କେନ୍ଦୁଝର, ୭।୭(ସ୍ବ.ପ୍ର.)-ପାଠ ସହିତ ଚାଷ କରି ରୋଜଗାରକ୍ଷମ ହୋଇଛନ୍ତି ମାନସିଂ ସୋରେନ ା ତାଙ୍କ ଘର ଘଷିପୁରା ବ୍ଲକରେ। କିନ୍ତୁ ପିଲା ଦିନରୁ ସଦର ବ୍ଲକ ରାଜବନ୍ଧରେ ପିଉସି ପୁଅ ଭାଇଙ୍କ ଘରେ ରହି ପାଠ ପଢୁଛନ୍ତି। ମାଟ୍ରିକ ପାସ କରିବା ପରେ ମାନସିଂ ଏବେ ଧରଣୀଧର ଯୁକ୍ତ ଦୁଇ ଉଚ୍ଚମାଧ୍ୟମିକ ବିଦ୍ୟାଳୟରେ ଯୁକ୍ତ ୨ ବିଜ୍ଞାନ ଦ୍ୱିତୀୟ ବର୍ଷର ଛାତ୍ର। ଖାଲି ପାଠ ନୁହେଁ ସେ ଚାହୁଁଥିଲେ ନିଜେ ଦୁଇ ପଇସା ରୋଜଗାର କରିବାପାଇଁ। ସେ ତାଙ୍କ ଭାଇଙ୍କ ସହିତ ମିଶି ଚାଷ କାମ କରୁଛନ୍ତି। ସେହି ଅମଳ ପରିବାକୁ ସାଇକେଲରେ ଆଣି ସେ କେନ୍ଦୁଝରରେ ବିକ୍ରି କରୁଛନ୍ତି।
ମାନସିଂ ନିଜେ ପାଓ୍ବାର ଟିଲର ଚଲାଇ ହଳ କରିବା ଓ ପନିପରିବା ଚାରା ଲଗାଇବା ଆଦି କାମ କରନ୍ତି। ବିଲାତି, ଛୁଇଁ , ମୂଳା, ଖଡା ଶାଗ କରି ବେଶ ଭଲ ଦୁଇ ପଇସା ରୋଜଗାର କରିଥାନ୍ତି। ଚଳିତ ବର୍ଷ କୁଆପଥର ମାଡରେ ବହୁ ବିଲାତି ଫସଲ ତାଙ୍କର ନଷ୍ଟ ହୋଇଯାଇଛି। ପାଣିର ସୁବିଧା ନ ଥିବାରୁ ନିଜେ ଆସି ଫସଲରେ ପାଣି ମଡାଇଥାନ୍ତି ା ଜଳସେଚନର ସୁବ୍ୟବସ୍ଥା ହୋଇ ପାରିଲେ ଏବଂ ପନିପରିବା ସଂରକ୍ଷଣ ପାଇଁ ଶୀତଳ ଭଣ୍ଡାର ପ୍ରତିଷ୍ଠା ହେଲେ ଚାଷୀ ମାନେ ଅଧିକ ଉପକୃତ ହୋଇ ପାରନ୍ତେ ବୋଲି ସେ କହିଛନ୍ତି। ଶୀତଳ ଭଣ୍ଡାର ଥିଲେ ତରବରିଆ ଭାବେ କମ ଦାମରେ ପନିପରିବା ନ ବିକି ସାଇତି ରଖିବା ସହ ପନିପରିବା ନଷ୍ଟ ହୁଅନ୍ତା ନାହିଁ ଓ ଭଲ ମୂଲ୍ୟ ମିଳିପାରନ୍ତା ବୋଲି ମାନସିଂ କହିଛନ୍ତି। ଚାଷକୁ ଛାଡ଼ିଦେଲେ ସେ ଫୁଟବଲ ଖେଳିବାକୁ ଭାରି ଭଲ ପାଆନ୍ତି। ତାଙ୍କୁ ବିଭିନ୍ନ ଗ୍ରାମର ପିଲା ଫୁଟବଲ୍ ମ୍ୟାଚ୍ କଲେ ଖେଳିବାକୁ ଡାକନ୍ତି ଏବଂ ଏଥିପାଇଁ କିଛି ପଇସା ଦେଇଥାନ୍ତି ବୋଲି କୁହନ୍ତି ା ତେବେ ପାଠ ପଢି ଭଲ ଚାକିରୀ କରିବା ଆଶା ରଖିଛନ୍ତି ା ଭାଇ ଚାଷବାସ କରନ୍ତି ା ଘରେ ତାଙ୍କର ଦୁଇ ଭାଇ ଓ ଗୋଟିଏ ଭଉଣୀ। ତାଙ୍କ ବାପା ଚାଷ କରନ୍ତି। ସାନ ଭାଇ ଭୁବନେଶ୍ୱରରେ ପଢୁଥିବା ବେଳେ ଆଉ ଜଣେ ଭାଇ ଫୁଟବଲରେ ଜାତୀୟ ସ୍ତରରେ ଖେଳୁଥିବା ସେ କହିଛନ୍ତି। ଏଠାରେ ସୂଚନା ଯୋଗ୍ୟ ଯେ, ସଦର ବ୍ଲକ ଅଞ୍ଚଳରେ ବହୁ ଆଦିବାସୀ ପରିବାର ଚାଷ କରି ପନିପରିବା ଯୋଗାଇଥାନ୍ତି ା କେନ୍ଦୁଝର ସହରକୁ ଯୋଗାଇବା ସହ ବାହାର ଜିଲାକୁ ମଧ୍ୟ ବେପାରୀ ମାନଙ୍କ ଜରିଆରେ ପଠାଇଥାନ୍ତି ା ତେବେ ପ୍ରୋତ୍ସାହନ ଓ ସହାୟତା ମିଳିଲେ ସେମାନେ ଅଧିକ ଉତ୍ପାଦନ କରିପାରନ୍ତେ ଏବଂ ସେମାନଙ୍କ ଆର୍ଥିକ ଓ ସାମାଜିକ ଅବସ୍ଥା ସୁଧୁରିପାରନ୍ତା ବୋଲି ବରିଷ୍ଠ ନାଗରିକ ତଥା ଚାଷୀ ରାଜବନ୍ଧ ଗ୍ରାମର ସୁନାରାମ ମାରାଣ୍ଡି କହିଛନ୍ତି।