ଭୁବନେଶ୍ୱର,୯।୧୧(ବ୍ୟୁରୋ): ରାଜ୍ୟ ବିଦ୍ୟାଳୟଗୁଡ଼ିକର ରୂପାନ୍ତରଣରେ ବିଜ୍ଞାନ ଓ ଗଣିତ ଶିକ୍ଷକଙ୍କ ପ୍ରଶିକ୍ଷଣ ଅଧିକ ସହାୟକ ହେବ ବୋଲି ବିଜ୍ଞାନ ଓ କାରିଗରି ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା ପ୍ରକାଶ କରିଛନ୍ତି। ସୋମବାର ବେଙ୍ଗାଲୁରୁ ନିକଟ ଚିଲେକେରସ୍ଥିତ ଭାରତୀୟ ବିଜ୍ଞାନ ସଂସ୍ଥାନର ପ୍ରତିଭା ବିକାଶ କେନ୍ଦ୍ରରେ ଓଡ଼ିଶାରୁ ଯାଇଥିବା ଶିକ୍ଷକଙ୍କ ପ୍ରଶିକ୍ଷଣ କାର୍ଯ୍ୟକ୍ରମକୁ ଉଦ୍ଘାଟନ କରିବା ଅବସରରେ ମନ୍ତ୍ରୀ ଏହା କହିଛନ୍ତି। ବିଜ୍ଞାନ ଓ ଗଣିତ ଶିକ୍ଷାର ଗୁରୁତ୍ୱ ଓ ଗୁଣାତ୍ମକତା ଉପରେ ଶିକ୍ଷକମାନଙ୍କୁ ପରାମର୍ଶ ଦେଇ ସେ କହିଛନ୍ତି, ବିଦ୍ୟାଳୟ ରୂପାନ୍ତରଣ କାର୍ଯ୍ୟକ୍ରମରେ ସ୍କୁଲଗୁଡ଼ିକରେ ଆଧୁନିକ ବିଜ୍ଞାନାଗାର ଆରମ୍ଭ କରାଯାଉଛି। ଏଥିରେ ପ୍ରଶିକ୍ଷିତ ବିଜ୍ଞାନ ଶିକ୍ଷକଙ୍କ ଭୂମିକା ବୃଦ୍ଧି ପାଇବ। ଗଣିତ ଓ ବିଜ୍ଞାନ ଶିକ୍ଷକଙ୍କ ଉଚ୍ଚତର ପ୍ରଶିକ୍ଷଣ ଫଳରେ ସରକାରୀ ସ୍କୁଲଗୁଡ଼ିକରେ ଶିକ୍ଷାଦାନର ମାନ ବଢ଼ିବ। ଛାତ୍ରୀଛାତ୍ରଙ୍କ ଉପସ୍ଥାନ ବୃଦ୍ଧି ପାଇବା ସହିତ ସାମଗ୍ରିକ ଭାବରେ ବିଜ୍ଞାନ ଓ ଗଣିତ ଶିକ୍ଷାର ବାତାବରଣ ଅଧିକ ବିକଶିତ ହେବ ବୋଲି ମନ୍ତ୍ରୀ କହିଛନ୍ତି।
ଓଡ଼ିଶାର ବିଭିନ୍ନ ସ୍ଥାନରୁ ପ୍ରଥମ ପର୍ଯ୍ୟାୟରେ ୧୧୪ଜଣ ବିଜ୍ଞାନ ଓ ଗଣିତ ଶିକ୍ଷକ ଏହି ପ୍ରଶିକ୍ଷଣ କାର୍ଯ୍ୟକ୍ରମରେ ଯୋଗଦେଇଛନ୍ତି। ଏହି ଅବସରରେ ମନ୍ତ୍ରୀ ଶିକ୍ଷକଙ୍କ ସହିତ ମତ ବିନିମୟ କରିଥିଲେ ଓ କେନ୍ଦ୍ରର ବିଭିନ୍ନ ବିଭାଗ ପରିଦର୍ଶନ କରିଥିଲେ। ଏପରି ପ୍ରଶିକ୍ଷଣ କାର୍ଯ୍ୟକ୍ରମ ପର୍ଯ୍ୟାୟକ୍ରମେ ଅବ୍ୟାହତ ରହିବ ବୋଲି ମନ୍ତ୍ରୀ ପଣ୍ଡା ସୂଚନା ଦେଇଛନ୍ତି। ଉଦ୍ଘାଟନ କାର୍ଯ୍ୟକ୍ରମରେ ପ୍ରତିଭା ବିକାଶ କେନ୍ଦ୍ରର ନିର୍ଦ୍ଦେଶକ ପ୍ରଫେସର ଏମ୍.ଏସ୍. ହେଗ୍ଡ଼େ ଓ କାର୍ଯ୍ୟକ୍ରମର ଆବାହକ ପ୍ରଫେସର ଡି.ଏନ୍. ରାଓ ଉପସ୍ଥିତ ଥିଲେ।
