ଯାଆଁଳା ,୨୦ା୧(ଡି.ଏନ୍.ଏ.): ଜଟଣୀ ବ୍ଲକ ଅନ୍ତର୍ଗତ ଯାଆଁଳା ପଞ୍ଚାୟତରେ ଗୋରୁଙ୍କ ଠାରେ ଚର୍ମବିଣ୍ଡି ରୋଗ ବ୍ୟାପିବାରେ ଲାଗିଛି। ଏହାର ପ୍ରତିକାର ପାଇଁ ସ୍ଥାନୀୟ ପ୍ରାଣୀ ଚିକିତ୍ସା କେନ୍ଦ୍ର ପକ୍ଷରୁ କୌଣସି ପଦକ୍ଷେପ ନିଆଯାଉ ନାହିଁ। ଫଳରେ ସାଧାରଣରେ ଅସନ୍ତୋଷ ବଢ଼ିବାରେ ଲାଗିଛି। ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, ପ୍ରାୟ ଏକ ମାସ ହେବ ଯାଆଁଳା ପଞ୍ଚାୟତର ମୁଣ୍ଡମୁହାଣ, ଓଗାଳପଡ଼ା, ରାଧାଚରଣପୁର ଆଦି ଗ୍ରାମରେ ଗୋରୁ ଏହି ରୋଗରେ ଆକ୍ରାନ୍ତ ହେଉଛନ୍ତି। ସେମାନଙ୍କ ଶରୀରର ବିଭିନ୍ନ ସ୍ଥାନରେ ଫୋଟକା ଭଳି ହେବା ପରେ ଘା’ରେ ପରିଣତ ହୋଇ ପୂରା ଶରୀରକୁ ବ୍ୟାପୁଛି। ଘା’ଟି ବଡ ଆକାର ଧାରଣ କରି ଏକ ଗର୍ତ୍ତ ସୃଷ୍ଟି କରୁଛି। ପ୍ରାୟ ମାସକରେ ଗୋରୁଟି ମୃତ୍ୟୁ ମୁଖରେ ପଡୁଛି। ବିଶେଷକରି ବାଛୁରୀମାନେ ସଂକ୍ରମିତ ହେଉଛନ୍ତି। ସ୍ଥାନୀୟ ପ୍ରାଣୀ ଚିକତ୍ସା କେନ୍ଦ୍ର ପକ୍ଷରୁ ଏନେଇ କୌଣସି ପଦକ୍ଷେପ ନିଆଯାଉ ନାହିଁ। ଫଳରେ ବାହାରୁ ଆଣ୍ଟିବାୟୋଟିକ କିଣି ଗୋରୁଙ୍କୁ ଦେଉଛନ୍ତି ବୋଲି କେତେଜଣ ବାସିନ୍ଦା କହିଛନ୍ତି। ଦୁଇରୁ ତିନି ସପ୍ତାହ ମଧ୍ୟରେ ପ୍ରାୟ ୩୦ରୁ ଊର୍ଦ୍ଧ୍ୱ ଗୋରୁଙ୍କ ମୃତ୍ୟୁ ହୋଇଥିବା ଜଣାପଡ଼ିଛି। ଏଥିପ୍ରତି ପ୍ରଶାସନ ଦୃଷ୍ଟି ଦେବା ସହ ପଦକ୍ଷେପ ନେବାକୁ ଦାବି ହେଉଛି। ଅନ୍ୟପକ୍ଷରେ ଏନେଇ ଯାଆଁଳା ପ୍ରାଣୀ ଚିକିତ୍ସା କେନ୍ଦ୍ରର ଡା. ରୋଜାଲିନ ଖଟୁଆ କୁହନ୍ତି, କର୍ମଚାରୀଙ୍କ ଅଭାବ ଯୋଗୁ ଗୋ’ ସେବାରେ ବ୍ୟତିକ୍ରମ ଦେଖାଦେଇଛି। ଖୁବ୍ଶୀଘ୍ର ଉକ୍ତ ଗ୍ରାମଗୁଡ଼ିକରେ ଗୋରୁଙ୍କୁ ଟିକା ଦିଆଯିବ ବୋଲି ସେ କହିଛନ୍ତି।