ବରଗଡ଼,୧୭ା୯(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ସ୍କ୍ରବ୍ ଟାଇଫସ ସଂକ୍ରମଣ ଯୋଗୁ ୫ଜଣଙ୍କ ମୃତ୍ୟୁ ହେବା ଘଟଣା ସାମନାକୁ ଆସିବା ପରେ ସ୍ବାସ୍ଥ୍ୟ ନିର୍ଦ୍ଦେଶକଙ୍କ ଆଦେଶକ୍ରମେ ଭୀମସାର୍, ବୁର୍ଲା ୩ ଜଣିଆ ଟିମ ଶନିବାର ବରଗଡ଼ ଗସ୍ତରେ ଆସି ଏହାର ଅନୁଧ୍ୟାନ କରିଛନ୍ତି। ପ୍ରକୃତରେ ବିଷାକ୍ତ କୀଟ କାମୁଡ଼ାରେ ହେଉଥିବା ସ୍କ୍ରବ୍ ଟାଇଫସ ରୋଗ ଉପରେ ବରଗଡ଼ର କ’ଣ ସ୍ଥିତି ରହିଛି ତାହାର ଅନୁଧ୍ୟାନ କରିଥିଲେ। ଭୀମସାର, ବୁର୍ଲାର ଉଦେନ ନାୟକ ଡା.ସତ୍ୟବ୍ରତ ଠାକୁର ଓ ଶଙ୍କର ରାମ ଚନ୍ଦାନୀ ଏହି ଟିମ୍ରେ ଥିଲେ। ସିଡିଏମଓ ଜିତେନ୍ଦ୍ର ମୋହନ ବେବର୍ତ୍ତାଙ୍କୁ ଭେଟି ଜିଲାରେ ସ୍କ୍ରବ୍ ଟାଇଫସ ସଂକ୍ରମଣ ସ୍ଥିତି ଉପରେ ପଚାରି ବୁଝିଥିଲେ। ସ୍କ୍ରବ୍ ଟାଇଫସ ଯୋଗୁ ଜିଲାର ୫ଜଣଙ୍କର ମୃତ୍ୟୁ ହୋଇଛି ନା ତାହାର ଅନ୍ୟ କିଛି କାରଣ ରହିଛି, ତାହା ତଦନ୍ତ କରାଯିବା ସହିତ ବିଭିନ୍ନ ଦିଗରେ ଅନୁଧ୍ୟାନ କରି ରାଜ୍ୟ ସରକାରଙ୍କୁ ଏହି ଟିମ୍ ଏକ ରିପୋର୍ଟ ପଠାଇବ ବୋଲି ସୂଚନା ମିଳିଛି। ଏହି ବିଷାକ୍ତ କୀଟ କାମୁଡ଼ିବା ଦାରା ସଂକ୍ରାମକ ରୋଗ ହେଉଛି ନା ନାହିଁ, ତାହାର ଅନୁଧ୍ୟାନ କରାଯିବା ସହିତ ଏହି ସ୍କ୍ରବ୍ ଟାଇଫସ ରୋକିବାକୁ କିପରି ଜନସଚେତନତା କରାଯିବ କିମ୍ବା କିପରି ଅନ୍ୟାନ୍ୟ ପଦକ୍ଷେପ ନିଆଯାଇ ପାରିବ ଏବଂ ଏହି ସ୍କ୍ରବ୍ ଟାଇଫସ ରୋଗର ଚିହ୍ନଟ, ଚିକିତ୍ସା କିପରି ଶୀଘ୍ର କରାଯାଇ ପାରିବ ସେନେଇ ଆଲୋଚନା କରାଯାଇଥିଲା। ଇତିମଧ୍ୟରେ ବରଗଡ଼ ସ୍ବାସ୍ଥ୍ୟ ବିଭାଗ ପକ୍ଷରୁ ୩୭୬ ଜଣଙ୍କର ପରୀକ୍ଷା କରାଯାଇଥିଲା। ସେମାନଙ୍କ ମଧ୍ୟରୁ ୧୧ ଜଣଙ୍କର ନମୁନା ପଜିଟିଭ୍ ଆସିଥିବା ବେଳେ ବର୍ତ୍ତମାନ ସୁଦ୍ଧା ସମସ୍ତ ପଜିଟିଭ୍ ରୋଗୀ ସୁସ୍ଥ ରହିଥିବା ସୂଚନା ମିଳିଛି।