ମାଥିଲି,୧୧ା୩ (ଡି.ଏନ.ଏ.): ମାଲକାନଗିରି ଜିଲା ଖଇରପୁଟ ବ୍ଲକରେ ରହିଛି ବଡ଼ଡୁରାଲ ପଞ୍ଚାୟତର କୁଟୁନିପଦର ଗ୍ରାମ। ଗ୍ରାମରେ ୨୦ରୁ ଊର୍ଦ୍ଧ୍ୱ ଛୋଟ ପିଲା ଥିଲେ ମଧ୍ୟ ସେମାନେ ଏଯାଏ ବିଦ୍ୟାଳୟ ମୁହଁ ଦେଖିନାହାନ୍ତି। ମାତ୍ର କାଗଜକଲମରେ ଗ୍ରାମରେ ବିଦ୍ୟାଳୟ ଚାଲିଛି। ପିଲାମାନେ ପାଠ ପଢୁଛନ୍ତି। ମଧ୍ୟାହ୍ନଭୋଜନ ଚାଲିଛି। ସେମାନଙ୍କ ପାଇଁ ୨ ଜଣ ଶିକ୍ଷକ ମଧ୍ୟ ନିଯୁକ୍ତ ହୋଇଛନ୍ତି। ତେବେ ଏସବୁ ଚାଲିଛି କେବଳ କାଗଜକଲମରେ। କୁଟୁନିପଦର ଗ୍ରାମବାସୀ କହନ୍ତି, ପୂର୍ବରୁ ଗ୍ରାମରେ ଥିବା ବିଦ୍ୟାଳୟ ୨୦୧୪ରେ ହୁଡ୍ହୁଡ୍ ବାତ୍ୟାରେ ସମ୍ପୂର୍ଣ୍ଣ ମାଟିରେ ମିଶିଯିବା ପରେ ଆଉ ବିଦ୍ୟାଳୟ ଗୃହ ନିର୍ମାଣ ନେଇ ୮ବର୍ଷ ହେଲା କୌଣସି ପଦକ୍ଷେପ ନିଆଯାଉନାହିଁ। ଏବେ ବିଦ୍ୟାଳୟ ଯିବାକୁ ଆହୁରି ପ୍ରାୟ ୪୦ ପିଲା ଅଛନ୍ତି। ସବୁ ପିଲାଙ୍କ ଭବିଷ୍ୟତ ଅନ୍ଧକାର ହୋଇଯାଇଛି। ସେହି ପିଲାଙ୍କ ମଧ୍ୟରୁ କିଏ ପଥର ଫଟାଉଛି ତ କିଏ କେନ୍ଦୁପତ୍ର ତୋଳୁଛି ଆଉ କିଏ ଗୋରୁଗୋଠରେ ଶୈଶବକୁ ବନ୍ଧା ପକାଇଛି। ନିଯୁକ୍ତି ପାଇଥିବା ଦୁଇ ଶିକ୍ଷକ ପାଠ ନ ପଢ଼ାଇ ମାସକୁ ମାସ ଦରମା ପାଉଛନ୍ତି। ତେବେ ସବୁଠାରୁ ବଡକଥା ହେଲା ଏ ସମ୍ପର୍କରେ ଶିକ୍ଷା ବିଭାଗର ଜିଲା ଶିକ୍ଷାଧିକାରୀଙ୍କ ପାଖରେ କୌଣସି ଖବର ନାହିଁ। ପିଲାଙ୍କୁ ପଚାରିବାରୁ ଗ୍ରାମରେ ବିଦ୍ୟାଳୟ ତ ନାହିଁ ପାଠ କେମିତି ପଢିବୁ। ସେଥିଲାଗି ଘର ପାଇଁ କିଛି କିଛି କାମ କରୁଛୁ ବୋଲି କହିଥିଲେ। ଏ ସମ୍ପର୍କରେ ପରିଚାଳନା କମିଟି ସଭାପତି ଶଙ୍କର କାଣ୍ଡିଙ୍କୁ ପଚାରିବରୁ ସେ କହିଥିଲେ, କୁଟୁନିପଦର ଓ ନିକଟସ୍ଥ ନୂଆଗୁଡା ଗ୍ରାମର ପିଲାମାନେ ଏହି ବିଦ୍ୟାଳୟରେ ୮ବର୍ଷ ତଳେ ପଢୁଥିଲେ। ଏବେ ସରକାରୀ କାଗଜପତ୍ରରେ ମାତ୍ର ୨୦ ପିଲାଙ୍କ ନାମ ଲେଖାଯାଇଥିବା ଦର୍ଶାଯାଇଛି। ସେମାନଙ୍କ ପାଇଁ ମଧ୍ୟାହ୍ନଭୋଜନ ବ୍ୟବସ୍ଥା ଚାଲିଛି। ମାତ୍ର ମଧ୍ୟାହ୍ନଭୋଜନ କିଏ ଖାଉଛି, ପାଠ କିଏ ପଢୁଛି ସବୁ କାଗଜପତ୍ରରେ ସୀମିତ ରହିଛି। ଅନ୍ୟ ୪୦ ପିଲାଙ୍କ କୌଣସି ଖବର ପ୍ରଶାସନ ନିକଟରେ ନାହିଁ ବୋଲି କାଣ୍ଡି କହିଥିଲେ। ସେହିପରି ଗୋବିନ୍ଦପାଲି ସିଆର୍ସିସି ଲକ୍ଷ୍ମୀକାନ୍ତ ରଥଙ୍କୁ ପଚାରିବାରୁ ମୁଁ ଏ ବିଷୟରେ କିଛି କହିପାରିବି ନାହିଁ ବୋଲି କହିଥିଲେ। ଏନେଇ ବିଇଓଙ୍କୁ ପଚାରିବାରୁ ସେ କହିଲେ।