ଲକ୍ଷ୍ନୌ: ଏମିତି ଏକ ସ୍କୁଲ ଯେଉଁଠି ନା ଅଛନ୍ତି ଶିକ୍ଷକ ନା ପ୍ରିନ୍ସିପାଲ। ଅଛନ୍ତି କେବଳ ଛାତ୍ରୀଛାତ୍ର। କଥାଟା ଶୁଣିଲେ ସମସ୍ତଙ୍କୁ ହୁଏତ ଅଡୁଆ ଲାଗିପାରେ। କିନ୍ତୁ ଏଭଳି ଏକ ଭିନ୍ନ ଧରଣର ସ୍କୁଲରେ ପାଠପଢ଼ି ପିଲାମାନେ ବେଶ୍ ସଫଳତା ହାସଲ କରି ପାରିଛନ୍ତି।
ଉତ୍ତରପ୍ରଦେଶ ବୁନ୍ଦେଲଖଣ୍ଡ ଅଞ୍ଚଳର ମହୋବାରେ ଏହି ଭିନ୍ନ ଧରଣର ସ୍କୁଲ ଖୋଲିଛି , ଯାହାର ନାଁ ରହିଛି ତିରଥ୍ ସାଗର ସ୍କୁଲ। ସେଠାରେ ଛାତ୍ରୀଛାତ୍ରଙ୍କୁ କୌଣସି ଶିକ୍ଷକ ପାଠ ପଢାନ୍ତି ନାହିଁ। ସେଠାରେ କୌଣସି ନିର୍ଦ୍ଦିଷ୍ଟ ସମୟ ନିର୍ଘଣ୍ଟ ଅଥବା ପାଠ୍ୟକ୍ରମ ବି ନାହିଁ। ଖାଲି ସେତିକି ନୁହେଁ, ଏଠି କୌଣସି ସ୍ବତନ୍ତ୍ର ଆଇନ ମଧ୍ୟ ତିଆରି କରାଯାଇନି। ଏହି ସ୍କୁଲରେ ପିଲାମାନେ ହିଁ ପରସ୍ପରକୁ ପାଠ ପଢାନ୍ତି। ଅର୍ଥାତ୍ ଯେଉଁ ପିଲାମାନେ ଗଣିତରେ ଅଧିକ ଦକ୍ଷ ସେମାନେ ସେହି ବିଷୟରେ ଦୁର୍ବଳ ଥିବା ପିଲାଙ୍କୁ ପାଠ ପଢ଼ାନ୍ତି। ସେହିଭଳି ଅନ୍ୟ ସବୁ ବିଷୟରେ ଏହି ସୂତ୍ରରେ ହିଁ ପାଠ ପଢ଼ା ହୋଇଥାଏ। ମହୋବାର କିଛି ସ୍ଥାନୀୟ ପିଲା ଏକାଠି ହୋଇ ତିଆରି କରିଛନ୍ତି ଏଭଳି ଏକ ସ୍କୁଲ। ଏହି ସ୍କୁଲ ମାଧ୍ୟମରେ ବହୁ ମେଧାବୀ ପିଲା ସୃଷ୍ଟି ହୋଇ ପାରୁଛନ୍ତି। ତେଣୁ ବିଭିନ୍ନ କ୍ଷେତ୍ରରେ ହିଁ ସେମାନେ ସଫଳତା ହାସଲ କରିପାରୁଛନ୍ତି। ଏଠି ଛାତ୍ରମାନେ ପ୍ରତିଦିନ ନିଜ ହିସାବରେ ଏକ ବିଷୟ ଉଠାଇଥାନ୍ତି ଯେଉଁଥିରେ କି ଅଧିକାଂଶ ଭଲଭାବେ ବୁଝିପାରି ନ ଥାନ୍ତି। ଏହାପରେ ସମସ୍ତେ ମିଶି ସେହି ବିଷୟରେ ଚର୍ଚ୍ଚା କରି ସମସ୍ୟା ସମାଧାନ କରିଥାନ୍ତି। ଅର୍ଥ ଖର୍ଚ୍ଚ କରି କୋଚିଂ ନେଇ ପାରୁ ନ ଥିବା ପିଲାମାନଙ୍କ ପାଇଁ ଏଭଳି ଏକ ସ୍କୁଲ ବେଶ୍ ସହାୟକ ହୋଇପାରୁଛି।
