ମାଲକାନଗିରି,୧୦।୧୨(ଡି.ଏନ.ଏ.): ମାଲକାନଗିରି ଜିଲାରେ ଏପରି ଅନେକ ବିଦ୍ୟାଳୟ ରହିଛି ଯେଉଁଠି ଏପର୍ଯ୍ୟନ୍ତ ପକ୍କା ଘରଟିଏ ନାହିଁ। ରାଜ୍ୟ ସରକାର ଜିଲାରେ ଶିକ୍ଷା ସହ ଅନେକ କ୍ଷେତ୍ରରେ ପରିବର୍ତନ ଆଣୁଥିବା ବେଳେ ପ୍ରଶାସନିକ ଅବହେଳା ଯୋଗୁ ଅନେକ ସ୍ଥାନରେ ମୌଳିକ ସୁବିଧା ଅପହଞ୍ଚ ହୋଇ ରହିଛି। ଫଳରେ ଏଯାବତ୍ ଅନେକ ବିଦ୍ୟାଳୟର ନିଜସ୍ବ ପକ୍କା ଗୃହ ନାହଁି। ଏପରି ଦେଖିବାକୁ ମିଳିଛି ମାଲକାନଗିରି ଜିଲା କାଲିମେଳା ବ୍ଲକର କୁରୁମାନୁ ପଞ୍ଚାୟତର ଆରବଟି ଗ୍ରାମରେ।
ଏହି ଗ୍ରାମରେ ବିଭିନ୍ନ ମୌଳିକ ସମସ୍ୟା ଏଯାଏ ସୁଧୁରିନାହିଁ। ଏଠାରେ ଥିବା ପ୍ରାଥମିକ ବିଦ୍ୟାଳୟର ଅବସ୍ଥା ଅତି ଶୋଚନୀୟ ହୋଇପଡିଛି । ୪୦ ବର୍ଷରୁ ଊର୍ଦ୍ଧ୍ୱ ସମୟ ଧରି ଏଠାରେ ଥିବା ବିଦ୍ୟାଳୟ ଅବସ୍ଥା ଦେଖିଲେ କେହି ଏହା ଏକ ବିଦ୍ୟାଳୟ ବୋଲି କହିବେ ନାହିଁ । ସାଧାରଣତଃ ବିଦ୍ୟାଳୟ ଗୃହ ଇଟା ଓ ସିମେଣ୍ଟରେ ତିଆରି ହେଉଥିବା ବେଳେ ଏହି ବିଦ୍ୟାଳୟ ତିଆରି ହୋଇଛି ବାଉଁଶ ବାଡରେ । ତଳେ ଗୋବର ଲିପା ଚଟାଣ ସହ ଉପରେ ପଡ଼ିଛି ଟିଣ । ବିଦ୍ୟାଳୟ ଭିତରେ ପିଲାଏ ପଢୁଛନ୍ତି କି ନାହଁି ତାହା ବାହାରୁ ସ୍ପଷ୍ଟ ରୂପେ ଦେଖି ହେଉଛି। ବାଉଁଶ ବାଡରେ ଅନେକ ସ୍ଥାନରେ ଥିବା ବଡ ବଡ ଛିଦ୍ର ଦେଇ ଖରା ଭିତରକୁ ଖରା ପଡେ। ବର୍ଷା ହେଲେ ବର୍ଷା ପାଣି ମଧ୍ୟ ପଡିଥାଏ। କେବଳ ଏତିକି ନୁହେଁ ଏହି ବିଦ୍ୟାଳୟରେ ଅନେକ ସମୟରେ ସାପ, ଗୋଧି ପରି ଅନେକ ସରୀସୃପ ପଶି ଆସୁଛନ୍ତି। ନିଜ ପିଲାଙ୍କ ସୁରକ୍ଷା ପାଇଁ ଅଭିଭାବକ ମାନେ ପାଳି କରି ବିଦ୍ୟାଳୟକୁ ଆସନ୍ତି। ସେତିକିରେ ସରିନି ବିଦ୍ୟାଳୟର ସମସ୍ୟା, ବିଦ୍ୟାଳୟକୁ ଶିକ୍ଷାଦାନ ପାଇଁ ନିଯୁକ୍ତ ଶିକ୍ଷକମାନେ ନିୟମିତ ବିଦ୍ୟାଳୟ ଆସୁ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି । ସ୍ବଳ୍ପସଂଖ୍ୟକ ଛାତ୍ରୀଛାତ୍ର ଏଠାରେ ପଢୁଥିବା ବେଳେ ଶିକ୍ଷକମାନେ ପାଳି କରି ଶିକ୍ଷାଦାନ ପାଇଁ ଆସୁଥିବା ଗ୍ରାମବାସୀ କହିଛନ୍ତି । ଏହି ଶିକ୍ଷକମାନେ ଦୁଇ ଘଣ୍ଟା ପଢେଇବା ପରେ ଚାଲିଯାଆନ୍ତି। ଶିକ୍ଷକମାନଙ୍କ ଇଚ୍ଛାରେ ବିଦ୍ୟାଳୟ ଚାଲୁଥିବା ବେଳେ ଇଚ୍ଛା ହେଲେ ସେମାନେ ଆସନ୍ତି ନଚେତ ନାହିଁ । ଗ୍ରାମରେ ଅନେକ ସମସ୍ୟା ରହିଥିବା ସତ୍ୱେ ପ୍ରଥମେ ବିଦ୍ୟାଳୟର ଶିକ୍ଷା ବ୍ୟବସ୍ଥା ସଜାଡିବାକୁ ଜିଲା ପ୍ରଶାସନ ଓ ବିଭାଗୀୟ ଅଧିକାରୀଙ୍କୁ ଅନୁରୋଧ କରିଛନ୍ତି ଗ୍ରାମବାସୀ ।