କୋରାପୁଟ,୪।୩(ସ୍ବ.ପ୍ର.): ବିଦ୍ୟାଳୟରେ ଅଧ୍ୟୟନ କରୁଥିବା ଛାତ୍ରୀଛାତ୍ରଙ୍କ ମଧ୍ୟରେ ବୈଜ୍ଞାନିକ ଦୃଷ୍ଟିଭଙ୍ଗୀ ସୃଷ୍ଟି କରିବା ପାଇଁ ଉଦ୍ୟମ ଚାଲିଛି ବୋଲି କୋରାପୁଟ ବ୍ଲକ ଶିକ୍ଷା ଅଧିକାରୀ ଶ୍ରୀକାନ୍ତ ଜାନି ସ୍ଥାନୀୟ ସରକାରୀ ଉଚ୍ଚ ବିଦ୍ୟାଳୟଠାରେ ଆୟୋଜିତ ଜାତୀୟ ବିଜ୍ଞାନ ଦିବସରେ ଅତିଥିଭାବେ ଯୋଗଦେଇ ପ୍ରକାଶ କରିଛନ୍ତି। ଜିଲାର ବିଭିନ୍ନ ବିଦ୍ୟାଳୟରେ ଛାତ୍ରୀଛାତ୍ରଙ୍କ ମଧ୍ୟରେ ବିଜ୍ଞାନ ପ୍ରତି ଆଗ୍ରହ ସୃଷ୍ଟି କରିବା ଓ ବୈଜ୍ଞାନିକ ଚେତନାକୁ ପ୍ରୋତ୍ସାହିତ କରିବା ପାଇଁ ସଭା ସମିତି, ପ୍ରଦର୍ଶନୀ ଓ କର୍ମଶାଳା ଇତିମଧ୍ୟରେ ଆୟୋଜିତ ହୋଇଯାଇଛି ା ବିଜ୍ଞାନ କେବଳ ଏକ ବିଷୟ ନୁହେଁ ଏହା ଏକ ଦୃଷ୍ଟଭଙ୍ଗୀ। ଅନ୍ୟ ସମସ୍ତ ବିଷୟକୁ ପଢ଼ି ଠିକ୍ ଭାବେ ବୁଝିବାର ମାଧ୍ୟମ ବିଜ୍ଞାନ ବୋଲି ଜାନି ପ୍ରକାଶ କରିଥିଲେ। ବର୍ତ୍ତମାନ ରାଜ୍ୟ ସରକାରଙ୍କ ୫-ଟି ଯୋଜନା ଅନ୍ତର୍ଗତ ବିଦ୍ୟାଳୟଗୁଡ଼ିକରେ ଉପଯୁକ୍ତ ବିଜ୍ଞାନାଗାର ପ୍ରତିଷ୍ଠାକରି ବିଭିନ୍ନ ଶିକ୍ଷଣୀୟ ଉପକରଣ ଯୋଗାଇ ଦେଉଛନ୍ତି। ମଣିଷ କଙ୍କାଳର ନମୁନାଠାରୁ ଆରମ୍ଭକରି ପର୍ଯ୍ୟାୟ ସାରଣୀର ବିଶାଳ ପ୍ରଦର୍ଶନୀ ପର୍ଯ୍ୟନ୍ତ ବିଭିନ୍ନ ବିଜ୍ଞାନ ଶିକ୍ଷା ଉପଯୋଗୀ ଉପକରଣ ଛାତ୍ରୀଛାତ୍ରମାନେ ପାଇ ବାସ୍ତବ ଶିକ୍ଷାର ଅନୁଭୂତି ପାଇପାରୁଥିବା ଅନ୍ୟତମ ଅତିଥି ମହାଦେଈପୁଟ ଆଶ୍ରମ ବିଦ୍ୟାଳୟର ପ୍ରଧାନ ଶିକ୍ଷକ ବିଜୟ ରଥ କହିଥିଲେ। ବିଦ୍ୟାଳୟ ମଧ୍ୟରେ ବିଭିନ୍ନ ବୈଜ୍ଞାନିକ ଉପକରଣକୁ ନେଇ ଶିକ୍ଷକମାନଙ୍କ ସହଯୋଗରେ ଅଭ୍ୟାସ କରୁଥିବାରୁ ଜିଲା ଓ ରାଜ୍ୟସ୍ତରରେ ଆୟୋଜିତ ହେଉଥିବା ବିଭିନ୍ନ ପ୍ରଦର୍ଶନୀରେ ଭାଗନେଇ ଆମେ ସଫଳତା ପାଇପାରୁଛୁ ବୋଲି କେତେଜଣ ଛାତ୍ରୀଛାତ୍ର ନିଜ ଅନୁଭୂତି ପ୍ରକାଶ ଅବସରରେ ପ୍ରକାଶ କରିଥିଲେ।