ଶ୍ରୀହରିକୋଟା,୧୩।୭ : ଇଣ୍ଡିଆନ ସ୍ପେସ ରିସର୍ଚ୍ଚ ଇନଷ୍ଟିଚ୍ୟୁଟ (ଇସ୍ରୋ) ଖୁବ ଶୀଘ୍ର ଚନ୍ଦ୍ରାୟଣ -୩ ଲଞ୍ଚ କରିବାକୁ ଯାଉଛି। ଏହାର ସଫଳତା ପାଇଁ ପ୍ରାର୍ଥନା କରିବାକୁ ଇସ୍ରୋ ବୈଜ୍ଞାନିକମାନଙ୍କର ଏକ ଟିମ ତିରୁପତି ଭେଙ୍କଟାଚାଲାପତି ମନ୍ଦିରରେ ଚନ୍ଦ୍ରୟାନ -୩ ର ଏକ କ୍ଷୁଦ୍ର ମଡେଲ ନେଇ ପହଞ୍ଚିଥିଲେ ।
ଆନ୍ଧ୍ରପ୍ରଦେଶର ତିରୁପତି ଭେଙ୍କଟାଚାଲାପତି ମନ୍ଦିରରେ ଇସ୍ରୋ ବୈଜ୍ଞାନିକମାନେ ପ୍ରାର୍ଥନା କରୁଥିବାର ଦେଖିବାକୁ ମିଳିଥିଲା। ପରେ, ଛୋଟ ମଡେଲକୁ ଦେଖାଇ ସେମାନେ କହିଥିଲେ ଏହା ହେଉଛି ଚନ୍ଦ୍ରାୟନ-୩। ଶୁକ୍ରବାର ଏହା ଲଞ୍ଚ ହେବ। ଇସ୍ରୋ ଆନ୍ଧ୍ରପ୍ରଦେଶର ଶ୍ରୀହରିକୋଟାସ୍ଥିତ ସତୀଶ ଧାୱନ ସ୍ପେସ ସେଣ୍ଟରରୁ ଜୁଲାଇ ୧୪ ଅପରାହ୍ନ ୨ଟା ୩୫ରେ ଚନ୍ଦ୍ରାୟନର ତୃତୀୟ ମିଶନ ଆରମ୍ଭ କରିବ।
ଏହାପୂର୍ବରୁ ମଙ୍ଗଳବାର ଇସ୍ରୋ ଚନ୍ଦ୍ରାୟନ -୩ ର ଚନ୍ଦ୍ର ଅବତରଣକୁ ସଫଳତାର ସହ ରିହର୍ସାଲ କରିଥିଲା ଇସ୍ରୋ ର ଏକ ଟୁଇଟରେ କୁହାଯାଇଛି ସମଗ୍ର ଲଞ୍ଚ ପ୍ରସ୍ତୁତି ଏବଂ ଏକ ଡମି ଫର୍ମରେ ୨୪ ଘଣ୍ଟିଆ ରିହର୍ସାଲ ସଫଳତାର ସହିତ ସମାପ୍ତ ହୋଇଛି । ଚନ୍ଦ୍ରାୟନ-୩ ର ଲକ୍ଷ୍ୟ ହେଉଛି ଚନ୍ଦ୍ର ପୃଷ୍ଠରେ ଏକ ସୁରକ୍ଷିତ ଅବତରଣ କରିବା। ଏହାପୂର୍ବରୁ, ଇସ୍ରୋ ଦୁଇଟି ମିଶନ ଆରମ୍ଭ କରିଥିଲା। ଚନ୍ଦ୍ରାୟନ-୧ ଏବଂ ଚନ୍ଦ୍ରାୟନ-୨ ଚନ୍ଦ୍ର ପୃଷ୍ଠରେ ଅବତରଣ କରିପାରି ନ ଥିଲା।
ଯଦି ସମସ୍ତ ଯୋଜନା ଅନୁଯାୟୀ ଚାଲିବ ତେବେ ଅଗଷ୍ଟ ୨୩ କିମ୍ବା ୨୪ ରେ ଚନ୍ଦ୍ରାୟନ-୩ ଚନ୍ଦ୍ରରେ ଅବତରଣ କରିବ। ଏହି ମିଶନରେ ଆମେରିକା, ରୁଷିଆ ଏବଂ ଚାଇନା ପରେ ଚନ୍ଦ୍ରରେ ପହଞ୍ଚିବାରେ ଭାରତ ଚତୁର୍ଥ ଦେଶ ହେବ।
