ଭୁବନେଶ୍ୱର,୮।୧୨: ରାଜ୍ୟର ପ୍ରମୁଖ ଘରୋଇ ଶିକ୍ଷାନୁଷ୍ଠାନ ସେଞ୍ଚୁରିଅନ୍ ୟୁନିର୍ଭସିଟି (ସିୟୁ) ଏବଂ ସିନ୍ଧୁ ବ୍ରାଉନ୍ସ ଲର୍ନିଂ ସେଣ୍ଟର (ଏସ୍ବିଏଲ୍ସି) ମଧ୍ୟରେ ଏକ ଦ୍ୱିପାକ୍ଷିକ ସହଭାଗିତା ସ୍ଥାପନ ହୋଇଥିବା ଉଭୟ ଅନୁଷ୍ଠାନ ପକ୍ଷରୁ କୁହାଯାଇଛି। ସବୁ ବର୍ଗର ଲୋକଙ୍କୁ ଗୁଣାତ୍ମକ ମାନର ଇଂରାଜୀ ଭାଷାର ଶିକ୍ଷା ପ୍ରଦାନ ପାଇଁ ସିୟୁର ଜୟଦେବ ବିହାରସ୍ଥିତ କର୍ପୋରେଟ କାର୍ଯ୍ୟାଳୟ ପରିସରରେ ଏସ୍ବିଏଲ୍ସିର ପ୍ରଥମ ଇଂରାଜୀ ଭାଷା ତାଲିମ କେନ୍ଦ୍ରର ଶୁଭାରମ୍ଭ କରିଥିବା ଜଣାପଡ଼ିଛି।
ଏଠାରେ ଏସ୍ବିଏଲ୍ସି ଇଂରାଜୀ ଭାଷାରେ ମଲ୍ଟି ଲେଭଲ୍ ପାଠ୍ୟକ୍ରମ ପ୍ରଦାନ କରିବ ବୋଲି ସୂଚନା ମିଳିଛି। ଫଳରେ ଆଗ୍ରହୀ ଛାତ୍ରୀଛାତ୍ରମାନଙ୍କୁ କେନ୍ଦ୍ର ଠିକ୍ ଏବଂ ଆତ୍ମବିଶ୍ୱାସ ସହ ଇଂରାଜୀ ଭାଷାରେ କଥାବାର୍ତ୍ତା କରାଇବାକୁ ସକ୍ଷମ କରିବ ବୋଲି କେନ୍ଦ୍ର ପକ୍ଷରୁ କୁହାଯାଇଛି। ସେହିଭଳି ଏସବିଏଲ୍ସି’ର ଇଂରାଜୀ ଭାଷା ଶିକ୍ଷା ଦେବାର ଏକ ସ୍ବତନ୍ତ୍ର ପଦ୍ଧିତ ରହିଛି, ଏଠାରେ ଛୋଟ ପିଲା, କିଶୋର, ଯୁବକ, ବୃତ୍ତିଗତ ତଥା ବୟସ୍କଙ୍କ ପାଇଁ ଇଂରାଜୀ ପାଠ୍ୟକ୍ରମ ସ୍ବତନ୍ତ୍ର ଭାବେ ଡିଜାଇନ୍ କରାଯାଇଛି।
ସେହିପରି ଗତବର୍ଷ ଏସ୍ବିଏଲ୍ସି ଟ୍ରେସ୍ ଏବଂ ଲର୍ନ କନ୍ସେପ୍ଟ ଉପରେ ଆଧାରକରି ବିଭିନ୍ନ ଥିମ୍ ସହ ପିଲାମାନଙ୍କ ପାଇଁ ୨୧ଟି ପୁସ୍ତକ ପରିପ୍ରକାଶ କରିଛି। ଏହାର ପାଠ୍ୟକ୍ରମ ବିଶେଷ ଭାବେ ଗୃହିଣୀ, ଚାକିରି ଖୋଜୁଥିବା ଲୋକ, ଛାତ୍ର, ଓ୍ବାର୍କିଂ ପ୍ରଫେସନାଲ, ବ୍ୟବସାୟିକ ବ୍ୟକ୍ତିଙ୍କ ପାଇଁ ଡିଜାଇନ୍ ହୋଇଥିବା ବେଳେ ଯେଉଁମାନେ ଇଂରାଜୀ ଶିଖିବାର ବିଭିନ୍ନ ସ୍ତରରେ ଅଛନ୍ତି ସେମାନଙ୍କ ପାଇଁ ମୌଳିକ ବର୍ଣ୍ଣମାଳା ଏବଂ ଫୋନିକ୍ଠାରୁ ଆରମ୍ଭ କରି ଆଇଇଏଲ୍ଟିଏସ୍ ପରି ବୃତ୍ତିଗତ ପାଠ୍ୟକ୍ରମ ପର୍ଯ୍ୟନ୍ତ ସମସ୍ତ ଶିକ୍ଷା ଦିଆଯାଉଛି।