ଭୁବନେଶ୍ୱର,୧୭।୯: ଭାରତୀୟ ଷ୍ଟେଟ ବ୍ୟାଙ୍କ (ଏସ୍ବିଆଇ) ସରକାର ସହ ସୁସମ୍ପର୍କକୁ ଅଗ୍ରାଧିକାର ଦେଇ ଆସୁଛି। ବିଶେଷକରି ‘ମେକ୍ ଇନ୍ ଓଡ଼ିଶା’ କାର୍ଯକ୍ରମକୁ ସଫଳ କରିବା ପାଇଁ ମଧ୍ୟ ବ୍ୟାଙ୍କ ଲକ୍ଷ୍ୟ ରଖିଛି। ନିକଟରେ ମୁମ୍ବାଇରେ ଶେଷ ହୋଇଥିବା ଓଡ଼ିଶା ଇନ୍ଭେଷ୍ଟର ମିଟ୍-୨୦୨୨ରେ ଏସ୍ବିଆଇର ଚେୟାରମେନ ଓ ଓଡ଼ିଶାର ମୁଖ୍ୟମନ୍ତ୍ରୀଙ୍କ ମଧ୍ୟରେ ବିଭିନ୍ନ ବିଷୟରେ ବିସ୍ତୃତ ଆଲୋଚନା ହୋଇଥିଲା। ସେହିଭଳି ଷ୍ଟେଟ ବ୍ୟାଙ୍କ ସରକାରଙ୍କ ଦ୍ୱାରା ପ୍ରାୟୋଜିତ ଋଣ ଯୋଜନା ଯଥା ପିଏମ୍ଇଜିପି, ମୁଦ୍ରା ଇତ୍ୟାଦିରେ ସରକାରଙ୍କ ଦ୍ୱାରା ନିର୍ଦ୍ଧାରିତ ଲକ୍ଷ୍ୟ ହାସଲ କରିବାର ପ୍ରତିଶ୍ରୁତି ଦେଇଛି। ଓଡ଼ିଶାର ରପ୍ତାନି କ୍ଷେତ୍ରର ବିକାଶ ପାଇଁ ଷ୍ଟେଟ ବ୍ୟାଙ୍କ ବଡ ଯୋଜନା ପ୍ରସ୍ତୁତ କରିଛି। ଚଳିତ ଆର୍ଥିକ ବର୍ଷ ୨୦୨୨-୨୩ ରେ ରପ୍ତାନି କ୍ଷେତ୍ରକୁ ୧୦୦୦ କୋଟି ଟଙ୍କାର ପାଣ୍ଠି ପ୍ରଦାନ କରିବା ପାଇଁ ବ୍ୟାଙ୍କ ଲକ୍ଷ୍ୟ ରଖିଛି। ବର୍ତ୍ତମାନ ରପ୍ତାନି କ୍ଷେତ୍ରକୁ ବ୍ୟାଙ୍କ ଦେଇଥିବା ପାଣ୍ଠି ପରିମାଣ ୩୦୦ କୋଟି ଟଙ୍କା ରହିଛି। ଚଳିତ ବର୍ଷ ସେଥିରେ ୩୦୦% ବୃଦ୍ଧି ଆଣିବାକୁ ବ୍ୟାଙ୍କର ଲକ୍ଷ୍ୟ। ସେହିପରି ରପ୍ତାନିରେ ଚିଙ୍ଗୁଡ଼ି, ସି ଫୁଡ୍ ଓ କୃଷିଜାତ ସାମଗ୍ରୀ ଉପରେ ଅଧିକ ଧ୍ୟାନ ଦିଆଯିବ ବୋଲି ଭାରତୀୟ ଷ୍ଟେଟ ବ୍ୟାଙ୍କର ମୁଖ୍ୟ ମହା ପ୍ରବନ୍ଧକ ଚନ୍ଦ୍ରଶେଖର ଶର୍ମା କହିଛନ୍ତି। ଏହା ବ୍ୟତୀତ, ଷ୍ଟାର୍ଟଅପ୍, ରିଅଲ ଏଷ୍ଟେଟ, ଏସ୍ଏମ୍ଇ, ଇଥାନଲ ପ୍ରକଳ୍ପ ଓ ଧାର୍ମିକ ସ୍ଥଳରେ ଭିତ୍ତିଭୂମି ବିକାଶ ପ୍ରକଳ୍ପ ଉପରେ ମଧ୍ୟ ବ୍ୟାଙ୍କ ଧ୍ୟାନ ଦେଉଛି। ଷ୍ଟାର୍ଟଅପ୍ଗୁଡିକ ଲାଗି ଉତ୍ସର୍ଗୀକୃତ ଶାଖା ସ୍ଥାପନ କରିବା ପାଇଁ କ’ଣ ସମ୍ଭାବନା ରହିଛି, ତାହା ଜାଣିବାକୁ ବ୍ୟାଙ୍କ ରାଜ୍ୟରେ ବିଭିନ୍ନ ଶିଳ୍ପସଂଘ ସହ ମଧ୍ୟ ଆଲୋଚନା କରୁଛି। ରାଜ୍ୟରେ ସ୍ଥାପନ ହେଉଥିବା ୨ଟି ପ୍ରକଳ୍ପକୁ ବ୍ୟାଙ୍କ ପାଣ୍ଠି ପ୍ରଦାନ କରିଛି। ଆଉ ତିନୋଟି ପ୍ରତିଷ୍ଠାନ ସହ ଆଲୋଚନା ଜାରି ରହିଛି। ଅପରପକ୍ଷରେ ପୁରୀରେ ମଧ୍ୟ ତିନିଟି ହୋଟେଲ ସ୍ଥାପନ ପାଇଁ ବ୍ୟାଙ୍କ ପାଣ୍ଠି ପ୍ରଦାନ କରିଛି। ରିଅଲ ଇଷ୍ଟେଟ କ୍ଷେତ୍ରରେ ଷ୍ଟେଟ ବ୍ୟାଙ୍କ ୩-୪ ଟି ବଡ଼ ବିଲ୍ଡର ସଂସ୍ଥାକୁ ମଧ୍ୟ ପାଣ୍ଠି ପ୍ରଦାନ କରିଛି ବୋଲି ଶର୍ମା କହିଛନ୍ତି। ଚଳିତ ଆର୍ଥିକ ବର୍ଷ ୨୦୨୨-୨୩ ରେ ଏସ୍ଏମ୍ଇ କ୍ଷେତ୍ରକୁ ବ୍ୟାଙ୍କ ୨୦୦୦କୋଟି ଟଙ୍କା ଓ ରିଅଲ ଇଷ୍ଟେଟ କ୍ଷେତ୍ରକୁ ୧୦୦୦ କୋଟି ଟଙ୍କା ଋଣ ପ୍ରଦାନ କରିବାକୁ ଲକ୍ଷ୍ୟ ରଖିଛି। ଏହା ବ୍ୟତୀତ ଅଗ୍ରିମରେ ୧୫,୦୦୦କୋଟି ଟଙ୍କା ଓ ଜମାରେ ୪୦-୫୦ ହଜାର କୋଟି ଟଙ୍କାର ବୃଦ୍ଧି ଆଣିବାକୁ ବ୍ୟାଙ୍କ ଲକ୍ଷ୍ୟ ରଖିଥିବା ସେ ମତବ୍ୟକ୍ତ କରିଛନ୍ତି। ଚଳିତ ପାର୍ବଣରେ ବ୍ୟାଙ୍କ ବ୍ୟକ୍ତିଗତ ଋଣ ଏକ୍ସପ୍ରେସ୍ କ୍ରେଡିଟ୍ରେ ବୃଦ୍ଧି ପାଇଁ ମଧ୍ୟ ଲକ୍ଷ୍ୟ ରଖିଛି। ଏଥିରେ ଗ୍ରାହକମାନଙ୍କ ପାଇଁ ବିଭିନ୍ନ ରିହାତି ସୁବିଧା ରହିଛି। ସରକାରଙ୍କ ଯେତେସବୁ ସାମାଜିକ କଲ୍ୟାଣମୂଳକ କାର୍ଯକ୍ରମ ରହିଛି, ସେଥିରେ ଅଧିକରୁ ଅଧିକ ଲୋକଙ୍କୁ ଷ୍ଟେଟ ବ୍ୟାଙ୍କ ଯୋଡ଼ିବା ପାଇଁ ଉଦ୍ୟମ କରୁଛି। ଏହା ବ୍ୟତୀତ ଭୁବନେଶ୍ବର-କଟକ ଜାତୀୟ ରାଜପଥରେ ବ୍ୟାଙ୍କ ୩ ଟି ନୂଆ ଶାଖା ସ୍ଥାପନ କରିବାକୁ ଯୋଜନା କରିଛି ବୋଲି ଶର୍ମା କହିଛନ୍ତି। ସାମାଜିକ କଲ୍ୟାଣମୂଳକ କାର୍ଯ୍ୟକ୍ରମରେ ଷ୍ଟେଟ ବ୍ୟାଙ୍କ ସଦା ଅଗ୍ରଣୀ ରହିଛି। ବିଶେଷକରି ପ୍ରିଣ୍ଟ ଓ ଇଲେକ୍ଟ୍ରୋନିକ ଗଣମାଧ୍ୟମରେ କାମ କରୁଥିବା ସାମ୍ବାଦିକମାନଙ୍କୁ ସମ୍ବର୍ଦ୍ଧିତ କରିବା ପାଇଁ ବିଜୁ ପଟ୍ଟନାୟକ ଆୱାର୍ଡ (ସାମାଜିକ ରିପୋର୍ଟିଂ), ଆର୍. କେ. ତଲୱାର ଆୱାର୍ଡ (ବିତ୍ତୀୟ ରିପୋର୍ଟିଂ), କଳିଙ୍ଗ ଆୱାର୍ଡ (କ୍ରୀଡ଼ା ଓ ଯୁବବ୍ୟାପାର ରିପୋର୍ଟିଂ) ଶର୍ମା ଆୱାର୍ଡ ଘୋଷଣା କରିଛନ୍ତି। ଏହି ଆୱାର୍ଡ ପ୍ରତି ବର୍ଷ ଜାନୁୟାରୀ ୨୬ରେ ଦିଆଯିବ।