ଯାଜପୁର,୨୦।୪ (ହର୍ଷବର୍ଦ୍ଧନ ବେହେରା)ଦ୍ରୁତ ଶିଳ୍ପାୟନ ରାଜ୍ୟର ଆର୍ଥିକ ଅଭିବୃଦ୍ଧି ସହ ଅଧିକରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି କରିବ ବୋଲି ରାଜ୍ୟ ସରକାର ଦାବି କରୁଛନ୍ତି। ହେଲେ ଶିଳ୍ପ କାରଖାନାଗୁଡ଼ିକର ବେଖାତିର ମନୋଭାବ ଏବଂ ସ୍ଥାନୀୟ ନିଯୁକ୍ତି ପ୍ରତିଶ୍ରୁତିକୁ ଉପେକ୍ଷା ପ୍ରଶାସନକୁ ଅଡୁଆରେ ପକାଉଛି। କେବଳ ସେତିକି ନୁହେଁ, ଇଡ୍କୋ ଜରିଆରେ ଶିଳ୍ପ କାରଖାନା ପ୍ରତିଷ୍ଠା ପାଇଁ ଜମି ଅକ୍ତିଆର କରି କାରଖାନା ନିର୍ମାଣ ଆରମ୍ଭ ନ କରି ଗତ ପ୍ରାୟ ୩ ମାସ ହେବ ମୋରମ ଲୁଟରେ ମାତିଥିବା ଅଭିଯୋଗ ହୋଇଛି। ଜମି ପାଇଁ ପ୍ରାୟ ୨ କୋଟି ଟଙ୍କା ରାଜସ୍ବ ଦାଖଲ କରି ମୋରମ ଲୁଟ ବାବଦରେ ପ୍ରାୟ ୨୫ କୋଟି ଟଙ୍କା ଆୟ କରି ସାରିଥିବା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। ଏଭଳି ପରିସ୍ଥିତି କଳିଙ୍ଗନଗର ଶିଳ୍ପାଞ୍ଚଳର ଭିସିଆଇ କେମିକାଲ୍ସ ଇଣ୍ଡଷ୍ଟ୍ରିଜ କମ୍ପାନୀ ଜମିରେ ସୃଷ୍ଟି ହୋଇଥିବାବେଳେ ବିସ୍ଥାପିତ ଓ ଜମିହରା ଲୋକେ ଆନ୍ଦୋଳନର ଚେତାବନୀ ଦେଇଛନ୍ତି। ଏନେଇ ଧରିତ୍ରୀ ଏବଂ ଓଡ଼ିଶା ପୋଷ୍ଟରେ ଖବର ପ୍ରକାଶ ପାଇବା ପରେ ଯାଜପୁର ଜିଲା ଲଘୁ ଖଣି ବିଭାଗ ପକ୍ଷରୁ ଗତ ୧୨ ତାରିଖରେ ଚଢ଼ାଉ କରିବା ସହ ଗତ ୨ ଦିନ ହେବ ଡ୍ରୋନ କ୍ୟାମେରାରେ ମାପଚୁପ ଚାଲିଛି।
ଶିଳ୍ପାଞ୍ଚଳରେ ଭିସିଆଇ କେମିକାଲ୍ସ ଇଣ୍ଡଷ୍ଟ୍ରିଜ ପ୍ରାଇଭେଟ ଲିଃ କମ୍ପାନୀକୁ କାରଖାନା ପ୍ରତିଷ୍ଠା ପାଇଁ ୨୨ ଏକର ଜମି ଇଡ୍କୋ ଜରିଆରେ ଯୋଗାଇ ଦିଆଯାଇଛି। ୨୯ା୧୧ା୨୦୨୩ରେ କାରଖାନା ପ୍ରତିଷ୍ଠା ପାଇଁ ହୋଇଥିବା ଜନଶୁଣାଣିରେ ଅଞ୍ଚଳବାସୀ ବିଭିନ୍ନ ସର୍ତ୍ତ ରଖି ସମର୍ଥନ କରିଥିଲେ। ବିଶେଷକରି ସେମାନେ ସ୍ଥାନୀୟ ନିଯୁକ୍ତି, ପ୍ରଦୂଷଣ ନିୟନ୍ତ୍ରଣ, ପାରିପାର୍ଶ୍ୱିକ ଉନ୍ନୟନ ଭଳି ଅନେକ ଦାବି କରିଥିଲେ। ଏହାପରେ ଉକ୍ତ ୨୨ ଏକର ଜମିରେ ୧.୦ ଏଲ୍ଟିପିଏ କ୍ଷମତାବିଶିଷ୍ଟ ଗ୍ରୀନ ଫିଲ୍ଡ କୋଲଟାର ଡିଷ୍ଟିଲେଶନ ପ୍ରକଳ୍ପ ପ୍ରତିଷ୍ଠା କରିବାକୁ କମ୍ପାନୀ ପକ୍ଷରୁ ପଦକ୍ଷେପ ନିଆଯାଇଥିଲା। ଏକ ଠିକାସଂସ୍ଥାକୁ ଏହାର ଦାୟିତ୍ୱ ଦେଇଥିଲା ଭିସିଆଇ କମ୍ପାନୀ। କିନ୍ତୁ ଉକ୍ତ ଜମିରେ ବିପୁଳ ପରିମାଣର ଲଘୁ ଖଣିଜ ଦ୍ରବ୍ୟ ମୋରମ ଦେଖି କମ୍ପାନୀ କର୍ତ୍ତୃପକ୍ଷଙ୍କ ଲୋଭ ବଢ଼ି ଯାଇଥିଲା। ଫଳରେ କାରଖାନା ନିର୍ମାଣସ୍ଥଳରେ ରାତିରେ ମୋରମ ଉତ୍ତୋଳନ କରୁଥିବା ଗ୍ରାମବାସୀ ଦେଖିବାକୁ ପାଇଥିଲେ। ଆଇନ ଅନୁସାରେ ପରିବେଶ ମଞ୍ଜୁର(ଇସି), କନସେଣ୍ଟ ଟୁ ଅପରେଟ(ସିଟିଓ) ଓ କନସେଣ୍ଟ ଟୁ ଏଷ୍ଟାବ୍ଲିସ(ସିଟିଇ) ଇତ୍ୟାଦିକୁ ଉଲ୍ଲଂଘନ କରି ମେଶିନ ସହାୟତାରେ ମୋରମ ଉତ୍ତୋଳନ କରାଯାଇ ଯଖପୁରା-ବାଂଶପାଳ ରେଳଲାଇନ ସମ୍ପ୍ରସାରଣ କାର୍ଯ୍ୟରେ ବିନିଯୋଗ କରାଯାଇଥିଲା। ଏନେଇ ଅଞ୍ଚଳବାସୀ ସ୍ଥାନୀୟ ରାଜସ୍ବ ବିଭାଗ, ପୋଲିସ ଏବଂ ଖଣି ବିଭାଗର ଦୃଷ୍ଟିଆକର୍ଷଣ କରିଥିଲେ ହେଁ କେହି ଶୁଣି ନ ଥିଲେ। ପରେ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ଲଘୁ ଖଣି ବିଭାଗ ପକ୍ଷରୁ ଘଟଣାସ୍ଥଳରେ ତଦନ୍ତ କରାଯାଇଥିଲା। ଏଥିରେ ଲଘୁ ଖଣି ବିଭାଗ ମଧ୍ୟ କମ୍ପାନୀ ଫାଶରେ ଫସି ମୋରମ୍ ଲୁଟ୍ ହେଉନି ବରଂ ଜମି ସମତୁଲ କରାଯାଉଛି ବୋଲି କୁହାଯାଇଥିଲା। କିନ୍ତୁ ପରବର୍ତ୍ତୀ ସମୟରେ ଉଚ୍ଚପଦସ୍ଥ ଅଧିକାରୀ ଚାପ ଯୋଗୁ ଲଘୁ ଖଣି ବିଭାଗ ପକ୍ଷରୁ ଗତ ୧୨ ତାରିଖରେ ଚଢାଉ କରାଯାଇ ଆବଶ୍ୟକ କାଗଜପତ୍ର ଦାଖଲ କରିବାକୁ ନିର୍ଦ୍ଦେଶ ଦିଆଯାଇଥିଲା। ଗୁରୁବାରଠାରୁ ଲଘୁ ଖଣି ବିଭାଗ ପକ୍ଷରୁ ମୋରମ୍ ଉତ୍ତୋଳନ ହୋଇଥିବା ସ୍ଥାନରୁ ଡ୍ରୋନ୍ କ୍ୟାମେରାରେ ଫଟୋ ଉତ୍ତୋଳନ ସହ ମାପଚୁପ ଆରମ୍ଭ ହୋଇଛି। ତେବେ ଖଣି ବିଭାଗର ତଦନ୍ତରେ ବିପୁଳ ପରିମାଣର ବାଲି ଓ ମାଙ୍କଡା ପଥର ଜମି ପରିସରରେ ମିଳିଥିବା ଜଣାପଡିଛି। ଏହାପରେ ଲଘୁ ଖଣି ବିଭାଗ ପକ୍ଷରୁ ମୋରମ ଉତ୍ତୋଳନ ନ କରିବାକୁ ନିର୍ଦ୍ଦେଶ ହୋଇଥିଲା। କିନ୍ତୁ କମ୍ପାନୀ ଏହି ନିର୍ଦ୍ଦେଶକୁ ନ ମାନି ପୁଣି ମୋରମ ଉତ୍ତୋଳନ କରୁଥିବା ଅଭିଯୋଗ ହୋଇଥିଲା। ଏଥିରେ କେତେକ ପ୍ରଭାବଶାଳୀ ନେତାଙ୍କ ସହଯୋଗ ଥିବାରୁ ଲଘୁ ଖଣି ବିଭାଗର କାର୍ଯ୍ୟାନୁଷ୍ଠାନରେ ତତ୍ପରତା ପ୍ରକାଶ ପାଇ ନ ଥିବା ଚର୍ଚ୍ଚା ହେଉଛି। ଏ ସଂକ୍ରାନ୍ତରେ ଯାଜପୁର ଲଘୁ ଖଣି ବିଭାଗର ଉପନିର୍ଦ୍ଦେଶକ ଜୟପ୍ରକାଶ ନାୟକଙ୍କୁ ପଚାରିବାରୁ ସେ କହିଛନ୍ତି, ମୋରମ ଲୁଟ ଅଞ୍ଚଳର ପରିସୀମା ବଡ଼ ହୋଇଥିବାରୁ ଫଟୋ ଓ ମାପଚୁପ ପାଇଁ ଡ୍ରୋନ୍ କ୍ୟାମେରାର ସହାୟତା ନିଆଯାଉଛି। ତଦନ୍ତ ଆଧାରରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।