ରାୟଗଡ଼ା,୨୮।୭(ଭାଗ୍ୟଶ୍ରୀ ମିଶ୍ର): ଗୁଣାମତ୍କ ଶିକ୍ଷା ବୃଦ୍ଧି ଲାଗି ସରକାର ଛାତ୍ରୀଛାତ୍ରଙ୍କୁ ବିଦ୍ୟାଳୟରେ ମାଗଣା ଖାଇବା, ରହିବା ବ୍ୟବସ୍ଥା କରିବା ସହ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ବାସ୍ତବରେ ବିଭିନ୍ନ ଆବାସିକ ସ୍କୁଲରେ ପିଲାଙ୍କୁ ଦାୟିତ୍ୱରେ ଥିବା ଶିକ୍ଷକ ଶିକ୍ଷୟିତ୍ରୀ କାମରେ ଲଗାଉଥିବା ଅନେକ ସମୟରେ ଅଭିଯୋଗ ଆସୁଛି। ରାୟଗଡ଼ା ପୌରାଞ୍ଚଳ ୧୧ ନମ୍ବର ୱାର୍ଡ ଅଣ୍ଟରିଗୁଡ଼ା ପ୍ରାଥମିକ ଉଚ୍ଚ ବିଦ୍ୟାଳୟରେ ଜଣେ ତୃତୀୟ ଶ୍ରେଣୀ ଆଦିବାସୀ ଛାତ୍ର ଶିକ୍ଷକଙ୍କ ନିର୍ଦ୍ଦେଶକ୍ରମେ କାମ କରୁଥିବାେ ବଳେ ପାଚେରି ଭୁଶୁଡ଼ି ତାଙ୍କ ଗୋଡ଼ ଉପରେ ପଡ଼ିବାରୁ ସେ ଗୁରୁତର ଆହତ ହୋଇଛନ୍ତି।
ସୂଚନାଯୋଗ୍ୟ, ଅଣ୍ଟରିଗୁଡା ପ୍ରାଥମିକ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ କେ. ଅନନ୍ତ ବେହେରା ଜଣେ ତୃତୀୟ ଶ୍ରେଣୀର ଛାତ୍ର ବରୁଣ ନନ୍ଦେଶକୁ ଡାକି ପାଚେରି ଉପରେ ଚଢ଼ି ତାର ବାନ୍ଧିବାକୁ କହିଥିଲେ। ଛାତ୍ର ଜଣକ ପାଚେରି ଉପରେ ଚଢ଼ିବା ବେଳେ ତାହା ଭୁଶୁଡି ପଡ଼ି ତାଙ୍କ ଗୋଡ଼ ଉପରେ ପଡ଼ିବାରୁ ସେ ଗୁରୁତର ଆହତ ହୋଇଥିଲେ। ସ୍କୁଲର ୨ଜଣ ଶିକ୍ଷୟିତ୍ରୀ ଛାତ୍ରଙ୍କୁ ମେଡିକାଲକୁ ଆଣି ଚିକିତ୍ସା କରି ତାଙ୍କ ଘରେ ଛାଡ଼ି ଦେଇଥିଲେ। ବରୁଣଙ୍କ ଗୋଡ଼ରେ ଯନ୍ତ୍ରଣା ହେବାରୁ ପରିବାର ଲୋକେ ବୁଧବାର ବ୍ୟାଣ୍ଡେଜ ଖୋଲି ଦେଇଥିଲେ। ବରୁଣଙ୍କ ଗୋଡ଼ରେ ପୁଣି ପାଣି ଜମାହୋଇ ଫୁଲି ଅଧିକ କଷ୍ଟହେବାରୁ ତାଙ୍କୁ ଶୁକ୍ରବାର ପୁଣି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। କିନ୍ତୁ ଡାକ୍ତର କୋରାପୁଟ ପଠାଇବାକୁ କହିଥିବା ବେଳେ ଗରିବ ପରିବାର ହୋଇଥିବାରୁ ହତାଶ ହୋଇ ମେଡିକାଲରେ ପଡି ରହିଛନ୍ତି। ଏନେଇ ଜିଲା ଶିକ୍ଷା ଅଧିକାରୀ ପୂର୍ଣ୍ଣଚନ୍ଦ୍ର ବରିହାଙ୍କୁ ପଚାରିବାରୁ ତଦନ୍ତ କରି କାର୍ଯ୍ୟନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ। ଅପରପକ୍ଷେ ଛାତ୍ରଙ୍କ ଚିକିତ୍ସା ଖର୍ଚ୍ଚ ବହନ କରାଯିବା ନେଇ ପ୍ରକାଶ କରିଛନ୍ତି।