ନୂଆଦିଲ୍ଲୀ, ୯।୯: କରୋନା ମହାମାରୀ ସଂକ୍ରମଣ ଯୋଗୁ ବନ୍ଦ ଥିବା ସ୍କୁଲ ସେପ୍ଟେମ୍ବର ୨୧ରୁ ଖୋଲିବ ବୋଲି କେନ୍ଦ୍ର ସରକାରଙ୍କ ପକ୍ଷରୁ ଅନୁମତି ଦିଆଯାଇଛି। ନବମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ସ୍କୁଲ ଖୋଲାଯିବ। ଏନେଇ ସ୍ବତନ୍ତ୍ର ମାର୍ଗଦର୍ଶିକା ମଧ୍ୟ ଜାରି କରାଯାଇଛି। ସ୍କୁଲ ଆସିବାକୁ ଚାହୁଁଥିବା ଶିକ୍ଷାର୍ଥୀଙ୍କୁ ଅଭିଭାବକଙ୍କ ଅନୁମତି ପତ୍ର ଆଣିବାକୁ ପଡ଼ିବ। ସ୍କୁଲ କକ୍ଷରେ ପ୍ରତି ଶିକ୍ଷାର୍ଥୀଙ୍କ ମଧ୍ୟରେ ୬ ମିଟର ଦୂରତା ବଜାୟ ରଖିବାକୁ ମାର୍ଗଦର୍ଶିକାରେ ଉଲ୍ଲେଖ ରହିଛି। ଏହା ସହିତ ମାସ୍କ, ଫେସ୍ କଭର ପିନ୍ଧିବାକୁ ବାଧ୍ୟତାମୂଳକ କରାଯାଇଛି। ସ୍କୁଲରେ ବାୟୋମେଟ୍ରିକ୍ ଆଟେଣ୍ଡାନ୍ସ୍ର ବ୍ୟବହାର କରାଯିବ ନାହିଁ ବୋଲି କୁହାଯାଇଛି। ଯେଉଁ ସ୍କୁଲ ଗୁଡ଼ିକରେ କ୍ୱାରାଣ୍ଟାଇନ୍ ସେଣ୍ଟର କରାଯାଇଥିଲା। ସେସବୁ ସ୍କୁଲକୁ ସମ୍ପୂର୍ଣ୍ଣ ସଂକ୍ରମଣ ମୁକ୍ତ କରାଯିବା ପରେ ପରବର୍ତ୍ତୀ କାର୍ଯ୍ୟପନ୍ଥା ଗ୍ରହଣ କରାଯିବ। ସ୍କୁଲ ଗେଟ୍ ପାଖରେ ଥର୍ମାଲ ସ୍କ୍ରିନିଂ ଏବଂ ସାନିଟାଇଜରର ବ୍ୟବସ୍ଥା କରାଯିବ ବୋଲି ସରକାରଙ୍କ ପକ୍ଷରୁ କୁହାଯାଇଛି। ସ୍କୁଲରେ ୫୦ ପ୍ରତିଶତ କର୍ମଚାରୀ କାର୍ଯ୍ୟ କରିବା ଲାଗି ଅନୁମତି ଦିଆଯାଇଛି। ଅସୁସ୍ଥ ଥିବା କର୍ମଚାରୀ ଏବଂ ଗର୍ଭବତୀ କର୍ମଚାରୀଙ୍କୁ ସ୍କୁଲକୁ ଆସିବାକୁ ବାରଣ କରାଯାଇଛି। ଶିକ୍ଷକ ଏବଂ ଶିକ୍ଷାର୍ଥୀଙ୍କ ମଧ୍ୟରେ ପେନ୍, ପେନସିଲ୍, ରବର, ନୋଟ୍ବୁକ୍ ଆଦିର ଶେୟାରିଂ କରାଯିବ ନାହିଁ ବୋଲି ମାର୍ଗଦର୍ଶିକାରେ ଦର୍ଶାଯାଇଛି। ସ୍କୁଲରେ ପ୍ରାର୍ଥନା ଏବଂ ଖେଳକୁଦ ହେବ ନାହିଁ। ସମସ୍ତ ଏୟାର କଣ୍ଡସନରକୁ ୨୪ରୁ ୩୦ ଡିଗ୍ରୀ ତାପମାତ୍ରାରେ ରଖାଯିବ। ବାୟୁଚଳାଚଳର ବ୍ୟବସ୍ଥା ଥିବା କକ୍ଷରେ ପାଠପଢ଼ା କରାଯିବ। ଆରୋଗ୍ୟ ସେତୁ ଆପ୍ ଦ୍ୱାରା ସୂଚନା ପାଇଁ କମ୍ ସେ କମ୍ ଗୋଟିଏ ସ୍ମାର୍ଟଫୋନ୍ ରହିବା ଆବଶ୍ୟକ। ସେହିପରି କଣ୍ଟେନମେଣ୍ଟ ଜୋନ୍ ବାହାରେ ଥିବା ସ୍କୁଲ ଗୁଡ଼ିକ ଖୋଲିପାରିବ। ତେବେ କଣ୍ଟେନମେଣ୍ଟ ଜୋନ୍ ମଧ୍ୟରେ ଥିବା ସ୍କୁଲ ପୂର୍ବପରି ବନ୍ଦ ରହିବ। ପ୍ରତି ସ୍କୁଲରେ ଆଇସୋଲେଶନ ରୁମ୍ ରହିବା ବାଧ୍ୟତାମୂଳକ। ଆବଶ୍ୟକସ୍ଥଳେ ଅସୁସ୍ଥ କର୍ମଚାରୀ ଅବା ଶିକ୍ଷାର୍ଥୀଙ୍କୁ ଏଠାରେ ରଖାଯାଇ ପାରିବ ବୋଲି ମାର୍ଗଦର୍ଶିକାରେ ଦର୍ଶାଯାଇଛି।
