କୁଜଙ୍ଗ,୧୮ା୪(ଡି.ଏନ୍.ଏ.): କୁଜଙ୍ଗ ବ୍ଲକ ଅନ୍ତର୍ଗତ ପୋତାନଇ ପଞ୍ଚାୟତର ଦାର୍ଦ୍ଦିଆ ପୋତାନଇ ଉଚ୍ଚ ବିଦ୍ୟାଳୟର ପୁରାତନ ପ୍ରାଚୀର ଓ କିଛି ଶ୍ରେଣୀ ଗୃହ ଏବେ ଜରାଜୀର୍ଣ୍ଣ ହୋଇପଡ଼ିଛି। ମାତ୍ର ଏହାର ମରମତି ଓ ନବୀକରଣ ହେଉନାହିଁ। ସେହିପରି ଏଠାରେ ଖାଲିପଡ଼ିଥିବା ଶିକ୍ଷକ ପଦବୀଗୁଡ଼ିକ ପୂରଣ ହେଉ ନ ଥିବାରୁ ଛାତ୍ରୀଛାତ୍ରଙ୍କ ପାଠପଢ଼ା ବାଧାପ୍ରାପ୍ତ ହେଉଛି।
୧୯୬୪ରେ ପ୍ରତିଷ୍ଠା ହୋଇଥିବା ଏହି ପୁରାତନ ବିଦ୍ୟାଳୟଟି ପୂର୍ବରୁ ଶିକ୍ଷା କ୍ଷେତ୍ରରେ ସୁନାମ ଅର୍ଜନ କରିଥିଲା। ଏ ନେଇ ଆଖପାଖ ଅଞ୍ଚଳର ବହୁ ଛାତ୍ରୀଛାତ୍ର ଏଠାରେ ପାଠପଢ଼ିବାକୁ ଭିଡ଼ ଜମାଉଥିଲେ। ଏବେ ଏହାର ପାରିପାର୍ଶ୍ୱିକ ଓ ଶିକ୍ଷା ବ୍ୟବସ୍ଥା ଦେଖି ଅଭିଭାବକମାନେ ଛାତ୍ରୀଛାତ୍ରଙ୍କ ନାମ ଲେଖାଇବାକୁ ଆଗ୍ରହ ପ୍ରକାଶ କରୁନାହାନ୍ତି। ଏବେ ବିଦ୍ୟାଳୟରେ ନବମ ଓ ଦଶମ ଶ୍ରେଣୀରେ ୬୧ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି।
୨୦୧୨ରେ ରାମସା ଅନୁଦାନରେ ଅତିରିକ୍ତ ଶ୍ରେଣୀଗୃହ ପାଇଁ ୨୨ ଲକ୍ଷ ଟଙ୍କା ବ୍ୟୟବରାଦ ହୋଇଥିଲା। ସମ୍ପୃକ୍ତ ଠିକାଦାର ଶ୍ରେଣୀ ଗୃହ କାମ ଆରମ୍ଭ କରିଥିଲା। ମାତ୍ର ପ୍ଲିନ୍ଥ ଲେବୁଲ ପର୍ଯ୍ୟନ୍ତ ନିର୍ମାଣ କରି ହଠାତ୍ କାର୍ଯ୍ୟ ବନ୍ଦ କରି ଚାଲିଯାଇଥିଲା। ସେବେଠାରୁ ଶ୍ରେଣୀ ଗୃହଗୁଡ଼ିକ ଅଧାପନ୍ତରିଆ ହୋଇ ରହିଛି। ଇତିମଧ୍ୟରେ ୧୦ ବର୍ଷ ଅତିକ୍ରାନ୍ତ କରିଯାଇଛି। ଏବେ ଏହି ଅର୍ଦ୍ଧନିର୍ମିତ ଶ୍ରେଣୀ ଗୃହ ଉପରେ ଲତାଗୁଳ୍ମ ମାଡିଗଲାଣି। ମାତ୍ର ବିଭାଗୀୟ ଅଧିକାରୀ ଏଥିପ୍ରତି ଧ୍ୟାନ ଦେଉନାହାନ୍ତି। ଏହାଛଡ଼ା ବିଦ୍ୟାଳୟରେ ଦୀର୍ଘଦିନ ହେବ ୪ଟି ଶିକ୍ଷକ ପଦବୀ ଖାଲିପଡ଼ିଛି। ୨୦୧୬ରୁ କଳା ଶିକ୍ଷକ ପଦବୀ, ୨୦୨୦ ମାର୍ଚ୍ଚରୁ ହିନ୍ଦୀ ଶିକ୍ଷକ ପଦବୀ, ୨୦୨୧ ଅଗଷ୍ଟରୁ ଗଣିତ ଶିକ୍ଷକ ପଦବୀ ଓ ୨୦୨୦ ଏପ୍ରିଲରୁ ସଂସ୍କୃତ ଶିକ୍ଷକ ପଦବୀ ଖାଲି ପଡ଼ିଛି। ଅନ୍ୟ ପକ୍ଷରେ ଦୀର୍ଘ ୬ବର୍ଷ ହେବ କାର୍ଯ୍ୟରତ କିରାଣିଙ୍କୁ କୁଜଙ୍ଗସ୍ଥିତ ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟକୁ ଡେପୁଟେଶନରେ ପଠାଇ ଦିଆଯାଇଛି। ଏନେଇ ଛାତ୍ରୀଛାତ୍ର ଓ ଅଭିଭାବକମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏହି ପୁରାତନ ବିଦ୍ୟାଳୟକୁ ୫-ଟି ଯୋଜନାରେ ସାମିଲ କରି ରୂପାନ୍ତରଣ ବିଦ୍ୟାଳୟରେ ଅନ୍ତର୍ଭୁୁକ୍ତ କରିବା ପାଇଁ ବିଦ୍ୟାଳୟ ପରିଚାଳନା ସମିତି ସଦସ୍ୟ ବ୍ରଜକିଶୋର ମହାରାଜ, ବିଦ୍ୟାଳୟର ପୁରାତନ ଛାତ୍ରସଂଘ ସଭାପତି ମନମୋହନ ବିଶ୍ୱାଳ, ସମ୍ପାଦକ ସର୍ବେଶ୍ୱର ଜେନା ଏବଂ ଛାତ୍ର ଅଭିଭାବକ କଳ୍ପନା ଦାସ, ଅଜୟ କୁମାର ଦାସ, ବିଚିତ୍ରାନନ୍ଦ ଚୌଧୁରୀ ଓ ପ୍ରଶାନ୍ତ କୁମାର ଦାସ ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ଜିଲା ଶିକ୍ଷାଅଧିକାରୀ ନିରଞ୍ଜନ ବେହେରା କହିଛନ୍ତି, ନୂତନ ନିଯୁକ୍ତି ପ୍ରକ୍ରିୟା ଆରମ୍ଭ ହେଲେ ଖାଲିପଡ଼ିଥିବା ପଦବୀ ପୂରଣ ହେବ। ସେହିପରି ଶ୍ରେଣୀଗୃହ ମରାମତି ପାଇଁ ଆଗକୁ ପଦକ୍ଷେପ ନିଆଯିବ ବୋଲି ସେ କହିଥିଲେ।