ଡେରାବିଶ, ୮ା୧୦(ସ୍ବ.ପ୍ର.): ଡେରାବିଶ ବ୍ଲକ ଦାନପୁର ପଞ୍ଚାୟତ ଅନ୍ତର୍ଗତ ଗହଗା ନରସିଂହପୁର ଉପ୍ରା ବିଦ୍ୟାଳୟରେ ଶୁକ୍ରବାର ସମନ୍ବିତ ଶିଶୁ ବିକାଶ ଯୋଜନାର ‘ମମତା ଦିବସ’ ପାଳନ କରାଯାଉଥିଲା। ନରସିଂହପୁର ଗ୍ରାମରେ ଥିବା ଦୁଇ ଅଙ୍ଗନୱାଡି କେନ୍ଦ୍ରର କର୍ମୀ ଲକ୍ଷ୍ମୀପ୍ରିୟା ମଙ୍ଗରାଜ ଓ ମନୋରମା ଜେନା, ସ୍ବାସ୍ଥ୍ୟକର୍ମୀ (ମହିଳା) ଶର୍ମିଷ୍ଠା ନାୟକ ଓ ମାନସୀ ପଲେଇ କାର୍ଯ୍ୟକ୍ରମ ପରିଚାଳନା କରୁଥିଲେ। ଗ୍ରାମର ପ୍ରସୂତି, ଗର୍ଭବତୀ ମହିଳା ଏବଂ ଶିଶୁମାନଙ୍କ ସ୍ବାସ୍ଥ୍ୟ ପରୀକ୍ଷା ଚାଲିଥିଲା। ଏହି ସମୟରେ ବିଦ୍ୟାଳୟ ଛାତ ତଳେ ହୋଇଥିବା ସିଲିଂଟି ହଠାତ୍ ଭୁଶୁଡ଼ି ପଡ଼ିଥିଲା। ସୌଭାଗ୍ୟବଶତଃ ପ୍ରସୂତି, ଗର୍ଭବତୀ ଓ ଶିଶୁମାନେ ବାହାରକୁ ପଳାଇ ଆସିବା ପରେ ଅଙ୍ଗନୱାଡି କର୍ମୀ ଓ ସ୍ବାସ୍ଥ୍ୟକର୍ମୀମାନଙ୍କ ଉପରେ ଏହା ପଡ଼ିଥିଲା। ଏଥିଯୋଗୁ ଏମାନେ ସାମାନ୍ୟ ଆହତ ହୋଇଥିବା ବେଳେ ମହିଳା ଦୁଇ ସ୍ବାସ୍ଥ୍ୟକର୍ମୀ ମୁଣ୍ଡ ଓ ଶରୀରରେ ଆଘାତ ପାଇବା ସହ କ୍ଷତାକ୍ତ ହୋଇଥିଲେ। ଏ ସମ୍ପର୍କରେ ଅଙ୍ଗନୱାଡି କର୍ମୀ ମଙ୍ଗରାଜ ସିଡିପିଓଙ୍କ ଦୃଷ୍ଟି ଆକର୍ଷଣ କରିଛନ୍ତି। ସୂଚନାଯୋଗ୍ୟ, ନରସିଂହପୁର ଗ୍ରାମରେ ଅଦ୍ୟାବଧି ଅଙ୍ଗନୱାଡି କେନ୍ଦ୍ରର ଗୃହ ନାହିଁ। ଫଳରେ ଗହଗା ନରସିଂହପୁର ଉପ୍ରା ବିଦ୍ୟାଳୟ ଗୃହକୁ ଅଙ୍ଗନୱାଡି କେନ୍ଦ୍ର ଭାବେ ବ୍ୟବହାର କରାଯାଉଥିଲା। ଏହି ବିଦ୍ୟାଳୟକୁ ସ୍ମାର୍ଟ ସ୍କୁଲ ଯୋଜନାରେ ଅନ୍ତର୍ଭୁକ୍ତ କରାଯାଇ ଶ୍ରେଣୀଗୃହର ସିଲିଂ କରାଯାଇଥିଲା। ବ୍ଲକ କନିଷ୍ଠ ଯନ୍ତ୍ରୀଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ମାତ୍ର ବର୍ଷକ ତଳେ କରାଯାଇଥିବା ଏହି ସିଲିଂ କାର୍ଯ୍ୟ ନିମ୍ନମାନର ହୋଇଥିବାରୁ ତାହା ଭୁଶୁଡ଼ି ପଡ଼ିଥିବା ଗ୍ରାମବାସୀ କହିଛନ୍ତି। ଏହି ଘଟଣା ସମଗ୍ର ବ୍ଲକ ଅଞ୍ଚଳରେ ଆଲୋଡ଼ନ ସୃଷ୍ଟି କରିଛି। ତେବେ ଏ ସମ୍ପର୍କରେ ବିଡିଓ ନମିତା ବାରିକଙ୍କୁ ପଚାରିବାରୁ ବର୍ଷକ ତଳେ ତିଆରି ହୋଇଥିବା ଏହି ସିଲିଂ କାହିଁ ଭୁଶୁଡ଼ିଲା ସେ ବିଷୟରେ ଅନୁଧ୍ୟାନ ପାଇଁ ବ୍ଲକର ଜଣେ ଯନ୍ତ୍ରୀଙ୍କୁ ଘଟଣାସ୍ଥଳକୁ ପଠାଯାଇଛି। ରିପୋର୍ଟ ପାଇବା ପରେ ଯାହାକିଛି ପଦକ୍ଷେପ ନିଆଯିବ ବୋଲି ସେ କହିଛନ୍ତି।