ଜୁନାଗଡ,୧୨।୧୦(ଡି.ଏନ୍.ଏ.) କଳାହାଣ୍ଡି ଜିଲା ଜୁନାଗଡ ବ୍ଲକ୍ ମଥୁରା ରାଧାକୃଷ୍ଣ ଉଚ୍ଚ ବିଦ୍ୟାଳୟ କର୍ତ୍ତୃପକ୍ଷଙ୍କ ଅବହେଳା ଯୋଗୁ ଉମାକାନ୍ତ ନିଆଲ ନାମକ ଜଣେ ଛାତ୍ର ବୃତ୍ତି ବାବଦକୁ ୪୦ ହଜାର ଟଙ୍କା ପାଇବାରୁ ବଞ୍ଚିତ ହୋଇଥିବା ଅଭିଯୋଗ ହୋଇଛି। ଏ ନେଇ ଉମାକାନ୍ତ କଳାହାଣ୍ଡି ଜିଲାପାଳ ଓ ଜିଲା ଶିକ୍ଷାଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ କୌଣସି ସୁଫଳ ମିଳିପାରି ନ ଥିବା ପ୍ରକାଶ କରନ୍ତି। ଏହି ଘଟଣାରେ ହସ୍ତକ୍ଷେପ କରି ଜିଲା ଶିଶୁ ସୁରକ୍ଷା ଅଧିକାରୀ ମଧ୍ୟ ଏହାର ତଦନ୍ତ କରିବା ପାଇଁ ଏକ ଟିମ୍କୁ ଉମାକାନ୍ତଙ୍କ ଘରକୁ ପଠାଇଥିଲେ। ତଦନ୍ତକାରୀ ଦଳ ଉମାକାନ୍ତଙ୍କ ପରିବାରର ଆର୍ଥତ୍କ ଅବସ୍ଥା, ଶିକ୍ଷା ଓ ତାଙ୍କ ପ୍ରତିଭା ଦେଖି ତାଙ୍କୁ ବୃତ୍ତି ପ୍ରଦାନ କରାଗଲେ ସେ ଉପକୃତ ହେବେ ବୋଲି ଜିଲାପାଳଙ୍କୁ ରିପୋର୍ଟ କରିଥିଲେ। ଏହାପରେ ମଧ୍ୟ ଉମାକାନ୍ତଙ୍କୁ ଏ ଯାବତ ବୃତ୍ତି ଟଙ୍କା ମିଳିପାରିନାହଁି।
ସନ୍ନ୍ୟାସୀ କୁଣ୍ଡାମାଲ ଗ୍ରାମର ଉମାକାନ୍ତ ନିଆଲ ମଥୁରା ଗ୍ରାମସ୍ଥିତ ରାଧାକୃଷ୍ଣ ଉଚ୍ଚ ବିଦ୍ୟାଳୟରୁ ଚଳିତ ବର୍ଷ ମାଟ୍ରିକ ପରୀକ୍ଷାରେ ପ୍ରଥମ ଶ୍ରେଣୀରେ ପାସ୍ କରିଛନ୍ତି। ୨୦୧୭ ମସିହାରେ ସେ କେନ୍ଦ୍ର ସରକାରଙ୍କ ଦ୍ୱାରା ଆୟୋଜିତ ଜାତୀୟ ଆୟ ଭିତ୍ତିକ ମେଧାବୃତ୍ତି ପରୀକ୍ଷାରେ କୃତକାର୍ଯ୍ୟ ହୋଇଥିଲେ। ସେହି ସମୟରେ କିନ୍ତୁ ବିଦ୍ୟାଳୟ କର୍ତ୍ତୃପକ୍ଷ ଅବହେଳା କରି ନ୍ୟାଶନାଲ ସ୍କଲାରସିପ୍ ପୋର୍ଟାଲରେ ତାଙ୍କ ନାଁ ପୂରଣ କରି ନ ଥିଲେ। ଏହା ଜାଣିବା ପରେ ଉମାକାନ୍ତ ଅନେକ ସରକାରୀ ଅଧିକାରୀଙ୍କୁ ଜଣାଇଥିଲେ। ହେଲେ ବିଳମ୍ବ ଯୋଗୁ ଅନ୍ଲାଇନ୍ କିମ୍ବା ଅଫ୍ ଲାଇନରେ ଫର୍ମ ପୂରଣ ହୋଇପାରିବ ନାହଁି ବୋଲି କହି ସରକାରୀ ବାବୁମାନେ ମନା କରି ଦେଇଥିଲେ। ଫଳରେ ସେ ୪୦ ହଜାର ଟଙ୍କା ଛାତ୍ରବୃତ୍ତି ବାବଦକୁ ପାଇବାରୁ ବଞ୍ଚିତ ହୋଇଛନ୍ତି। ତେବେ ଉମାକାନ୍ତ କହିଛନ୍ତି ଯେ, ତାଙ୍କ ବାପା ପରିକ୍ଷିତ ନିଆଲ ଜଣେ ଗରିବ ଚାଷୀ। ଏଥିପାଇଁ ବିଭିନ୍ନ ସମୟରେ ତାଙ୍କ ପାଠ ପଢାରେ ସମସ୍ୟା ଉପୁଜିଛି। ଏହି ଛାତ୍ର ବୃତ୍ତି ପାଇଥିଲେ ଯୁକ୍ତ ୨ ପାଠ ପଢାରେ କିଛିଟା ସହାୟକ ହୋଇପାରିଥାନ୍ତା। ଅନ୍ୟପକ୍ଷେ ଏ ନେଇ ଜିଲା ଶିକ୍ଷା ଅଧିକାରୀ ସୁଶାନ୍ତ କୁମାର ଚୋପଦାରଙ୍କୁ ପଚାରିବାରୁ ଉମାକାନ୍ତଙ୍କୁ ଏହି ବୃତ୍ତି ଟଙ୍କା ପ୍ରଦାନ କରିବା ନିମନ୍ତେ କେନ୍ଦ୍ର ସରକାରଙ୍କୁ ପତ୍ର ମାଧ୍ୟମରେ ଅନୁରୋଧ କରାଯାଇଛି ବୋଲି କହିଛନ୍ତି।