ନୂଆଦିଲ୍ଲୀ,୩୦।୧: ଦେଶର ସର୍ବବୃହତ୍ ରାଷ୍ଟ୍ରାୟତ୍ତ ବ୍ୟାଙ୍କ ଏସ୍ବିଆଇ ଆଣିଥିବା ନୂଆ ନିଯୁକ୍ତି ନିୟମକୁ ନେଇ ବିବାଦ ଦେଖାଦେବା ପରେ ଶନିବାର ଏହାକୁ ପ୍ରତ୍ୟାହାର କରିନିଆଯାଇଛି। ନୂଆ ନିୟମରେ ୩ ମାସରୁ ଊର୍ଦ୍ଧ୍ୱ ଗର୍ଭବତୀ ଥିବା ମହିଳା ପ୍ରାର୍ଥୀଙ୍କୁ ବ୍ୟାଙ୍କରେ କାର୍ଯ୍ୟ କରିବାକୁ ସାମୟିକ ଭାବେ ବାରଣ କରାଯାଇଥିଲା। ଏହାକୁ ବିଭିନ୍ନ ମହଲରେ ସମାଲୋଚନା କରାଯାଇଥିଲା। ଦିଲ୍ଲୀ ମହିଳା କମିଶନଙ୍କ ହସ୍ତକ୍ଷେପ ପରେ ଏସ୍ବିଆଇ କର୍ତ୍ତୃପକ୍ଷ ନୂଆ ନିୟମ ପ୍ରତ୍ୟାହାର
କରି ପୂର୍ବ ନିୟମକୁ ବଳବତ୍ତର ରଖିବାକୁ ନିଷ୍ପତ୍ତି ନେଇଥିବା ଏକ ବିବୃତିରେ କୁହାଯାଇଛି। ଗତ ଡିସେମ୍ବର ୩୧ରେ ଏସ୍ବିଆଇ ଜାରି କରିଥିବା ସର୍କୁଲାର ଅନୁଯାୟୀ ଜଣେ ମହିଳା ୩ ମାସରୁ ଊର୍ଦ୍ଧ୍ୱ ସମୟ ଧରି ଗର୍ଭବତୀ ଥିଲେ ତାଙ୍କୁ ଅସ୍ଥାୟୀ ଭାବେ ଅନୁପଯୁକ୍ତ ବିବେଚନା କରାଯିବ। ଫଳରେ ସେ କାର୍ଯ୍ୟରେ ଯୋଗଦେଇ ପାରିବେନାହିଁ। ନିଯୁକ୍ତି ଓ ପଦୋନ୍ନତି କ୍ଷେତ୍ରରେ ସନ୍ତାନ ଜନ୍ମ କରିବାର ୪ ମାସ ପରେ କାମରେ ଯୋଗଦେବାକୁ ଅନୁମତି ମିଳିବ। ବ୍ୟାଙ୍କ କର୍ତ୍ତୃପକ୍ଷଙ୍କ ଏଭଳି ପଦକ୍ଷେପ ଭେଦଭାବପୂର୍ଣ୍ଣ ଏବଂ ବେଆଇନ। କୋଡ୍ ଅଫ୍ ସୋସିଆଲ ସିକ୍ୟୁରିଟି,୨୦୨୦ରେ ଦିଆଯାଇଥିବା ମାତୃତ୍ୱ ସୁବିଧାର ଏହା ବିରୁଦ୍ଧାଚରଣ କରୁଛି ବୋଲି ଶନିବାର ଦିଲ୍ଲୀ ମହିଳା କମିଶନ ଅଧ୍ୟକ୍ଷା ସ୍ବାତୀ ମାଲିଓ୍ବାଲ ବ୍ୟାଙ୍କକୁ ନୋଟିସ ମାଧ୍ୟମରେ ଜଣାଇଥିଲେ। ଏହା ମୌଳିକ ଅଧିକାର ବିରୋଧରେ ଯାଉଥିବାରୁ ପକ୍ଷପାତମୂଳକ ବୋଲି ସେ ଦର୍ଶାଇଥିଲେ। କର୍ମଚାରୀ ୟୁନିୟନ, ସିପିଆଇ ନେତା, ସିଆଇଟିୟୁ ଏବଂ ଅନ୍ୟମାନେ ମଧ୍ୟ ବ୍ୟାଙ୍କର ନୂଆ ସର୍କୁଲାରକୁ ସମାଲୋଚନା କରିଥିଲେ। ଶେଷରେ ଏସ୍ବିଆଇ କର୍ତ୍ତୃପକ୍ଷ ନୂଆ ସର୍କୁଲାର ଫେରାଇ ନେବା ସହ ପୂର୍ବ ପ୍ରଚଳିତ ନିୟମକୁ କାଏମ ରଖିଛନ୍ତି।