ମନ୍ତ୍ରୀଙ୍କ ସ୍ବାଗତ ପାଇଁ ସ୍କୁଲ ପିଲାଙ୍କୁ ରାସ୍ତାରେ ଛିଡ଼ା କରାଗଲା, ଭିଡ଼ିଓ ଭାଇରାଲ ବିବାଦ ବଢ଼ିଲା…

ମୁମ୍ବାଇ,୮।୭ : ମହାରାଷ୍ଟ୍ରରେ ଅଜିତ ପାୱାର ଦଳର କ୍ୟାବିନେଟ ମନ୍ତ୍ରୀ ଅନିଲ ପାଟିଲଙ୍କ ସ୍ବାଗତକୁ ନେଇ ରାଜନୈତିକ ବାକ ଯୁଦ୍ଧ ଆରମ୍ଭ ହୋଇଛି। ମନ୍ତ୍ରୀଙ୍କ ସ୍ବାଗତ ପାଇଁ ସ୍କୁଲ ପିଲାମାନଙ୍କୁ ରାସ୍ତା କଡ଼ରେ ଠିଆ କରାଇବା ନେଇ ଶିବସେନା (ଉଦ୍ଧବ) ସମର୍ଥକ ସରକାରଙ୍କୁ ଘେରିବା ଆରମ୍ଭ କରିଛନ୍ତି। ଉଦ୍ଧବ ଠାକରେଦଳ ମୁଖପାତ୍ର ଆନନ୍ଦ ଦୁବେ କହିଛନ୍ତି ମନ୍ତ୍ରୀ ତାଙ୍କ ସ୍ବାଗତ ଏବଂ ଅଭିବାଦନ ପାଇଁ ସ୍କୁଲ ପିଲାମାନଙ୍କୁ ବ୍ୟବହାର ବନ୍ଦ କରିବା ଉଚିତ। କେତେ ଦିନ ପର୍ଯ୍ୟନ୍ତ ସରକାର ଏଭଳି ନିନ୍ଦନୀୟ ରାଜନୀତିରେ ବ୍ୟସ୍ତ ରହିବେ। ଅପରାଧୀଙ୍କ ବିରୋଧରେ କେବେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ?

ବାସ୍ତବରେ, ଏନସିପି କୋଟାରୁ ମନ୍ତ୍ରୀ ହୋଇଥିବା ଅନିଲ ପାଟିଲ ତାଙ୍କ ଦଳ ସହିତ ଉତ୍ତର ମହାରାଷ୍ଟ୍ରର ବିଧାନସଭା ନିର୍ବାଚନମଣ୍ଡଳୀରେ ପହଞ୍ଚିଥିଲେ। ତାଙ୍କୁ ସ୍ବାଗତ କରିବା ପାଇଁ ରାସ୍ତାରେ ଠିଆ ହୋଇଥିବା ସ୍କୁଲ ପିଲାମାନଙ୍କର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ଏହି ପୁରା ଘଟଣା ଜାଲଗାଓଁ ଜିଲାର ଅମାଲନର୍‌ ତହସିଲର। ଭିଡିଓରେ ଏକ ଆଶ୍ରମ ବିଦ୍ୟାଳୟର ପିଲାମାନେ ରାସ୍ତାରେ ଠିଆ ହୋଇଥିବା ଦେଖିବାକୁ ମିଳିଛି, ଗୋଟିଏ ପଟେ ବାଳିକା ଏବଂ ଅନ୍ୟ ପଟେ ବାଳକମାନେ।

ମହାରାଷ୍ଟ୍ରର ଆଶ୍ରମ ବିଦ୍ୟାଳୟଗୁଡ଼ିକ ଅନୁସୂଚିତ ଜାତି ଏବଂ ଅନୁସୂଚିତ ଜନଜାତି ଛାତ୍ରମାନଙ୍କ ପାଇଁ ଆବାସିକ ବିଦ୍ୟାଳୟ । ଭିଡିଓରେ ଦେଖାଯାଉଛି ଜୋତା ଏବଂ ଚପଲ ନ ଥିବା ପିଲାମାନେ ଅନୀଲ ପାଟିଲଙ୍କ ଅପେକ୍ଷା କରି ରାସ୍ତାରେ ବସିଛନ୍ତି। ଜୁଲାଇ ୨ ରେ ପାଟିଲ ଅନ୍ୟ ଆଠ ଜଣ ଏନସିପି ବିଧାୟକଙ୍କ ସହ ରାଜ୍ୟ ସରକାରରେ ମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ। ମନ୍ତ୍ରୀଙ୍କ କାର ଆସିବା ମାତ୍ରେ ପିଲାମାନେ ଠିଆ ହୋଇଥିଲେ। ସେମାନଙ୍କ ମଧ୍ୟରୁ କେତେକ ମନ୍ତ୍ରୀଙ୍କୁ ନମସ୍କାର ମଧ୍ୟ କରିଥିଲେ। ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବା ମାତ୍ରେ ଅନେକ ପ୍ରତିକ୍ରିୟା ଆସିବା ଆରମ୍ଭ ହୋଇଛି। ଲୋକମାନେ ସରକାରଙ୍କ ଉପରେ ଅସନ୍ତୋଷ ବ୍ୟକ୍ତ କରିଛନ୍ତି। ତେବେ ଏପର୍ଯ୍ୟନ୍ତ ମନ୍ତ୍ରୀ କିମ୍ବା ସ୍ଥାନୀୟ ପ୍ରଶାସନ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ।