ନିକଟରେ ଓଡ଼ିଶାର ବ୍ରହ୍ମପୁରସ୍ଥିତ ମହାରାଜା କୃଷ୍ଣଚନ୍ଦ୍ର ଗଜପତି ମେଡିକାଲ କଲେଜ ଆଣ୍ଡ ହସ୍ପିଟାଲର ଏକ ରାଗିଂ ଘଟଣାରେ ୫ ଜଣ ଛାତ୍ରଙ୍କୁ ହଷ୍ଟେଲରୁ ତଡ଼ିଦିଆଯିବା ସହ ୬ ମାସ ପାଇଁ ସେମାନଙ୍କୁ କ୍ୟାମ୍ପସ ବାହାରେ ରହିବା ପାଇଁ ନିର୍ଦ୍ଦେଶ ଦିଆଯାଇଛି। ଚତୁର୍ଥ ବର୍ଷର ଏହି ୫ ଜଣ ଛାତ୍ର ହେଲେ କିରଣ କୁମାର ସୋରେନ, ଲଳିତ ମୋହନ ରଥ, ନିକୁଞ୍ଜ ବିହାରୀ ରାଉତରାୟ, ସଞ୍ଜୟ ମୁର୍ମୁ ଏବଂ ବିଶ୍ୱକାନ୍ତ ଗୁରୁ। ଏଭଳି ମାନସିକତା ପୋଷଣ କରୁଥିବା ଛାତ୍ର ପରବର୍ତ୍ତୀ ସମୟରେ କେଉଁ ପ୍ରକାର ଚିକିତ୍ସକ ହୋଇ ବାହାରିବେ ତାହା ଏବେଠାରୁ ଅନୁମାନ କରିହେଉଛି। ଏହି ଛାତ୍ରମାନେ ଦ୍ୱିତୀୟ ବର୍ଷ ଛାତ୍ରଙ୍କୁ ରାଗିଂ କରିଥିଲେ। ଏଭଳି କାର୍ଯ୍ୟାନୁଷ୍ଠାନକୁ ସପ୍ତାହେ ନ ପୂରୁଣୁ କଟକର ଶ୍ରୀରାମ ଚନ୍ଦ୍ର ଭଞ୍ଜ(ଏସ୍ସିବି) ମେଡିକାଲ କଲେଜ ଆଣ୍ଡ ହସ୍ପିଟାଲରେ ନଭେମ୍ବର ୩ରେ ଏକ ରାଗିଂ ଅଭିଯୋଗ ସାମ୍ନାକୁ ଆସିଲା। ଏହି ଘଟଣାରେ ଶେଷ ଅର୍ଥାତ୍ ଚତୁର୍ଥ ବର୍ଷର ଛାତ୍ରମାନେ ପ୍ରଥମ ବର୍ଷର ଜଣେ ଛାତ୍ରଙ୍କୁ ରାଗିଂ କରିଥିବା ଅଭିଯୋଗକୁ ଶିକ୍ଷାନୁଷ୍ଠାନର କର୍ତ୍ତୃପକ୍ଷ ଖଣ୍ଡନ କରିବା ସହ ଏହାକୁ ଭିତ୍ତିହୀନ ବୋଲି କହିଥିବା ଜଣାପଡ଼ିଛି। କର୍ତ୍ତୃପକ୍ଷଙ୍କ କହିବା ଅନୁଯାୟୀ, ମେଡିକାଲର ଶେଷବର୍ଷର ଛାତ୍ରୀଛାତ୍ରମାନେ ପ୍ରଥମ ବର୍ଷର ଛାତ୍ରୀଛାତ୍ରଙ୍କୁ ସେମାନଙ୍କ ନାମ, ଠିକଣା ବା ପରିଚୟ ସମ୍ପର୍କରେ ପଚାରିଥିଲେ, ଯାହା ଏକ ପରମ୍ପରା ଭାବେ ରହିଆସିଛି। ଏଭଳି ପରମ୍ପରାକୁ କାହିଁକି ପ୍ରୋତ୍ସାହନ ଦିଆଯାଉଛି ତାହା ବୁଝିବା ଅତ୍ୟନ୍ତ କଷ୍ଟକର। ଆଜିର ଯୁଗରେ କାହାରି