁ ନିରବିଚ୍ଛିନ୍ନ ବ୍ୟାଙ୍କ ସେବା ଉପଭୋଗ କରିବା ପାଇଁ ଆମେ ସେମାନଙ୍କୁ ପାନ୍ ସହ ଆଧାର ଲିଙ୍କ କରିବାକୁ ପରାମର୍ଶ ଦେଉଛୁ। ଏହାକୁ ସଂଯୋଗ କରିବାର ଶେଷ ତାରିଖ ଜୁନ ୩୦।
ତେବେ ପାନ୍ କାର୍ଡକୁ ଆଧାର ସହ ସଂଯୋଗ କରିବାର ପୂର୍ବ ସମୟ ୨୦୨୧ ମାର୍ଚ୍ଚ ୩୧ ଥିଲା। ସେଣ୍ଟ୍ରାଲ ବୋର୍ଡ ଅଫ୍ ଡାଇରେକ୍ଟ ଟ୍ୟାକ୍ସ(ସିବିଡିଟି) ପକ୍ଷରୁ ପାନ୍କୁ ଆଧାର ସହ ସଂଯୋଗ ସୀମାକୁ ତିନିମାସ ପର୍ଯ୍ୟନ୍ତ ବୃଦ୍ଧି କରିଛି। ଅପରପକ୍ଷେ ପାନ୍ କାର୍ଡଧାରୀମାନେ ମଧ୍ୟ ଯଦି ନିଜର କାର୍ଡକୁ ଆଧାର ସହ ଜୁନ୍ ୩୦ ସୁଦ୍ଧା ଲିଙ୍କ ନ କରନ୍ତି ତେବେ ତାହା ନିଷ୍କ୍ରିୟ ହୋଇଯିବ। ଏହାଛଡ଼ା ଆପଣଙ୍କୁ ୧୦୦୦ ଟଙ୍କା ଜରିମାନା ମଧ୍ୟ ଦେବାକୁ ପଡ଼ିବ।