ଗ୍ରାହକଙ୍କୁ ଏସ୍‌ବିଆଇର ଝଟ୍‌କା, ଗୃହ-ଅଟୋ-ବ୍ୟକ୍ତିଗତ ଋଣ ହେଲା ମହଙ୍ଗା

ନୂଆଦିଲ୍ଲୀ,୧୫।୧୨: ଭାରତୀୟ ଷ୍ଟେଟ ବ୍ୟାଙ୍କ(ଏସ୍‌ବିଆଇ) ଗ୍ରାହକଙ୍କୁ ବଡ଼ ଝଟ୍‌କା ଦେଇଛି। ବ୍ୟାଙ୍କ ଏହାର ଋଣକୁ ମହଙ୍ଗା କରିଦେଇଛି। ଏବେ ଋଣ ଲାଗି ସୁଧ ଦର ୧୦.୧୦%ରୁ ବଢ଼ି ୧୦.୨୫% ହୋଇଛି। ଫଳରେ ଗୃହ ଋଣ, ଅଟୋ ଋଣ, ବ୍ୟକ୍ତିଗତ ଋଣ ଆଦି ଲାଗି ଇଏମ୍‌ଆଇ ବୃଦ୍ଧି ପାଇବ।

ଏସ୍‌ବିଆଇ ଏମ୍‌ସିଏଲ୍‌ଆର୍‌ ଘୋଷଣା କରିଛି। ଶୁକ୍ରବାରଠାରୁ ଏହା ଲାଗୁ ହୋଇଛି। ତଦନୁଯାୟୀ ଏମ୍‌ସିଏଲ୍‌ଆର୍‌ ରେଟ୍‌ ୮%ରୁ ୮.୮୫% ମଧ୍ୟରେ ରହିବ। ଓଭରନାଇଟ୍‌ ଏମ୍‌ସିଏଲ୍‌ଆର୍‌ ଦର ୮% ରହିଛି। ହେଲେ ୧ ମାସ ଏବଂ ୩ ମାସ ଅବଧି ଲାଗି ଏହି ଦର ୮.୧୫%ରୁ ବୃଦ୍ଧି ପାଇ ୮.୨୦% ହୋଇଛି। ୬ ମାସ ଏମ୍‌ସିଏଲ୍‌ଆର୍‌ରେ ୦.୧୦% ବୃଦ୍ଧି କରାଯାଇଛି। ଋଣ ଦର ବୃଦ୍ଧି ପାଇ ୮.୫୫% ହୋଇଛି।

କହିରଖୁଛୁ, ଏମ୍‌ସିଏଲ୍‌ଆର୍‌ର ଅର୍ଥ ହେଉଛି ସର୍ବନିମ୍ନ ଋଣ ହାର ଯେଉଁଥିରେ କୌଣସି ବ୍ୟାଙ୍କ ଗ୍ରାହକକୁ ଋଣ ଦେଇଥାଏ। ଏସ୍‌ବିଆଇ ଦେଶର ଅଗ୍ରଣୀ ବ୍ୟାଙ୍କ ହୋଇଥିବାରୁ ଅନ୍ୟ ବ୍ୟାଙ୍କ ମଧ୍ୟ ଏହାର ଅନୁସରଣ କରିବେ ଏବଂ ଋଣ ଦର ବୃଦ୍ଧି କରିବାର ସମ୍ଭାବନା ରହିଛି।