ବ୍ୟକ୍ତିଗତ ତଥ୍ୟ ପଚାରିବାକୁ ଅନ୍ୟ କୌଣସି ବ୍ୟକ୍ତିଙ୍କର କ୍ଷମତା ନାହିଁ। ଏସ୍ସିବି ମେଡ଼ିକାଲ କଲେଜର କର୍ତ୍ତୃପକ୍ଷଙ୍କର ଏଭଳି ହାଲୁକା ମନୋଭାବ ଯୋଗୁ ଏବକାର ପରିସ୍ଥିତି ଉପୁଜିପାରିଛି। ହୁଏତ ସେହି ମନୋଭାବର ଆଢୁଆଳରେ ପୂର୍ବରୁ ମଧ୍ୟ ରାଗିଂ ଭଳି ଜଘନ୍ୟ ଅପରାଧ ମେଡିକାଲ କଲେଜରେ ଘଟି ଆସୁଥିଲା। ପୂର୍ବରୁ ଛାତ୍ରୀଛାତ୍ରଙ୍କର ନୀରବତା ଯୋଗୁ ତାହା ଲୋକଲୋଚନକୁ ଆସିପାରୁ ନ ଥିଲା। ଏବକାର ପରିସ୍ଥିତିରେ ମନୋବଳ ଥିବା ପିଲାଙ୍କର ପ୍ରତିବାଦ ଯୋଗୁ ଆଜି ପରିସ୍ଥିତି ପଦାରେ ପଡ଼ିଛି। ପୂର୍ବର ତ୍ରୁଟିକୁ ଘୋଡ଼ାଇବାକୁ ଯାଇ ଶିକ୍ଷାନୁଷ୍ଠାନର କର୍ତ୍ତୃପକ୍ଷ ରାଗିଂ କରୁଥିବା ଶେଷ ବର୍ଷର ଛାତ୍ରୀଛାତ୍ରଙ୍କୁ ସୁରକ୍ଷା ଦେବା ପାଇଁ ବାଧ୍ୟ ହେଉଛନ୍ତି। ଆରମ୍ଭରୁ କୌଣସି ପ୍ରକାରର ବେଆଇନ କାର୍ଯ୍ୟକୁ ସହିଯିବା ପରିବର୍ତ୍ତେ ଯଦି କଠୋର ପଦକ୍ଷେପ ନିଆଯାଇଥାଆନ୍ତା, ତେବେ ଆଜି ଏଭଳି ପରିସ୍ଥିତି ଉପୁଜି ନ ଥାଆନ୍ତା।
ସବୁଠୁ ଅଧିକ ଚିନ୍ତା ସୃଷ୍ଟି କରୁଛି ଏହି ନକାରାମତ୍କ ମାନସିକତା ରଖିଥିବା ଏସ୍ସିବି କର୍ତ୍ତୃପକ୍ଷଙ୍କ ପ୍ରତିକ୍ରିୟା। ଦୋଷୀ ଛାତ୍ରଙ୍କୁ ସୁରକ୍ଷା ଦେବାକୁ ଯାଇ ଘଟଣାକୁ ଖଣ୍ଡନ କରିବା ଅତ୍ୟନ୍ତ ବିପଜ୍ଜନକ ପରିସ୍ଥିତି ସୃଷ୍ଟି କରୁଛି। ସମୟ ଥିବା ଭିତରେ ସରକାରଙ୍କ ତରଫରୁ ଏ ସମ୍ପର୍କରେ ଅନୁସନ୍ଧାନକରି ସମ୍ପୃକ୍ତ ଛାତ୍ରଙ୍କ ସମେତ ସେହି ଅପରାଧକୁ ଘୋଡ଼ାଉଥିବା କର୍ତ୍ତୃପକ୍ଷଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଦରକାର। ତାହା ନ ହେଲେ ଭବିଷ୍ୟତରେ ଏହି ପ୍ରକାର ଅପରାଧ ବୃଦ୍ଧି ପାଇବାରେ ଲାଗିବ।