ନୂଆଦିଲ୍ଲୀ, ୧୦।୯ : ଟିକା ନିର୍ମାତା ସେରମ ଇନଷ୍ଟିଚ୍ୟୁଟ ଅଫ ଇଣ୍ଡିଆରେ ଏକ କୋଟି ଟଙ୍କା ଠକେଇ ମାମଲା ସାମ୍ନାକୁ ଆସିଛି। ପୁଣେ ପୋଲିସ ଶନିବାର କହିଛି ଯେ ଠକମାନେ ସିଇଓ ଆଦର ପୁନାୱାଲାଙ୍କ ନାମରେ ମେସେଜ ପଠାଇ ଟଙ୍କା ସ୍ଥାନାନ୍ତର କରିବାକୁ ଦାବି କରିଛନ୍ତି। ବୁଧବାରରୁ ଗୁରୁବାର ମଧ୍ୟରେ ଏହି ଠକେଇ ଘଟିଛି ବୋଲି ବୁଣ୍ଡଗାର୍ଡେନ ପୋଲିସ ଷ୍ଟେଶନର ଜଣେ ଅଧିକାରୀ କହିଛନ୍ତି। ଏହି ମାମଲାରେ ଅଜ୍ଞାତ ଅଭିଯୁକ୍ତଙ୍କ ବିରୋଧରେ ଏଫଆଇଆର୍ ପଞ୍ଜିକୃତ ହୋଇଛି।
ଏଫଆଇଆର୍ ଅନୁଯାୟୀ, ସେରମ ଇନଷ୍ଟିଚ୍ୟୁଟ ଅଫ ଇଣ୍ଡିଆର ଅନ୍ୟତମ ନିର୍ଦ୍ଦେଶକ ସତୀଶ ଦେଶପାଣ୍ଡେଙ୍କୁ ହ୍ବାଟସ ଆପରେ ମେସେଜ କରାଯାଇଥିଲା। ବାର୍ତ୍ତାରେ ଅପରାଧି ନିଜକୁ ଆଦର ପୁନାୱାଲା ବୋଲି ସୂଚନା ପ୍ରଦାନ କରିଥିଲେ। ଅପରାଧି ଦେଶପାଣ୍ଡେଙ୍କୁ ତୁରନ୍ତ କିଛି ବ୍ୟାଙ୍କ ଆକାଉଣ୍ଟକୁ ଟଙ୍କା ସ୍ଥାନାନ୍ତର କରିବାକୁ କହିଥିଲେ।
ମେସେଜ ସିଇଓଙ୍କଠାରୁ ଆସିଛି ବୋଲି ଭାବି କମ୍ପାନୀ ଅଧିକାରୀମାନେ ୧,୦୧,୦୧, ୫୫୪ ଟଙ୍କା ଅନଲାଇନରେ ଟ୍ରାନ୍ସଫର କରିଥିଲେ, କିନ୍ତୁ ପରେ ଜଣାପଡିଥିଲା ଯେ ପୁନାୱାଲା କୌଣସି ହ୍ବାଟସ ଆପ ବାର୍ତ୍ତା ପଠାଇ ନାହାଁନ୍ତି। ଏହି ଘଟଣାରେ ତଦନ୍ତ ଚାଲିଛି।