ଶିମଲା,୨୧।୯: ଛେଳି ସହ ଜଣେ ବାଳିକା ସ୍କୁଲକୁ ଯାଉଥିବାର ଭିଡ଼ିଓ ଏବେ ସୋସିଆଲ ମିଡ଼ିଆରେ ବେଶ୍ ଭାଇରାଲ ହେବାରେ ଲାଗିଛି। ଭିଡ଼ିଓରେ ଜଣେ ବାଳିକା ପିଠିରେ ସ୍କୁଲ ବ୍ୟାଗ୍ ଧରି ହିମାଚଳ ପ୍ରଦେଶର ପାହାଡ଼ିଆ ଗାଁରେ ଯାଉଥିବାର ଦେଖିବାକୁ ମିଳୁଛି। ବାଳିକାଙ୍କ ପଛରେ ଗୋଟିଏ ଧଳା ରଙ୍ଗର ଛେଳି ମଧ୍ୟ ଯାଉଛି। ଏଥିରୁ ବାଳିକା ଏବଂ ଛେଳି ମଧ୍ୟରେ ଭଲ ବନ୍ଧୁତା ଥିବାର ଅନୁମାନ କରାଯାଇ ପାରୁଛି।
ବାଳିକା ଜଣଙ୍କ ଦୋଡିଲେ ପଛରେ ଯାଉଥିବା ଛେଳିଟି ମଧ୍ୟ ଦୌଡୁଛି। ଭିଡ଼ିଓକୁ ଡ.ଅଜୟିତା ନାମକ ଜଣେ ବ୍ୟକ୍ତିଙ୍କ ଟୁଇଟର ହ୍ୟାଣ୍ଡେଲରୁ ଅପଲୋଡ୍ କରାଯାଇଛି। ୧୪ ସେକେଣ୍ଡର ଏହି ଭିଡ଼ିଓ ନେଇ ବହୁ ୟୁଜର ସକାରାତ୍ମକ ପ୍ରତିକ୍ରିୟା ଦେଇଛନ୍ତି। ଇତିମଧ୍ୟରେ ଏହି ଭିଡ଼ିଓକୁ ୧୯ ହଜାରରୁ ଅଧିକ ଥର ଦେଖାଯାଇଥିବା ବେଳେ ୨ ହଜାରରୁ ଅଧିକ ଲାଇକ୍ ମିଳି ସାରିଛି।